އިންޑިއާގެ އަސްކަރިއްޔާ އަށް 428 މިލިއަން ޑޮލަރުގެ އެހީގެ ޕެކޭޖެއް އެމެރިކާ އިން ފާސް ކޮށްފި

އިންޑިއާގެ އަސްކަރިއްޔާ އިން ބޭނުން ކުރަމުންދާ އަޕާޗޭ ހެލިކޮޕްޓަރު ތަކާއި،  "އެމް777" މަރުކާގެ ހަވިޓްޒަރ ބަޑިތައް މަރާމާތުކޮށް ބެލެހެއްޓުމަށް ބޭނުންވާ 428 މިލިއަން ޑޮލަރަށް ވުރެ އަގުބޮޑު އެހީގެ ޕެކޭޖެއް ވިއްކުމުގެ ހުއްދަ އެމެރިކާގެ ސަރުކާރުން ދީފި އެވެ.

އެމެރިކާގެ ސްޓޭޓް ޑިޕާޓްމަންޓް އިން ހާމަ ކޮށްފައިވާ ގޮތުގައި، މިއީ އައު ހަތިޔާރު ގަތުމުގެ އެއްބަސްވުމެއް ނޫނެވެ. ނަމަވެސް، މިއީ މިހާރު ވެސް އިންޑިއާގެ އަތުގައި ހުރި އަސްކަރީ ވަސީލަތްތައް ހަނގުރާމަ އަށް އަބަދު ވެސް ތައްޔާރީ ހާލަތެއްގައި ބެހެއްޓުމަށާއި، އޭގެ އޮޕަރޭޝަނަލް ފެންވަރު މަތިކުރުމަށްޓަކައި ފޯރުކޮށްދޭ ލޮޖިސްޓިކްސް އަދި ޓެކްނިކަލް ސަޕޯޓް ޕެކޭޖެކެވެ.

މި އެހީގެ ދަށުން ދެ ދާއިރާ އަކަށް ބަހާލައިގެން ބޮޑެތި ޚިދުމަތް ތަކެއް ފޯރުކޮށްދިނުމަށް ވަނީ ހަމަޖެހިފަ އެވެ. އެގޮތުން، އޭއެޗް-64އީ އަޕާޗޭ ހެލިކޮޕްޓަރުތައް ދެމެހެއްޓެނިވި ގޮތެއްގައި ބެލެހެއްޓުމަށް 198.2 މިލިއަން ޑޮލަރު ކަނޑަ އަޅާފައިވާއިރު، މީގެ މައިގަނޑު ކޮންޓްރެކްޓަރުންނަކީ އެމެރިކާގެ އެއަރޯސްޕޭސް އެންޑް ޑިފެންސް ދާއިރާގެ ދެ ކުންފުނި ކަމަށްވާ ބޯއިންގ އަދި ލޮކްހީޑް މާޓިން ކުންފުންޏެވެ. އަދި އިންޑިއާގެ ފަރުބަދަ މަތީ ސަރަހައްދު ތަކުގެ ދިފާއުގައި މުހިންމު ދައުރެއް އަދާކުރާ ހަވިޓްޒަރ ބަޑިތަކަށް ދިގު މުއްދަތުގެ ސަޕޯޓް ދިނުމަށް 230 މިލިއަން ޑޮލަރު ވަނީ ކަނޑައަޅާފަ އެވެ. މީގެ ތެރޭގައި މެޝިނަރީގެ އިތުރު ބައިތަކާއި، މަރާމާތު ކުރުމުގެ ޚިދުމަތްތަކާއި، އަދި ސިފައިން ތަމްރީނު ކުރުން ހިމެނެ އެވެ.

އެމެރިކާ އިން ބުނި ގޮތުގައި، މި ވިޔަފާރީގެ ސަބަބުން އެމެރިކާ އާއި އިންޑިއާއާ ދެމެދު އޮންނަ ސްޓްރެޓީޖިކް ގުޅުން އިތުރަށް ވަރުގަދަވެ، އިންޑޯ ޕެސިފިކް ސަރަހައްދުގެ ހަމަޖެހުމަށް ބާރަކަށް ވާނެ އެވެ. އަދި މިއީ ކުރިމަތި ވެދާނެ ސަރަހައްދީ ނުރައްކާ ތަކުން ދިފާއު ވުމަށް އިންޑިއާ އަށް ލިބޭނެ ކުރި އެރުމެއް ކަމަށާއި، ނަމަވެސް މީގެ ސަބަބުން އެ ސަރަހައްދުގައި އަސްކަރީ ނުތަނަވަސް ކަމެއް ހިނގާފާނެ ޙާލަތަކަށް ނާންނާނެ ކަމަށްވެސް އެމެރިކާ އިން ބުނެ އެވެ.