ރަޝިޔާގެ ދުރު ރާާސްތާ މިިސައިލް ސިސްޓަމްތައް ހިމެނޭ ގޮތަށް، 25 ބިލިއަން ޑޮލަރުގެ އަސްކަރީ ސާމާނު ގަތުމަށް އިންޑިއާ އިން ހުއްދަ ދީފި

ރަޝިޔާގައި އުފައްދާ އެސް-400 މަރުކާގެ ދުރު ރާސްތާގެ މިސައިލް ސިސްޓަމްތަކާ އެކު، ގާތް ގަނޑަކަށް 25 ބިލިއަން އެމެރިކާ ޑޮލަރުގެ އަސްކަރީ ސާމާނު ގަތުމަށް އިންޑިއާ ސަރުކާރުން ހުއްދަ ދީފި އެވެ. 

އިންޑިއާގެ ޑިފެންސް މިނިސްޓްރީ އިން ހާމަ ކޮށްފައިވާ ގޮތުގައި، މި ނިންމުން ނިންމާފައި ވަނީ އެ ޤައުމުގެ ޑިފެންސް މިނިސްޓަރު ރާޖްނާތު ސިންގް ރިޔާސަތު ބެލެހެއްޓެވި ޑިފެންސް އެކިއުޒިޝަން ކައުންސިލްގެ ބައްދަލުވުމެއްގަ އެވެ. 

ޑިފެންސް މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، 2025-2026 ވަނަ މާލީ އަހަރުގެ މިހާތަނަށް 6.73 ޓްރިލިއަން ރުޕީސް ނުވަތަ، 71 ބިލިއަން އެމެރިކާ ޑޮލަރުގެ އަގުހުރި 55 ހުށަހެޅުމަކަށް ހުއްދަ ދީފައިވާ ކަމަށެވެ. މީގެ އިތުރުން، އެއް މާލީ އަހަރެއްގެ ތެރޭގައި ސޮއި ކުރެވުނު އެންމެ ބޮޑު އަދަދު ކަަމަށްވާ، 2.28 ޓްރިލިއަން ރުޕީސް ނުވަތަ، 25 ބިލިއަން އެމެރިކާ ޑޮލަރުގެ ކެޕިޓަލް ޕްރޮކިއުމަންޓް އެއްބަސްވުން ތަކުގައި މިހާރު ވަނީ ސޮއި ކޮށްފަ އެވެ. 

އިންޑިއާގެ ވައިގެ ސިފައިންގެ ޤާބިލުކަން އިތުރު ކުރުމަށް ނިންމާފައިވާ ކަންތައް ތަކުގެ ތެރޭގައި، މިހާރު ބޭނުން ކުރަމުންދާ ބޯދާ އޭއެން-32 އަދި އައިއެލް-76 މަރުކާގެ ބޯޓު ތަކުގެ ބަދަލުގައި ބޭނުން ކުރާނެ މެދު ފަންތީގެ އައު އުދުހޭ ބޯޓުތައް ހޯދުން ހިމެނެ އެވެ. މީގެ އިތުރުން، އިތުރު އެސް-400 އެއާ ޑިފެންސް ސިސްޓަމްތަކާއި، ޑްރޯން ތަކުގެ އިތުރުން، ސުކޯއީ ސޫ-30 މަރުކާގެ ފައިޓާ ޖެޓު ތަކުގެ އިންޖީނުތައް އަޕްގްރޭޑު ކުރުމަށް ވެސް ވަނީ ނިންމައިފަ އެވެ. 

ފަހަކަށް އައިސް އިންޑިއާ އިން އެމެރިކާ އާއި ފްރާންސް އަދި އިޒްރޭލް އިން ގަންނަ ހަތިޔާރުގެ މިންވަރު އިތުރު ކޮށްފައި ވީ ނަމަވެސް، އަލަށް މި ނިންމި އެސް-400 ސިސްޓަމްތަކާއި، ސޫ-30 ޖެޓު ތަކުގެ އަޕްގްރޭޑު ތަކުން ދޭހަ ވަނީ އިންޑިއާގެ ދިފާއީ ދާއިރާގައި ރަޝިޔާ އަކީ އަދި ވެސް މުހިންމު ބައިވެރިއެއްގެ ގޮތުގައި އޮތް ކަމެވެ. މިނިސްޓްރީ އިން ބުނި ގޮތުގައި، އެސް-400 ސިސްޓަމް ތަކަކީ ދުޝްމަނުންގެ ދުރު ރާސްތާގެ ވައިގެ ހަމަލާ ތަކުން ރައްކާތެރި ވުމަށް ބޭނުން ކުރާ ވަސީލަތެއް ކަމަށެވެ. އަދި އަލަށް ހޯދާ ހަތިޔާރު އެޅި ޑްރޯންތައް ބޭނުން ކުރާނީ ހަމަލާ ދިނުމަށާއި، ސާވޭލަންސް ފާރަވެރިވުމުގެ މަސައްކަތްތަކަށް ކަމަށެވެ.