އެމެރިކާގެ ސެކްރެޓަރީ އޮފް ސްޓޭޓް ރޫބިއޯ އިންޑިއާ އަށް ވަޑައިގެންފި

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ހަތަރު ދުވަހުގެ ރަސްމީ ދަތުރުފުޅެއްގައި ހޮނިހިރު އިންޑިއާ އަށް ވަޑައިގެންފި އެވެ.

މިއީ ރޫބިއޯ މި މަގާމާ ހަވާލުވެ ވަޑައިގެންނެވި ފަހުން އިންޑިއާ އަށް ކުރައްވާ ފުރަތަމަ ރަސްމީ ދަތުރުފުޅެވެ. ވިޔަފާރީގެ މައްސަލަތަކާއި، ސަރަހައްދީ ސިޔާސީ އޮއިވަރުގެ ސަބަބުން ފަހަކަށް އައިސް ދެ ގައުމުގެ ގުޅުމަށް އައިސްފައިވާ ހީނަރުކަން ކުޑަކޮށް، ގުޅުން ބަދަހި ކުރުމަށް މި ދަތުރުފުޅަކީ ވަރަށް މުހިންމު ދަތުރުފުޅެއް ކަމަށް ބައިނަލްއަގުވާމީ މާހިރުން ސިފަ ކުރެ އެވެ.

އިންޑިއާގެ ވެރި ރަށް ނިއުދިއްލީގައި ބާއްވާ ރަސްމީ ބައްދަލުވުން ތަކުގެ ކުރިން، ރޫބިއޯ އެންމެ ފުރަތަމަ ވަޑައިގެންނެވީ އިރުމަތީ އިންޑިއާގެ ކޮލްކަތާ އަށެވެ. މިއީ ފާއިތުވި 14 އަހަރުގެ ތެރޭގައި އެމެރިކާގެ ސެކްރެޓަރީ އޮފް ސްޓޭޓްގެ ފެންވަރުގެ ބޭފުޅަކު ކޮލްކަތާ އަށް ވަޑައިގެންނެވި ފުރަތަމަ ފަހަރެވެ. ކޮލްކަތާގެ ހަރަކާތް ތަކަށް ފަހު، ރޫބިއޯ ދެން ވަޑައިގަންނަވާނީ ވެރިރަށް ނިއުދިއްލީ އަށެވެ. ދިއްލީގައި ހޮނިހިރު ދުވެހު އިންޑިއާގެ ބޮޑު ވަޒީރު ނަރެންދުރަ މޯދީއާ ބައްދަލު ކުރެއްވުމުގެ އިތުރުން، އާދީއްތަ ދުވަހު އިންޑިއާގެ އެކްސްޓާނަލް އެފެއާޒް މިނިސްޓަރު ޑޮކްޓަރު ސުބްރަމާނިއަމް ޖަޔަޝަންކަރާ އެކު ދެފަރާތުގެ ރަސްމީ މަޝްވަރާތައް ބާއްވަވާނެ އެވެ.

ދެ ގައުމުގެ ދެމެދުގައި ބާއްވާ ބައިލެޓްރަލް ބައްދަލުވުން ތަކުގައި މައިގަނޑު ގޮތެއްގައި މަޝްވަރާ ކުރާނީ ވިޔަފާރި، ހަކަތައިގެ ރައްކާތެރިކަން އަދި ދިފާއީ ދާއިރާ އިން ގުޅުން ބަދަހިކުރުމާ ބެހޭ ގޮތުންނެވެ. އިންޑިއާ އަށް ވަޑައިގަތުމުގެ ކުރިން ރޫބިއޯ ވިދާޅުވީ، އިންޑިއާ އަކީ އެމެރިކާގެ ވަރަށް މުހިންމު ބައިވެރިއެއް ކަމަށާއި، ހާއްސަކޮށް ދުނިޔޭގެ މަސްރަހު މިހާރު އޮތް ގޮތުން ހަކަތައިގެ ދާއިރާ އިން އިންޑިއާ އާއެކު އޮތް ގުޅުން އިތުރަށް ފުޅާ ކުރަން ބޭނުންވާ ކަމަށެވެ. އެމެރިކާ އިން އިންޑިއާ އަށް ކަނޑަ އަޅާފައި ހުންނަވާ ސަފީރު ސާޖިއޯ ގޯ ވިދާޅުވި ގޮތުގައި، ފާއިތުވި 20 އަހަރު ދެ ގައުމުގެ ވިޔަފާރި ވަނީ 220 ބިލިއަން ޑޮލަރަށް ވުރެ މައްޗަށް ޖެހިލާފަ އެވެ. އަދި 2030 ވަނަ އަހަރާ ހަމައަށް މި އަދަދު 500 ބިލިއަން ޑޮލަރަށް ބޮޑު ކުރުމަށް ދެ ގައުމުން އަމާޒު ހިފާފައިވެ އެވެ.

ރޫބިއޯގެ މި ދަތުރުފުޅުގެ އެންމެ މުހިންމު ހަރަކާތަކަށް ވެގެންދާނީ މެއި 26 ވާ އަންގާރަ ދުވަހު ނިއުދިއްލީގައި ބާއްވާ ކުއަޑް ގައުމު ތަކުގެ ހާރިޖީ ވަޒީރުންގެ ސަމިޓެވެ. މި ސަމިޓުގައި އެމެރިކާ، އިންޑިއާ، އޮސްޓްރޭލިއާ އަދި ޖަޕާނުގެ ހާރިޖީ ވަޒީރުން ބައިވެރިވެ ވަޑައިގެން އިންޑޯ ޕެސިފިކް ސަރަހައްދުގެ މިނިވަންކަމާއި، ކަނޑުގެ ސަރަހައްދު ތަކުގެ ސަލާމަތާ ބެހޭ ގޮތުން ފުޅާ ދާއިރާއެއްގައި މަޝްވަރާ ކުރައްވާނެ އެވެ.

މި ރަސްމީ ބައްދަލުވުން ތަކުގެ އިތުރުން، ސެކްރެޓަރީ ރޫބިއޯ އިންޑިއާގެ ތާރީހީ ރަށްތައް ކަމަށްވާ އާގްރާ އަދި ޖައިޕޫރަށް ކުރު ޒިޔާރަތް ތަކެއް ކުރެއްވުމަށް ވެސް ވަނީ ހަމަޖެހިފަ އެވެ.