އިންޑިއާގައި އެއާ އެމްބިއުލާންސްއެއް ވެއްޓި ހަތް މީހަކު މަރުވެއްޖެ

އިންޑިއާގެ ޖާކަންޑް ސްޓޭޓްގައި ދަތުރު ކުރަމުން ދިޔަ އެއާ އެމްބިއުލާންސްއެއް ވެއްޓި، އޭގައި ތިބި ހަތް މީހުން މަރުވެފައިވާ ކަމަށް ހާމަ ކޮށްފި އެވެ. 

އަންގާރަ ދުވަހު އޮފިޝަލުން ހާމަ ކޮށްފައިވާ ގޮތުގައި މި އެއާ އެމްބިއުލާންސް ވެއްޓިފައި ވަނީ ހޯމަ ދުވަހުގެ ވަގުތެއްގަ އެވެ. އެއާ އެމްބިއުލާންސް ވެއްޓި މަރުވި މީހުންގެ ތެރޭގައި ދެ ކްރޫ މެމްބަރުންނާއި، ބަލި މީހާގެ އިތުރުން، ބަލި މީހާގެ އެހީތެރިން ހިމެނެ އެވެ. 

ރެޑްބާޑް އެއާވޭސް އިން އޮޕަރޭޓް ކުރާ ބީޗްކްރާފްޓް ސީ 90 ފްލައިޓު، ސްޓޭޓްގެ ވެރި ރަށް ރާންޗީން ފުރައިގެން ދިޔައިރު، މޫސުމުގެ ޙާލަތު ފެނި ފްލައިޓުގެ ދަތުުރު ބަދަލު ކުރަން އެދުނު ކަމަށް ޑައިރެކްޓަރޭޓް އޮފް ސިވިލް އޭވިއޭޝަން އިން ހޯމަ ދުވަހު ބުނެފައިވެ އެވެ. އޭގެ ފަހުން އެއާކްރާފްޓްއާ މުއާމަލާތް ކުރެވިފައި ނުވާ ކަމަށާއި، ރާޑަރު މުއާމަލާތް ވެސް ގެއްލިފައިވާ ކަމަށް ރެގިއުލޭޓަރުން ބުނެފައިވެ އެވެ. 

އެ ހާދިސާ ހިނގާފަައި ވަނީ ވަރަށް ބޮޑަށް ވައި ގަދަވަމުން ދިޔަ ވަގުތެއްގަ އެވެ. އެ ހާދިސާ ހިނގި ޗަތުރާ ޑިސްޓްރިކްޓްގެ ޑެޕިއުޓީ ކޮމިޝަނަރު ކީރްތިޝްރީ ޖީ ބުނީ، ހަށިގަނޑުތައް ހޯދައި، ޕޯސްޓްމޯޓަމް ހެދުމަށް ފޮނުވާފައިވާ ކަމަށާއި، އިތުރު ތަހުގީގު މިހާރު ކުރިއަށް ގެންދަމުން އަންނަ ކަމަށެވެ. 

ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި އިންޑިއާގެ އެއާކްރާފްޓް އެކްސިޑެންޓް އިންވެސްޓިގޭޝަން ބިއުރޯ އިން ޓީމެއް ފޮނުވާނެ ކަމަށް ރެގިއުލޭޓަރުން ބުނެފައިވެ އެވެ. މި ދާއިރާގެ ތަޖުރިބާކާރުން ބުނާ ގޮތުގައި، އާންމުކޮށް އެއާކްރާފްޓް ހާދިސާތައް ހިނގަނީ ގިނަ ސަބަބު ތަކެއް ދިމާވެގެންނެވެ. އަދި އެކަމުގެ ތަހުގީގު ނިންމާލުމަށް މަދުވެގެން އަހަރެއްގެ މުއްދަތު ހޭދަވާނެ ކަމަށް ބުނެފައިވެ އެވެ. 

މި ހާދިސާއާ ގުޅިގެން ގިނަ ކަންބޮޑުވުން ތަކެއް އުފެދިފައިވާއިރު، އިންޑިއާގެ އުދުހުމުގެ ސަލާމަތާ ބެހޭ ސުވާލުތައް އަނެއްކާ ވެސް ވަނީ ފެންމަތިވެފަ އެވެ.