ސިޓީ އަށް މޮޅު ނުވެވުމުން، 22 އަހަރަށް ފަހު އާސެނަލް އަށް ލީގު ޗެމްޕިއަންކަން ލިބިއްޖެ

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މެންޗެސްޓަރ ސިޓީ އަށް މޮޅު ނުވެވުމުން، އާސެނަލް އަށް ޕްރިމިއާ ލީގުގެ ޗެންޕިއަންކަން ލިބިއްޖެ އެވެ.

ބޯންމައުތުގެ ދަނޑުގައި އަންގާރަ ދުވަހުގެ ރޭ އެ ޓީމާ ދެކޮޅަށް ނިކުތްއިރު، ލީގު ރޭހުގައި ސިޓީ އަށް އުންމީދެއް އޮތީ އެ މެޗުން މޮޅު ވެގެންނެވެ. ނަމަވެސް، އެ މެޗު 1-1 އިން އެއްވަރު ވެގެން ނިމުމާ އެކު، އާސެނަލް އަށް ވަނީ ލީގުގެ ޗެމްޕިއަންކަން ލިބިފަ އެވެ.

މެޗުގެ ފުރަތަމަ ހާާފުގެ 39 ވަނަ މިނެޓުގައި ބޯންމައުތަށް ލީޑު ނަގައިދިނީ ޖޫނިއާ ކްރޫޕީ އެވެ. މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ސިޓީ އިން ވަރަށް މަސައްކަތް ކުރިއިރު، އެ ޓީމަށް ނަތީޖާ ހަމަހަމަ ކުރެވުނީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. ސިޓީ އަށް މެޗުގެ ނަތީޖާ ހަމަހަމަ ކޮށްދިނީ ނޯވޭގެ ފޯވާޑު އާލިން ހާާލަންޑް އެވެ. 

މެޗު އެއްވަރުވުމާ އެކު، ބާކީ އެއް މެޗު ކުޅެން އޮއްވާ އާސެނަލް އިން ވަނީ ލީގުގެ ޗެމްޕިއަންކަން ހޯދައިފަ އެވެ. ލީގު ތާވަލްގެ އެއް ވަނަ މަގާމުގައި އާސެނަލް އޮތީ 37 މެޗުން 82 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 78 ޕޮއިންޓެވެ.

މިއީ އާސެނަލް އަށް ތާރީޚީ ކާމިޔާބެކެވެ. މީގެ ކުރިން އާސެނަލް އަށް ޕްރިމިއާ ލީގު ކާމިޔާބު ކުރެވުނީ 2004 ވަނަ އަހަރު އެވެ. އެހެންކަމުން މިއީ ފާއިތުވި 22 އަހަރުގެ ތެރޭގައި އާސެނަލް އަށް ޕްރިމިއާ ލީގު ކާމިޔާބު ކުރެވުނު ފުރަތަމަ ފަހަރެވެ. ސިޓީގެ މެޗަށް ފަހު އާސެނަލްގެ ކުޅުންތެރިން ވަނީ އެކަމުގެ އުފާ ވަރަށް ބޮޑަށް ފާޅު ކޮށްފަ އެވެ.

ހަމަ އެހެންމެ، މިއީ އާސެނަލް އަށް އިރުޝާދު ދެމުން އަންނަ މިކޭލް އާޓެޓާގެ އިރުޝާދުގެ ދަށުން ލީގު ކާމިޔާބު ކުރި ފުރަތަމަ ފަަހަރެވެ. އާސެނަލްގެ ކޯޗުކަމާ އާޓެޓާ ހަވާލުވީ 2019 ވަނަ އަހަރު އެވެ. އޭގެ ފަހުން އޭނާގެ އިރުޝާދުގެ ދަށުން އާސެނަލް އިން އެފްއޭ ކަޕެއް ކާމިޔާބު ކުރި އެވެ. އާސެނަލް އިން ޕްރިމިއާ ލީގު ކާމިޔާބު ކޮށްފައިވާއިރު، މި ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ވެސް އެ ޓީމު ކުޅޭނެ އެވެ. ޗެމްޕިއަންސް ލީގުގެ ފައިނަލްގައި އާސެނަލް ނިކުންނާނީ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ.