10 އަހަރަށް ފަހު ގާޑިއޯލާ ސިޓީއާ ދުރަށް، އޭނާ ބުނީ މިއީ ލިބުނު ވަރަށް ބޮޑު ޝަރަފެއް ކަމަށް!
މެޗަށް ފަހު ވާހަކަ ދައްކަމުން ގާޑިއޯލާ ބުނީ، ސިޓީގެ ސަޕޯޓަރުން އޭނާ އަށް ދިން ލޯތްބަކީ ދުވަހަކު ވެސް އުންމީދު ކޮށްގެން ހުރި ކަމެއް ނޫން ކަމަށް. އަދި ވޭތުވެ ދިޔަ 10 އަހަރުގެ އެ ކުލަބުގެ ކޯޗުގެ ގޮތުގައި ހުރުމަކީ އޭނާ އަށް ލިބުނު ވަރަށް ބޮޑު ޝަރަފެއް ކަމަށާއި، އެއީ ބަޔާން ކޮށްދޭން ނޭނގޭ ފަދަ އިޙުސާސެއް ކަމަށް ގާޑިއޯލާ ބުނި.
މެންޗެސްޓަރ ސިޓީ އަށް އިރުޝާދު ދެމުން އައި ޕެޕް ގާޑިއޯލާ. | ރޮއިޓާސް
ކާމިޔާބު 10 އަހަރަށް ފަހު މެންޗެސްޓަރ ސިޓީގެ ކޯޗުކަން ދޫކޮށްލާއިރު، އެ ކުލަބަށް އިރުޝާދު ދިނުމަކީ ޙަޔާތުގައި ލިބުނު ވަރަށް ބޮޑު ޝަރަފެއް ކަމަށް ޕެޕް ގާޑިއޯލާ ބުނެފި އެވެ.
ސިޓީގެ އެއްބަސްވުމުގައި ބާކީ އެއް އަހަރު އޮތް ނަމަވެސް، ގާޑިއޯލާ ނިންމާފައި ވަނީ ސީޒަން ނިމުމުން އެ ކުލަބު ދޫކޮށްލުމަށެވެ. އާދީއްތަ ދުވަހުގެ ރޭ އިއްތިހާދު ސްޓޭޑިއަމްގައި އެސްޓަން ވިލާއާ ދެކޮޅަށް ކުޅުނު މެޗަކީ، ގާޑިއޯލާގެ އިރުޝާދުގެ ދަށުން ސިޓީ އިން ކުޅުނު ފަހު މެޗެވެ. އެ މެޗުގައި 2-1 އިން ސިޓީ ބަލިވި ނަމަވެސް، މެޗަށް ފަހު ސިޓީގެ ސަޕޯޓަރުން ވަނީ ގާޑިއޯލާ އަށް އޮތް ލޯތްބާއި، އިޙުތިރާމް ދައްކުވައި ދީފަ އެވެ.
މެޗަށް ފަހު ވާހަކަ ދައްކަމުން ގާޑިއޯލާ ބުނީ، ސިޓީގެ ސަޕޯޓަރުން އޭނާ އަށް ދިން ލޯތްބަކީ ދުވަހަކު ވެސް އުންމީދު ކޮށްގެން ހުރި ކަމެއް ނޫން ކަމަށެވެ. އަދި ވޭތުވެ ދިޔަ 10 އަހަރު އެ ކުލަބުގެ ކޯޗުގެ ގޮތުގައި ހުރުމަކީ އޭނާ އަށް ލިބުނު ވަރަށް ބޮޑު ޝަރަފެއް ކަމަށާއި، އެއީ ބަޔާން ކޮށްދޭން ނޭނގޭ ފަދަ އިޙުސާސެއް ކަމަށް ގާޑިއޯލާ ބުންޏެވެ. އެ މެޗު ބެލުމަށް އުމުރުން 95 އަހަރުގެ ގާޑިއޯލާގެ ބައްޕަ ވެސް ދަނޑުގައި އިނެވެ،
ގާޑިއޯލާގެ ޝަރަފުގައި ސިޓީ އިން ނިންމާފައި ވަނީ، އިއްތިހާދު ސްޓޭޑިއަމްގެ ނޯތު ސްޓޭންޑަށް އޭނާގެ ނަމުން ނަން ދިނުމަށެވެ. އެކަމަށް އިޝާރާތް ކުރަމުން ގާޑިއޯލާ ބުނީ، އޭނާގެ އާއިލާގެ ނަން އެ ސްޓޭންޑުގައި އޮތުމަކީ އުމުރަށް ލިބޭނެ ފަޚުރެއް ކަމަށާއި، ކުރިއަށް އޮތް ތަނުގައި އޭނަ އެ ސްޓޭންޑުގައި އިނދެގެން ކުޅުންތެރިން "ކޮންޓްރޯލް" ކުރާޏެ ކަމަށެވެ. ގާޑިއޯލާ ބުނީ ސިޓީ އަކީ އޭނާގެ ގެ ކަމަށާއި، ދުނިޔޭގެ ކޮންމެ ތަނަކުން ސިޓީގެ ސަޕޯޓަރަކާ ދިމާވިޔަސް އޭނާއާ ވަހަކަ ދައްކަން އެދޭ ކަމަށެވެ.
ސިޓީ ދޫކޮށްލަން ގާޑިއޯލާ ނިންމާފައިވާއިރު، އޭނާ އަކީ އެ ކުލަބުގެ ތާރީޚުގައި ވެސް އެންމެ ކާމިޔާބު ކޯޗެވެ. ސިޓީ އާއެކު ހޭދަ ކުރި 10 އަހަރުގެ ތެރޭގައި ގާޑިއޯލާ ވަނީ، އެ ކުލަބަށް 20 ތައްޓެއް ހޯދައި ދީފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ހަ ފަހަރު ކާމިޔާބު ކުރުމާާއި، އެފްއޭ ކަޕް ތިން ފަހަރު ކާމިޔާބު ކުރުމާއި، ކަރަބޯ ކަޕް ފަސް އަހަރު ކާމިޔާބު ކުރުމާއި، ޔުއެފާ ޗެމްޕިއަންސް ލީގު ކާމިޔާބު ކުރުމާއި، އެފްއޭ ކޮމިއުނިޓީ ޝީލްޑު ތިން ފަހަރު ކާމިޔާބު ކުރުމާއި، ޔުއެފާ ސުޕަ ކަޕް ކާމިޔާބު ކުރުން އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ.
ގާޑިއޯލާ އަކީ އިނގިރޭސި ލީގުގެ ތާރީޚުގައި ޖެހި ޖެހިގެން ހަތަރު ފަހަރު ލީގު ތަށި ހޯދި ހަމައެކަނި ކޯޗެވެ. 18-2017 ވަނަ އަހަރުގެ ސީޒަންގައި ގާޑިއޯލާ ވަނީ 100 ޕޮއިންޓާ އެކު ލީގު ކާމިޔާބުކޮށް، ރެކޯޑު ޤާއިމު ކޮށްފަ އެވެ.
