އުފާ ފާޅު ކުރަން ސިޓީ އަށް ވަގުތެއް ނެތް: ގާޑިއޯލާ

މެންޗެސްޓަރ ސިޓީ އިން އެފްއޭ ކަޕް ކާމިޔާބު ކުރި ނަމަވެސް، އުފާ ފާޅު ކުރަން އެ ކުލަބަށް ވަގުތު ނެތް ކަމަށް ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ މިފަހަރުގެ އެފްއޭ ކަޕްގެ ފައިނަލްގައި ޗެލްސީ ބަލިކޮށް، ސިޓީ އިން މުބާރާތް ކާމިޔާބު ކުރި މެޗަށް ފަހު ނޫސްވެރިންނާ ވާހަކަ ދައްކަމުންނެވެ. ޗެލްސީ ބަލިކޮށް ސިޓީ އިން ސީޒަންގެ ދެ ވަނަ ތަށި ކާމިޔާބު ކޮށްފައިވާއިރު، އެ ޓީމުން އަންނަނީ އިނގިރޭސި ޕްރިމިއާ ލީގު ރޭހުގައި ވެސް ވާދަ ކުރަމުންނެވެ. 

ގާޑިއޯލާ ބުނީ ސިޓީގެ ފިރިހެން ޓީމާއި އަންހެން ޓީމުގެ ކާމިޔާބީ ފާހަގަ ކުރުމަށް ޕެރޭޑެއް ބާއްވަން ކުލަބުން ބޭނުންވާ ކަމަށެވެ. ސިޓީ އިން އެ ކާމިޔާބީ ފާހަގަ ކުރާނީ އަންނަ ހަފުތާގައި ލީގުގެ ފަހު މެޗުގައި އެސްޓަން ވިލާއާ ދެކޮޅަށް ކުޅުމަށް ފަހު ކަމަށް ގާޑިއޯލާ ބުންޏެވެ. ސަބަބެއްގެ ގޮތުގައި ގާޑިއޯލާ ބުނީ، މިވަގުތު އުފާ ފާޅު ކުރުމަށް ސިޓީ އަށް ވަގުތު ނެތުން ކަމަށެވެ. 

ގާޑިއޯލާ ބުނީ އެފްއޭ ކަޕްގެ ފައިނަލް އަށް ތައްޔާރުވުމަށް ޗެލްސީ އަށް ހަތް ދުވަަސް ލިބުނު ކަމަށެވެ. ނަމަވެސް، ސިޓީ އަށް ލިބުނީ އެންމެ ތިން ދުވަސް ކަމަށް ގާޑިއޯލާ ފާހަގަ ކުރި އެވެ. ގާޑިއޯލާ ބުނީ އެފްއޭ ކަޕްގެ ފައިނަލް ކުޅުމަށް ސިޓީ އިން ހަ ގަޑިއިރުގެ ދަތުރެއް ވެސް ކުރަން ޖެހުނު ކަމަށެވެ. އެފްއޭ ކަޕްގެ ފައިނަލް އަށް ފަހު، އަނެއްކާ ސިޓީ އިން ލީގުގެ މެޗަށް ނިކުންނަން ޖެހޭ ކަމަށް ގާޑިއޯލާ ވަނީ ބުނެފަ އެވެ. 

ގާޑިއޯލާ މިހެން ބުނެފައިވާއިރު، އަންގާރަ ދުވަހުގެ ރޭ ލީގުގައި ސިޓީ އިން ނިކުންނާނީ ރަށުން ބޭރުގައި ބޯންމައުތާ ދެކޮޅަށެވެ. ލީގު ތާވަލްގެ ދެ ވަނަ މަގާމުގައި ސިޓީ އޮތްއިރު، ޕްރިމިއާ ލީގު ކާމިޔާބު ކުރުމުގެ ފުރުސަތު ސިޓީ އަށް އެބަ އޮތެވެ. އެހެންކަމުން ރަށުން ބޭރުގައި ބޯންމައުތާ ދެކޮޅަށް ކުޅޭ މެޗު ސިޓީ އަށް ވަރަށް މުހިންމު ވާނެ އެވެ. ސިޓީ މެޗުގެ ކުރިން، އަމިއްލަ ދަނޑުގައި އާސެނަލް އިން ބާންލީއާ ދެކޮޅަށް ކުޅޭނެ އެވެ. ލީގު ހޯދުމަށް އާސެނަލް އަށް އެ މެޗު ވެސް ވަރަށް މުހިންމު ވާނެ އެވެ.

އެންމެ ފަހުން 2024 ވަނަ އަހަރާއި، 2025 ވަނަ އަހަރުގެ އެފްއޭ ކަޕްގެ ފައިނަލްގައި ސިޓީ އިން ކުޅުނު ނަމަވެސް، އެ ދެ އަހަރު ވަނީ ބަލިވެފަ އެވެ. ގާޑިއޯލާ ބުނީ ޖެހި ޖެހިގެން ދެ އަހަރު ފައިނަލްގައި ބަލިވުމަށް ފަހު، އަނެއްކާ އަލުން ސިޓީ އަށް އެފްއޭ ކަޕް ކާމިޔާބު ކުރެވުމަކީ ބޮޑު ހިތްހަމަ ޖެހުމެއް ކަމަށެވެ. މި ސީޒަންގައި އެފްއޭ ކަޕްގެ އިތުރުން، ސިޓީ އިން ވަނީ ކަރަބޯ ކަޕް ވެސް ކާމިޔާބު ކޮށްފަ އެވެ.