ލިވަޕޫލް އަކީ ޚާއްޞަ ކުލަބެއް، ކޮންމެ ކޯޗަކު ވެސް ގަޔާވާނެ: އިރައޯލާ

ލިވަޕޫލް އަކީ ޚާއްސަ ކުލަބެއް ކަމަށާއި، އެ ކުލަބަކީ ކޮންމެ ކޯޗަކު ވެސް ގަޔާވާނެ ފަދަ ކުލަބެއް ކަމަށް އަންޑޯނީ އިރައޯލާ ބުނެފި އެވެ.

ލިވަޕޫލްގެ ކޯޗުކަމުން އާން ސްލޮޓް ވަކި ކުރުމަށް ފަހު، ލިވަޕޫލް އިން ވަނީ އައު ކޯޗަކަށް އިރައޯލާ ހަމަޖައްސައިފަ އެވެ. ލިވަޕޫލް އާއެކު އިރައޯލާ ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެހެންކަމުން، 2028 ވަނަ އަހަރުގެ ޖޫން މަހުގެ ނިޔަލަށް އިރައޯލާ ލިވަޕޫލް އަށް އިރުޝާދު ދޭނެ އެވެ. 

ލިވަޕޫލްއާ ހަވާލުވުމުގެ ކުރިން އިރައޯލާ އިރުޝާދު ދީފައި ވަނީ ބޯންމައުތަށެވެ. އެ ކުލަބުގައި އިރައޯލާ ކާމިޔާބު މަސައްކަތް ތަކެއް ކޮށްފައިވާއިރު، ނިމުނު ސީޒަން އެ ޓީމުން ނިންމާލީ ލީގު ތާވަލްގެ ހަ ވަނަ މަގާމުގަ އެވެ. ލީގު ތާވަލްގެ ހަ ވަނަ މަގާމުގައި ސީޒަން ނިންމާލައި، ބޯންމައުތުން ވަނީ އެ ކުލަބުގެ ތަރީޚުގައި ފުރަތަމަ ފަހަރަށް ޔޫރަޕުގެ މުބާރާތަކުން ޖާގަ ހޯދައިފަ އެވެ. 

ލިވަޕޫލްއާ ހަވާލުވުމަށް ފަހު ވާހަކަ ދައްކަމުން އިރައޯލާ ބުނީ، ދުނިޔޭގެ އެންމެ ބޮޑު އެއް ކުލަބާ ހަވާލުވުމަކީ އޭނާ އަށް ލިބޭ ވަރަށް ބޮޑު އުފަލެއް ކަމަށެވެ. ލިވަޕޫލް އަކީ އަބަދު ވެސް ވަރަށް ޚާއްސަ ކުލަބެއްގެ ގޮތުގައި ދެކޭ ކަމަށާއި، އެ ކުލަބުގެ ސަޕޯޓަރުންނާއި، ލިވަޕޫލްގައި އޮންނަ މާހައުލަކޯ ކޮންމެ ކޯޗަކު ވެސް ގަޔާވާނެ ކަންތައް ތަކެއް ކަމަށް އިރައޯލާ ފާހަގަ ކުރި އެވެ. 

މީގެ އިތުރުން އިރައޯލާ ބުނީ، ދުނިޔޭގެ ފެންވަރުގައި ފާހަގަ ކޮށްލެވޭ މޮޅެތި ކުޅުންތެރިންނަށް އިރުޝާދު ދީ، ބޮޑެތި ތަށި ތަކަށް ވާދަ ކުރުމުގެ ފުރުސަތު ލިބުމަކީ ކޯޗެއްގެ ޙަޔާތުގައި ލިވޭނެ އެންމެ ބޮޑު ކުރިއެރުން ކަމަށެވެ. އެކަން ފާހަގަކޮށް އިރައޯލާ ބުނީ، އޭނާ ހުރީ ވީ އެންމެ އަވަހަކަށް ލިވަޕޫލްގެ މަސައްކަތް ފެށުމަށް ކެތް މަދުވެފައި ކަމަށެވެ. 

އިތުރަށް ވާހަކަ ދައްކަމުން އިރައޯލާ ބުނީ، ލިވަޕޫލްގެ ވެރިންނާއި ސަޕޯޓަރުން އޭނާގެ ފަރާތުން އުންމީދު ކުރާނީ ކޮން ކަމެއްކަން އިނގޭ ކަމަށެވެ. ލިވަޕޫލް މިހާރު އޮތް ޙާލަތު ވަރަށް ރަނގަޅަށް އިނގޭ ކަމަށާއި، އޭނާ ހުރީ އެކަމަށް ތައްޔާރު ވެގެން ކަމަށް އިރައޯލާ ބުންޏެވެ. އޭނާ ބުނީ މަގާމާ ހަވާލުވާ ގޮތަށް އެއްވެސް ކަމަކަށް ވައުދުވާން ނޭނގޭނެ ކަަމަށާއި، ނަމަވެސް އޭނާގެ އަމާޒަކީ ކުލަބުން ބޭނުންވާ ނަތީޖާ ނެރުން ކަމަށް އިރައޯލާ ބުންޏެވެ. 

ލިވަޕޫލްގެ ކޯޗުކަމުން ސްލޮޓް ވަކި ކުރުމަށް ފަހު، އެ މަގާމަށް އިރައޯލާ ގެންނަން ނިންމީ ކުލަބުގެ ނަތީޖާތައް ދަށްވުމުގެ ސަބަބުންނެވެ. ޚާއްސަކޮށް ނިމުނު ސީޒަންގައި ސްލޮޓްގެ އިރުޝާދުގެ ދަށުން ލިވަޕޫލްގެ ނަތީޖާތައް ވަރަށް ބޮޑަށް ދަށްވީއިރު، އެކަމުގެ ސަބަބުން ސްލޮޓް އަށް އޮތީ ޕްރެޝަރު ވެސް ބޮޑުވެފައި އެވެ.