ލިވަޕޫލް ބަލިކޮށް، ޗެމްޕިއަންސް ޕީއެސްޖީ އުންމީދުގައި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ލިވަޕޫލްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ސެމީ ފައިނަލްގެ ފުރުސަތު ބޮޑު ކޮށްފި އެވެ.

ޕީއެސްޖީގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާާފުގައި ޕީއެސްޖީ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން ޕީއެސްޖީ އިން ވަނީ ރަނގަޅަށް ކުޅެ، ކުރީ ކޮޅު ލީޑު ނަގައިފަ އެވެ. އެގޮތުން މެޗުގެ 11 ވަނަ މިނެޓުގައި ޑިސެއާ ޑޯއޫ ވަނީ ޕީއެސްޖީގެ ލަނޑު ޖަހައި ލީޑު ނަގައިދީފަ އެވެ. އޭގެ ފަހުން ލިވަޕޫލް އިން ކުރިއަށް ޖެހިގެން ލަނޑު ޖަހަން މަސައްކަތް ކުރި ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ.

ޕީއެސްޖީ އިން ދެ ވަނަ ހާފަށް ނިކުމެ، މި ހާފުގައި ވެސް ރަނގަޅަށް ކުޅެފައިވެ އެވެ. އެގޮތުން މެޗުގެ 64 ވަނަ މިނެޓުގައި ޕީއެސްޖީ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެގޮތުން ޔާއޯ ނެވެސް ތަނަވަސްކޮށްދިން ފުރުސަތެއްގައި ޕީއެސްޖީގެ ދެ ވަނަ ލަނޑު ޖަހައިދިނީ ކްވިޗާ ކްވަރެޝްކޭލިއާ އެވެ.

މެޗުން މޮޅުވެ ޕީއެސްޖީ އިން މުބާރާތުގެ ސެމީ ފައިނަލްގެ ފުރުސަތު ބޮޑު ކޮށްފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގު އޮތީ ލިވަޕޫލްގެ ދަނޑުގަ އެވެ. މުބާރާތުގެ ސެމީ ފައިނަލްގެ ފުރުސަތު ލިވަޕޫލް އަށް އޮތީ އެ މެޗުން މޮޅުވެގެންނެވެ.