ލިވަޕޫލްގެ ކޯޗުކަމުން ސްލޮޓް ވަކި ކޮށްފި

ލިވަޕޫލް އަށް އިރުޝާދު ދެމުން އައި ނެދަލެންޑްސްގެ އާން ސްލޮޓް، އެ ޓީމުގެ ކޯޗު ކަމުން ކުއްލި ގޮތަކަށް ވަކި ކޮށްފި އެވެ. 

އުމުރުން 47 އަހަރުގެ ސްލޮޓް، ލިވަޕޫލްގެ ކޯޗުކަމާ ހަވާލުވީ 2024 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި އޮތީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އެއްބަސްވުމުގައި ބާކީ އަހަރެއް އޮއްވާ ލިވަޕޫލް އިން ސްލޮޓް ވަކި ކޮށްފައި ވަނީ، ނިމުނު ސީޒަންގައި އެ ޓީމުގެ ނަތީޖާތަށް ދަށްވެފައި ވަނިކޮށެވެ.

ލިވަޕޫލްގެ ކޯޗުކަމުން ސްލޮޓް ވަކި ކުރަން ނިންމައި، އެ ކުލަބުން ނެރުނު ބަޔާނެއްގައި ވަނީ ސްލޮޓް ކޮށްދީފައިވާ ޚިދުމަތް ތަކަށް ޝުކުރު އަދާ ކޮށްފަ އެވެ. ސްލޮޓްގެ އިރުޝާދުގެ ދަށުން ލިވަޕޫލް އިން ޖުމުލަ 113 މެޗު ކުޅެފައިވާއިރު، އޭގެ ތެރެއިން މޮޅުވެފައި ވަނީ 66 މެޗުންނެވެ. 19 މެޗު އެއްވަރުވެފައިވާއިރު، 28 މެޗަކުން ވަނީ ބަލިވެފަ އެވެ. އޭނާ ހަވާލުވި ފުރަތަމަ ސީޒަންގައި ލިވަޕޫލް އިން ވަނީ އިނގިރޭސި ޕްރިމިއާ ލީގު ވެސް ކާމިޔާބު ކޮށްފަ އެވެ.

ނަމަވެސް، ދެ ވަނަ ސީޒަންގައި ސްލޮޓާ އެކު ލިވަޕޫލް ކުރީ ރަނގަޅު ދަތުރެއް ނޫނެވެ. އެ ޓީމުގެ ނަތީޖާތައް އިންތިހާ އަށް ދަށްވެފައިވާއިރު، އަންނަ ސީޒަންގެ ޔުއެފާ ޗެމްޕިއަންސް ލީގުގެ ޖާގައެއް ވެސް ލިބުނީ ލީގު ތާވަލްގެ ފަސް ވަނައިގައި އޮވެގެންނެވެ. ސްލޮޓްގެ އިރުޝާދުގެ ދަށުން މިދިޔަ ސީޒަންގެ ހުރިހާ މުބާރާތެއްގައި ލިވަޕޫލް 20 މެޗުން ބަލިވެފައިވާއިރު، އެއީ އެ ޓީމަށް ލަދުވެތި ނަތީޖާ އެކެވެ.

ލިވަޕޫލް އިން ސްލޮޓް ވަކި ކޮށްފައިވާއިރު، އެ ޓީމުން ދެން ގެންނަން މަސައްކަތް ކުރަނީ އަންޑޯނީ އިރައޯލާ ކަމަށް ރިޕޯޓުތައް ބުނެ އެވެ. އޭނާ އެންމެ ފަހުން އިރުޝާދު ދިނީ ބޯންމައުތަށެވެ. އޭގެ ކުރިން އޭނާ ވަނީ ސްޕެއިންގެ ރަޔޯ ވަޔެކާނޯ އަށް ވެސް އިރުޝާދު ދީފަ އެވެ.