ލިވަޕޫލްގެ މައްޗަށް ކުރި ހޯދައި، ޔުނައިޓެޑުން ޗެމްޕިއަންސް ލީގުގެ ޖާގަ ކަށަވަރު ކޮށްފި

އިނގިރޭސި ޕްރިމިއާ ލީގުގައި ލިވަޕޫލްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން އަންނަ ސީޒަންގެ ޔުއެފާ ޗެމްޕިއަންސް ލީގުގެ ޖާގައެއް ކަށަވަރު ކޮށްފި އެވެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ޔުނައިޓެޑުން ދެ ލަނޑު ޖަހައިގެން ލީޑު ހޯދާފައި ވަނިކޮށް، ލިވަޕޫލް އިން ފަހަތުން އަރައި ނަތީޖާ ހަމަހަމަ ވެސް ކުރި އެވެ. ނަމަވެސް، ޔުނައިޓެޑުން ވަނީ ތިން ވަނަ ލަނޑެއް ޖަހައިގެން މެޗުން މޮޅުވެފަ އެވެ.

މެޗު ފަށައިގެން ހަ ވަނަ މިނެޓުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޔުނައިޓެޑަށް ޖަހައިދިނީ މަތެއުސް ކުންހާ އެވެ. އޭގެ ފަހުން މެޗުގެ 14 ވަނަ މިނެޓުގައި ބެންޖަމިން ސެސްކޯ ވަނީ ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއާ އެކު، ޔުނައިޓެޑުން ފުރަތަމަ ހާފު ނިންމާލީ ދެ ލަނޑުގެ ލީޑަކުންނެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ޑޮމިނިކް ސޮބޮސްލާއީ ވަނީ ލިވަޕޫލްގެ ފުރަތަމަ ލަނޑު ޖަހައި ފަރަގު ކުޑަ ކޮށްދީފަ އެވެ. އޭގެ ނުވަ މިނެޓު ފަހުން ލިވަޕޫލްގެ ދެ ވަނަ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދިނީ ކޯޑީ ގަކްޕޯ އެވެ. އެއީ ސޮބޮސްލާއީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުން ޔުނައިޓެޑު މޮޅުވެފައި ވަނީ 77 ވަނަ މިނެޓުގައި ކޮބީ މައިނޫ ޖެހި ލަނޑުންނެވެ.

މެޗުން މޮޅުވެ ޔުނައިޓެޑުން މި ވަނީ ދެ ސީޒަނަށް ފަހު ޔުއެފާ ޗެމްޕިއަންސް ލީގުގެ ޖާގަ ހޯދައިފަ އެވެ. ލީގުގައި މިހާތަނަށް ކުޅެފައިވާ 35 މެޗުން 64 ޕޮއިންޓާ އެކު ޔުނައިޓެޑު އޮތީ ތިން ވަނައިގަ އެވެ. ޔުނައިޓެޑުގެ ނަތީޖާތައް އިންތިހާ އަށް ދަށްވެފައިވާއިރު، ޔުނައިޓެޑުގެ ކޯޗުކަމާ މައިކަލް ކެރިކް ހަވާލުވެ އަންނަނީ ރަނގަޅު ނަތީޖާ ތަކެއް ނެރެމުންނެވެ.