މަރާ ދޭތެރޭގައި އަބަދުވެސް ވިސްނަން ޖެހޭ، އެއީ ދުނިޔޭގެ ލައްޒަތާއި ކެހިވެރިކަމާއި ޣާފިލުކަމުން ހޭލައްވައިލާ ކަމެއް: ޚުތުބާ

މަރާ ދޭތެރޭގައި އަބަދުވެސް ވިސްނަން ޖެހޭ ކަމަށާއި، އެއީ ދުނިޔޭގެ ލައްޒަތާއި ކެހިވެރިކަމާއި ޣާފިލުކަމުން ހޭލައްވައިލާ ކަމެއް ކަމަށް ހުކުރު ޚުތުބާގައި ބުނެފި އެވެ. 

''މަރު'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، މަރަކީ ކޮންމެ އިންސާނަކާ ވެސް ކުރިމަލާންޖެހޭނެ ހަގީގަތެއް ކަމަށާއި، މި ހަގީގަތާ މެދު އެއްވެސް މީހަކު ޚިޔާލުތަފާތުވެފައިނުވާ ކަމަށެވެ. އެހެންވެ، މަރަށް الله سبحانه وتعالى ނަންދެއްވައިފައިވަނީ ޔަގީނުގެ ނަމުންކަން ފާހަގަކޮށްފައިވެ އެވެ. 

މަރަކީ ދިރިއުޅުމުގެ ހަޔާތުގައި ކުރިމަތިލާން ޖެހޭ އެންމެ ބޮޑު ހަގީގަތްކަން ފާހަގަކޮށް ޚުތުބާގައި ބުނީ، މި ހަޔާތުގައި ބޭނުންވުމުން ލޯމަރާލާފައި ބޭނުންވުމުން ލޯ ހުޅުވާލުމަކީ ވަރަށް ފަސޭހަ ކަމެއް ކަމަށާއި، ނަމަވެސް ދުނިޔޭގައި އެއްކުރި މުދަލާއި، ލޯބިވާ އަނބިދަރީންނާއި، ގެދޮރާއި، ބިނާކޮށްފައިވާ ވިޔަފާރި އާއި، މި ދުނިޔޭގެ ޒީނަތުގައި ހޭދަކުރަމުން ދިޔަ އުފާވެރި ދުވަސްތައް ދޫކޮށް، ތިބާ ދުނިޔެއިން ވަކިވާން ޖެހޭ ކަމަށެވެ. އަދި އެ ވަގުތަކީ އާދައިގެ ވަގުތެއް ނޫންކަން ޚުތުބާގައި ހަނދާން ކޮށްދީފައިވެ އެވެ. 

ޚުތުބާގައި ބުނީ މަރަކީ ދުނިޔޭގެ ލައްޒަތާއި ކެހިވެރިކަމާއި ޣާފިލުކަމުން ހޭލައްވައިލާ ކަމެއް ކަމަށާއި، މަރާ ދޭތެރޭގައި ވިސްނައި މަރު މަތީން ހަނދާން ކުރަން ޖެހޭ ކަމަށެވެ. އަދި މަރުމަތިން އަބަދުވެސް ހަނދާން ކުރުމަށް ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ އިރުޝާދު ދެއްވާފައިވާކަން ފާހަގަކޮށް ޚުތުބާގައި ބުނީ މަރުން ރެކިގަނެވޭނޭ ހަމަ އެކަކު ވެސް ނުވާ ކަމަށާއި، އެއީ ކިތަންމެ އާރާއި ބާރެއްގެ ވެރިއެއްކަމުގައި ވިޔަސް، އޭނާ ގެ ގާތަށް މަރު އަންނާނެ ކަމަށެވެ.

އެއީ ތިބާ ދެކެ ލޯބިވާ ދަރީން ތިބާއަށް މާޔޫސްކަމާ އެކު ބަލަމުންދާ ވަގުތެވެ. ލޯބިވާ އަނބިމީހާ ނުވަތަ ފިރިމީހާ ހިތާމަކުރަމުންދާ ވަގުތެވެ. މައިންބަފައިންގެ ލޯތައް ތެމި ކަރުނަ އަޅަމުންދާ ވަގުތެވެ. ތިމާގެމީހުން ތިބާއަށް ޓަކައި، އަވަސް ޝިފާއަކަށް އެދި ދުޢާކުރާ ވަގުތެވެ. އެކުވެރީން ތިބާގެ ގައިގައި ފިރުމަމުންދާ ވަގުތެވެ. ސިއްހީ އެންމެހައި ވަސީލަތްތައް މެދުވެރިކޮށް ތިބާގެ ފުރާނަ ސަލާމަތްކުރުމަށް ޓަކައި މަސައްކަތްކުރެވެމުންދާ ވަގުތެވެ. ނަމަވެސް ތިބާގެ ނޭވާ ކުރުވެ، އަބަދުގެއަބަދަށް މި ދުނިޔެ ދޫކޮށް ދާން ޖެހޭ ވަގުތަކީ ކޮންމެ އިންސާނަކާ ބައްދަލުކުރާނޭ އެންމެ ވޭނާއި ތުރާ ލިބޭނޭ ވަގުތެވެ. މާތް ﷲ ވަޙީކުރައްވައިފައި ވާ އާޔަތުގެ މާނާގައި ވަނީ "އަދި މަރުގެ ސަކަރާތް ޙައްޤު ގޮތުގައި އަންނަ ހުށްޓެވެ. އެއީ ތިބާ އެޔަށް ފިލާން އުޅޭ ކަމުގައިވީ މަރެވެ.

ހުކުރު ޚުތުބާ 

ޚުތުބާގައި ވަނީ މަރާ ކުރިމަތިލާން ޖެހޭނޭކަން ދަނެ، މަރަށް ތައްޔާރުވުމަށް ގޮވާލާފަ އެވެ. އަދި ހެޔޮ އަމަލުތައް ގިނަކޮށް، ނުބައި ކަންކަމުން ދުރުވެ، ގިނަގިނައިން މަރު ހަނދާން ކުރުމަށް ނަސޭހަތްތެރިވެފައިވެ އެވެ.