ނިއުމަތްތަކުގެ ތެރެއިން އިންސާނާ އެންމެ އަވަހަށް ހަނދާންނެތޭ، އަގު ވަޒަން ނުކުރާ އެއް ނިއުމަތަކީ ވަގުތު: ޚުތުބާ

މާތް الله އިންސާނާއަށް ދެއްވާފައިވާ ގިނަގުނަ ނިއުމަތްތަކުގެ ތެރެއިން، ވަގުތުގެ ނިއުމަތަކީ އިންސާނާ އެންމެ އަވަހަށް ހަނދާންނެތޭ އަދި އޭގެ އަގު ވަޒަންނުކުރާ އެއް ނިއުމަތް ކަމަށް ހުކުރު ޚުތުބާގައި ބުނެފި އެވެ.

"ވަގުތުގެ ބޭނުން ހެޔޮ ގޮތުގައި ހިފުން" މި މައުޟޫއަށް ރާއްޖޭގެ އެކިކި ކަންކޮޅުތަކުގައި އިއްވި ޚުތުބާގައި ވަނީ، ވަގުތަކީ އަނބުރާ ލިބޭނޭ އެއްޗެއް ނޫންކަން ފާހަގަކޮށް، ޣާފިލުކަމުގެ ނިދިން ހޭލައި ހެޔޮ އަމަލުތައް ކުރުމަށް ގޮވާލާފަ އެވެ.

ކީރިތި ރަސޫލާގެ ހަދީޘްފުޅެއްގައިވާ ފަދައިން ގިނަ ބަޔަކު ފަރުވާކުޑަކުރާ ދެ ނިއުމަތަކީ ސިއްހަތާއި ހުސް ވަގުތުކަން ފާހަގަކޮށް ޚުތުބާގައި ބުނީ، ހަޔާތުގެ ހުޅުކޮޅު ނިވުމުގެ ކުރީން އަމިއްލަ ނަފުސު މުރާޖައާކުރާން އަވަސްވެގަންނަން ޖެހޭ ކަމަށާއި، މާތް اللهއަށް ނިޔަތް ޚާލިސްކޮށް ކިޔަމަންތެރިވުމުގައި ހޭދަކުރަނީ ކިހައި ވަގުތެއްތޯ ހިސާބުކުރާން ޖެހޭ ކަމަށެވެ. އަދި މާތް اللهއަށް އުރެދުމުގައި، ހަޔާތުން ހޭދަކުރެވެނީ ކިހައި ވަގުތެއްތޯ ވެސް ދެނެގަންނާން ޖެހޭ ކަމަށް ޚުތުބާގައި ބުނެފައިވެ އެވެ. 

ކީރިތި މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَގެ ޙަދީޘްކުރައްވައިފައިވާ ބަސްފުޅެއްގެ މާނައިގައި ވެ އެވެ. "ގިނަ ބަޔަކު އޭގެ އަގު ވަޒަން ނުކުރާ އަދި އެއަށް ފަރުވާ ކުޑަކުރާ، ދެ ނިޢުމަތެއް ވެ އެވެ. އެއީ ސިއްހަތާއި ހުސް ވަގުތެވެ." އެހެންކަމުން އިސްލާމްދީނުގައި ވަގުތަށް ދީފައިވާ މުހިންމުކަން ވަރަށް ބޮޑެވެ. ދުވާލާއި ރޭގަނޑުގެ މުހިންމު ވަގުތުތައް ގަންދެއްވައި الله تَعَالَى ހުވައި ވަޙީކުރައްވައިފައިވުމުން އެ ކަން ވަރަށް ރަނގަޅަށް ހާމަވެ އެވެ. الله تَعَالَى އެއްޗެއް ގަންދެއްވައި ބަސް ވަޙީކުރައްވާނީ އެކަނލާގެ ޙަޟުރަތުގައި އޭގެ މުހިންމުކަން ބަޔާންކޮށްދެއްވުމަށް ޓަކައެވެ. މި ކަމުން އެނގި ކަށަވަރުވަނީ الله تَعَالَى ވަގުތަށް ދެއްވައިފައިވާ މަތިވެރި ދަރަޖަ ވެ. 

މީގެ އިތުރުން ވަގުތު ބޭކާރު ކުރުމުގެ ސަބަބުން އިންސާނާ އިންތިހާއަށް ހިތާމަކުރާނެ ދެ ހާލަތެއް ކީރިތި ގުރްއާނުގެ އާޔަތްތަކުން ޚުތުބާގައި ބަޔާންކޮށްދީފައިވެ އެވެ.

އެއީ މަރު އައިސް ބައްދަލުކުރާ ހިނދާއި، ގިޔާމަތް ދުވަހު ނަރަކައިގެ އަޒާބަށް ހުށަހެޅޭ ވަގުތުކަން ފާހަގަކޮށް ޚުތުބާގައި ބުނީ، އެ ދެ ހާލަތުގައިވެސް ހެޔޮ އަމަލު ކުރުމަށް ދުނިޔެއަށް އެނބުރި ދިއުމަށް އިންސާނާ އެދޭނެ ކަމަށާއި، ނަމަވެސް އަޖަލު ހަމަވުމުން އެއްވެސް މީހަކަށް އެ ފުރުސަތު ދެން ނުލިބޭނެ ކަމަށެވެ. 

ޚުތުބާ ނިންމާލަމުން ވަނީ ގެއްލިއްޖެ ވަގުތަކީ އަނބުރާ ލިބޭނޭ އެއްޗެއް ނޫން ކަމާއި، ތިބާއަށް الله ދެއްވި އުމުރުގެ ދުވަސްތައް ހެޔޮގޮތުގައި ހޭދަކޮށް، ހުރިހާ ދާއިރާއެއްގެ މީހުންވެސް ވަގުތަށް އަމާނާތްތެރިވުމަށް އިލްތިމާސްކޮށްފަ އެވެ.

އެގޮތުން މަސައްކަތްތެރިން ވަޒީފާގެ ޒިންމާތަކަށް ރައްކާތެރިވުމަށާއި، ދަރިވަރުން ފިލާވަޅުތައް ފަހަށް ނުބަހައްޓައި ތައުލީމީ ހަޔާތުގެ ބޭނުން ހެޔޮގޮތުގައި ހިފުމަށް ގޮވާލި އެވެ. ޒައްރެއްގެ މިންވަރުގެ ހެޔޮ އަމަލެއް ނުވަތަ ނުބައި އަމަލެއް ކުރި ނަމަވެސް ގިޔާމަތް ދުވަހުން އެކަމުގެ ޖަޒާ ފެންނާނެތީ، ހަޔާތުގެ އެންމެ ސިކުންތެއް ވެސް ފައިދާއެއް ނެތް ގޮތުގައި ހޭދަނުކުރުމަށް ޚުތުބާގައި ވަނީ ނަސޭހަތްތެރިވެފަ އެވެ.