ސެލޫންތަކަށް ގޮސް ހިލޭ މީހުންނަށް ޢައުރަ ކަޝްފުކޮށްގެން ވެކްސްކުރުން ފަދަ ކަންކަން ކުރުން ހުއްދައެއް ނުވާނެ: ޚުތުބާ
ސާފުތާހިރުކަމާއި ޒީނަތްތެރިވުމުގައި އިސްލާމީ އިންތަކުގެ ތެރޭގައި ހުރުމަށް މިއަދުގެ ހުކުރު ޚުތުބާގައި ވަނީ ނަސޭހަތްތެރިވެފައި. އެގޮތުން ރީތިވުމުގެ ނަމުގައި ހިލޭ މީހުންގެ ކުރިމަތީގައި އައުރަ ކަޝްފުކުރުމާއި، ޓެޓޫ ޖެހުމާއި، ބުމަ ހެދުން ފަދަ ދީނީ ގޮތުން މަނާކަންކަމުން ދުރުހެލިވުމަށް ޚުތުބާގައި ގޮވާލާފައިވޭ. މީގެ އިތުރުން، ހަށިގަނޑުގެ ވަނާތައް ހާމަވާ ފަދަ ބާރު ހެދުން އެޅުމުގެ ބަދަލުގައި، ފޭރާމާއި ހަށިގަނޑުގެ ސާފުތާހިރުކަމަށް އިސްކަންދީގެން އިސްލާމީ އަދަބުތަކާ އެއްގޮތަށް ޒީނަތްތެރިވުމަށް ޚުތުބާގައި ބާރުއަޅާފައިވޭ.
ހުކުރު ޚުތުބާ އަޑު އަހަނީ. | އިސްލާމިކް މިނިސްޓްރީ
މިއަދުގެ ޒަމާނީ ވަސީލަތްތަކާއެކު ސާފުތާހިރުވުމުގެ ނަމުގައި ބައެއް ފަހަރު ދީނީ އިންތަކުން ބޭރުވާ ކަމަށާއި، ސެލޫންތަކަށް ގޮސް ހިލޭ މީހުންނަށް ޢައުރަ ކަޝްފުކޮށްގެން ވެކްސްކުރުން ފަދަ ކަންކަން ކުރުން ހުއްދައެއް ނުވާނެ ކަމަށް ހުކުރު ޚުތުބާގައި ބުނެފި އެވެ.
''ސާފުތާހިރުކަމާއި ޒީނަތްތެރިކަން'' މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ، އިސްލާމް ދީނަކީ ސާފުތާހިރުކަމުގެ ދީން ކަމަށާއި، އެހެނިހެން ދީންތަކާއި، ޙަޟާރަތްތަކުގައި، އިންސާނާގެ ރީތިކަން އާންމު ގޮތެއްގައި މިންކުރަނީ ހަމައެކަނި ބޭރުފުށުގެ ޒީނަތަށް ކަމަށެވެ.
ހަގީގީ ތާހިރުކަން ހިތުގެ ތާހިރުކަމާ ނުލައި ފުރިހަމަ ނުވާނެކަން ފާހަގަކޮށް ޚުތުބާގައި ބުނީ، ޝިރުކާއި، ހަސަދައާއި، ޝައްކުތަކުން ހިތް ސާފުނުކޮށް، ހަމައެކަނި ބޭރުފުށް ރީތިކުރުމަކީ، ގަނޑުވަރެއްގެ ބޭރު ޒީނަތްތެރިކޮށްފައި އޭގެ އެތެރެ ގޮނޑަކަށް ހެދުން ފަދަ ކަމެއް ކަމަށެވެ. އަދި މާތްﷲ އިންސާނާ އުފައްދަވައިފައިވަނީ ފިތުރަތުގެ ސާފުކަންމަތީގެ ކަމާއި މި ސާފުކަން ދެމެހެއްޓުމަށް ޓަކައި، މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ އުގަންނަވައިދެއްވި "ފިޠުރަތުގެ ސުންނަތްތައް" އަމަލު ކުރުމަށް ޚުތުބާގައި ނަސޭހަތްތެރިވެފައިވެ އެވެ.
ނަމަވެސް މިއަދުގެ ޒަމާނީ ވަސީލަތްތަކާއެކު، ސާފުތާހިރުވުމުގެ ނަމުގައި ބައެއް ފަހަރު ދީނީ އިންތަކުން ބޭރުވާ ކަމަށް ޚުތުބާގައި ބުނެފައިވެ އެވެ.
އެގޮތުން ސެލޫންތަކަށް ގޮސް "ވެކްސް" ކުރުމަށް ނުވަތަ "ލޭޒާ ޓުރީޓްމެންޓު" ހެދުމަށް ޓަކައި، ތިމާއަށް ހުއްދަ ނޫން މީހުންގެ ކުރިމަތީގައި ޢައުރަ ކަޝްފުކުރާ ކަމަށާއި، މިއީ ދީނީ ގޮތުން ހުއްދަކަމެއް ނޫން ކަމަށް ޚުތުބާގައި ބުނެފައިވެ އެވެ. އަދި ސިއްހީ ފަރުވާއެއް ފަދަ ޒަރޫރީ ހާލަތެއްގައި މެނުވީ މިކަން ހުއްދައެއް ނުވާނެ ކަމަށާއި، ރީތިކަމާއި ސާފުތާހިރުކަން ހޯދާންވާނީ ހަރާމް މަގުތަކުން އެއްކިބާވެ ތިބެގެން ކަމަށް ޚުތުބާގައި ބުނެފައިވެ އެވެ.
ޚުތުބާގައި ބުނީ ޓެޓޫ ޖެހުމާއި ބުމަ ހެދުން ނުވަތަ ބުމައިގެ އިސްތަށި އުފުރައި، ބުމަ ތުނިކުރުމާއި ހަށިގަނޑުގެ ސިފަ ބަދަލުކުރުން ފަދަ ކަންކަން ކުރުމަކީ ﷲގެ ލައުނަތް ހުރި ކަންކަން ކަމަށެވެ.
މީގެ އިތުރުން ޚުތުބާގައި ބުނީ އާދަމުގެ ދަރިޔާއަށް އުނދަގޫވާ ކޮންމެ ކަމަކުން މަލާއިކަތުންނަށް ވެސް އުނދަގޫފުޅު ވާ ކަމަށާއި، ތިމާގެ ހަށިގަނޑާއި ފޭރާމުން ދުވާ ވަހަށް ސަމާލުވާން ޖެހޭ ކަމަށެވެ.
މާތް ނަބިއްޔާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (مَنْ أَكَلَ الْبَصَلَ وَالثُّوْمَ وَالْكُرَّاثَ فَلَا يَقْرَبَنَّ مَسْجِدَنَا، فَإِنَّ الْمَلاَئِكَةَ تَتَأَذَّى مِمَّا يَتَأَذَّى مِنْهُ بَنُوْ آدَمَ) މާނައީ: "(ނަމާދު ވަގުތާ ކައިރިކޮށް) އެއްވެސް މީހަކު ފިޔާއާއި ލޮނުމެދާއި ލީކުސް ކައިގެން، ތިމަންމެންގެ މިސްކިތްތަކާ ކައިރިނުވާހުށިކަމެވެ. (އެބަހީ: ނަމާދުގެ ޖަމާޢަތަށް ނާންނާށެވެ!) ފަހެ، ހަމަކަށަވަރުން، އާދަމުގެ ދަރީންނަށް އެ ކަމަކުން އުނދަގޫވާ ކަންތައްތަކުން މަލާއިކަތުންނަށް ވެސް އުނދަގޫފުޅު ވެ އެވެ." އެހެންކަމުން ދުންފަތުގެ އިސްތިއުމާލުކޮށްގެން، ނުވަތަ ގައިން ދާވަސް ދުވާ ޙާލުގައި ނުވަތަ އަނގައިން ނުބައިވަސް ދުވާ ޙާލުގައި، މިސްކިތުގެ ޖަމާޢަތަށާއި މީސްތަކުން އެއްވެ ތިބޭ ތަންތަނަށްދާ އިރު އެ ވަސްތައް ކަނޑުވައިގެން މެނުވީ އެ ފަދަ ތަންތަނަށް ނުދާށެވެ! އެއީ އެހެން މީހުންނަށް ކުރެވޭ އުނދަގުލެކެވެ!ހުކުރު ޚުތުބާ
އިސްލާމްދީނަކީ ރީތިކަމަށް ލޯބިކުރާ އަދި ޒީނަތްތެރިވުމަށް ހިތްވަރުދޭ ދީންކަން ފާހަގަކޮށް ޚުތުބާގައި ބުނީ، ބައެއް ފަހަރު ނޭނގުމުގެ ތެރެއިން ހެދުން އެޅުމުގައި ބޮޑެތި ކުށްތަކަށް އަރައިގަނެވޭ މަންޒަރު މުޖުތަމައުއިން ފެންނަ ކަމަށެވެ.
އެގޮތުން ބުރުގާ އަޅައިގެން ތިބޭ އިރު، ކަންފަތުގައިލާ މުދި ނުވަތަ ކަރުގައި އަޅާ ފަށް ފެންނަގޮތަށް ބުރުގާ އެޅުމާއި، ބޮލުގައި ފޮތިކޮޅެއް އޮޅައިލައިގެން ކަނދުރާ ފެންނަގޮތަށް ހެދުން އަޅައިގެން އުޅޭ ކަމަށެވެ. އަދި ހަށިގަނޑުގެ ވަނާތައް އެނގޭ ގޮތަށް ގަޔަށްބާރު ހެދުން ލައި، ހިލޭ ފިރިހެނުންގެ ލޮލުގައި އަޅައިގަންނަ ފަދަ ގޮތްގޮތަށް ޒިނަތްތެރިވާ ކަމަށެވެ. މިއީ އިހުގެ ޖާހިލީ ޒަމާނުގެ އާދައެއް ކަމަށާއި، ހިޖާބުގެ އަސްލު މަގުސަދު ވެސް ގެއްލޭ ކަމެއް ކަމަށް ޚުތުބާގައި ބުނެފައިވެ އެވެ.
މީގެ އިތުރުން ފިރިހެނުން ވެސް ކުޅިވަރުގެ މައިދާނުގައި ވިޔަސް ޢައުރަ ހާމަނުކުރުމަށް ޚުތުބާގައި ހަނދާން ކޮށްދީފަވެ އެވެ. ޢައުރަ ނިވައިނުވާވަރުގެ ފޭރާން ލައިގެން އުޅުމަކީ މުސްލިމުންގެ ކަމެއް ނޫން ކަމަށް ޚުތުބާގައި ބުނެފައިވެ އެވެ.
ޚުތުބާގައި ވަނީ ޒީނަތްތެރިވުމުގެ ނަމުގައި ބައެއް ފަހަރު ކަންކަމަށް އަރައިގަނެވެނީ އެ ކަމުގެ ހުކުމް ނޭނގިގެން ނުވަތަ ފަރުވާކުޑަވެގެން ކަމަށް ވެދާނެތީ ހަރުކަށިކަމާއި ރުޅިވެރިކަން ދޫކޮށް، ލޯތްބާއި ކުލުނާއި ހިކުމަތްތެރިކަމާ ނަސޭހަތްތެރިވުމަށް ގޮވާލާފަ އެވެ.
