ހުރުމަތްތެރިވެގެންވާ މައްސަރުތަކުގައި ކުރެވޭ ފާފަތަކުގެ ނުބައިކަން ވަރަށްވެސް ބޮޑު، ފާފަވެރި އަމަލުތަކުން އަމިއްލަ ނަފްސަށް އަނިޔާވެރިނުވޭ: ޚުތުބާ

ފާފަވެރި އަމަލުތައް ކުރުމަކީ އަމިއްލަ ނަފްސަށް އަނިޔާވެރިވުން ކަމަށާއި، ހުރުމަތްތެރިވެގެންވާ މައްސަރުތަކުގައި ކުރެވޭ ފާފަތަކުގެ ނުބައިކަން ވަރަށްވެސް ބޮޑު ކަމަށް ހުކުރު ޚުތުބާގައި ބުނެފި އެވެ. 

'' ހުރުމަތްތެރިވެގެންވާ މައްސަރުތައް '' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ މާތްﷲ ގެ ހިކުމަތްވަންތަކަމާއި ރަހުމަތްވަންތަކަމުން، ބައެއް ވަގުތަތުތަކާއި މައްސަރުތައް ޚާއްސަކުރައްވައި މާތް ކުރައްވައިފައިވާކަން ފާހަގަކޮށްފަ އެވެ. 

ޚުތުބާގައި ބުނީ އަމިއްލަ ނަފުސަށް އަނިޔާވެރިވުމަކީ، މާތް ﷲ ހަރާމް ކުރައްވައިފައިވާ ކަންކަމަށް އަރައިގަނެ ފާފަވެރި އަމަލުތައް ކުރުން ކަމަށެވެ. ކޮންމެ ޒަމާނެއްގައި ވެސް އަދި ކޮންމެ ވަގުތެއްގައި ވެސް މި ފަދަ ކަމަކަށް އަރައިގަތުމަކީ މާތް ﷲގެ ކޯފާ ހައްގުވާނެ ކަމަށް ބަޔާން ކޮށްފައިވެ އެވެ. އަދި ވަކީން ޚާއްސަކޮށް ހުރުމަތްތެރި ވެގެންވާ މައްސަރެއްގައި މި ފަދަ ކަމަކަށް އަރައިގަތުމުގެ ނުބައިކަން ބޮޑުވެގެންވާ ކަމަށާއި، އެއީ އެ ފަދަ އަމަލަކީ، މާތް ﷲއަށް އުރެދުމާ އެކު، އެކަލާނގެ ޚާއްސަ ކުރައްވައި މަތިވެރިކުރައްވައި ހުރުމަތްތެރި ކުރައްވައިފައިވާ ކަންކަމުގެ ހުރުމަތްކަނޑައި އެ ކަންކަމަށް އިހާނަތްތެރިކޮށްހިތުން ކަމުގައި ވާތީ ކަމަށް ޚުތުބާގައި ބުނެފައިވެ އެވެ. 

ހުރުމަތްތެރިކުރެވިގެންވާ މައްކާގެ ހަރަމުގައި ފާފައަކަށް އަރައިގަތުމުގެ ނުބައިކަމުގެ ބޮޑުކަން ބަޔާންކުރައްވައި، މާތް ﷲ ވަހީ ކުރައްވައިފައިވާ ބަސްފުޅެއްގެ މާނައިގައި ވެ އެވެ. "އަދި އެ ތާނގައި އަނިޔާވެރިކަމާއެކު، ދީނާ ޚިލާފު ގޮތްތައް އުފައްދަންއުޅޭ މީހާއަށް، ތިމަންރަސްކަލާނގެ ވޭންދެނިވި ޢަޛާބުން ރަހަދައްކަވާހުށީމެވެ." ހަމައެފަދައިން، ޙުރުމަތްތެރި މައްސަރުތަކުގައި ކުރެވޭ ފާފަތަކުގެ ނުބައިކަން ވެސް ބޮޑުވެގެންވެއެވެ. މި ސަބަބަށް ޓަކައި، اَلْإِمَامُ الشَّافِعِي - رَحِمَهُ الله - ފަދަ ގިނަ ޢިލްމުވެރީންގެ އަރިހުގައި، މި މައްސަރުތަކުގައި މީހަކު މެރުމުން ދޭން ޖެހޭ މަރުގެ ދިޔަ ބޮޑެވެ.

ހުކުރު ޚުތުބާ 

މި ފަދަ މަތިވެރި މައްސަރަކާ ބައްދަލުވުމުން މުއުމިނު އަޅާގެ މައްޗަށް ވަނީ އަޅުކަމުގައި ހީވާގިވުންކަން ފާހަގަކޮށް ޚުތުބާގައި ބުނީ އެއީ މާތް ﷲ ހަނދުމަކޮށް، ގިނަގިނައިން ޒިކުރު ކުރުމާއި، ދުއާ ކުރުމާއި، ކީރިތި ގުރުއާން ކިޔެވުމާއި، ތަސްބީހަ އާއި ތަހުމީދާއި ތަކުބީރުކިޔުން ފަދަ ދުލުން ކުރެވޭ އަޅުކަންތައް ގިނަކުރަން ޖެހޭ ކަމަށެވެ. އަދި ކޮންމެ މުސްލިމަކަށް ވެސް ހެޔޮ ނަސޭހަތްދިނުމާއި، ރޯދަހިފުމާއި، ޞަދަގާތް ކުރުމާއި، އަނިޔާ ލިބިފައިވާ މީހާއަށް ނަސްރުދިނުމާއި، ނިކަމެތީންނަށް އެހީތެރިވުމާއި، މުސީބާތެއް ޖެހިފައިވާ މީހާއަށް އެހީތެރިކަން ފޯރުކޮށްދިނުން ފަދަ އަމަލީ ގޮތުން ކުރެވޭ ހެޔޮކަންތައް ވެސް ގިނަކުރަން ޖެހޭ ކަމަށް ޚުތުބާގައި ބުނެފައިވެ އެވެ.

މީގެ އިތުރުން މާތް ﷲއަށް އިޚުލާސްތެރިވުމާއި، އެކަލާނގެ އެއްކައުވަންތަކުރުމާއި، އެކަލާނގެއަށް ފުރިހަމައަށް އީމާންވުމާއި، އެކަލާނގެ މަތިވެރިކުރުމާއި، އެކަލާނގެ ދެކެ ލޯބިވުމާއި، އެކަލާނގެ މަތިވެރިކޮށް ގަދަރުކުރުމާއި، މާތް ﷲ ލޯބިވެވޮޑިގެންވާ އަމަލުތައް ކުރުމަށާއި، މާތްﷲ ރުހިވޮޑިނުގަންނަވާ އެންމެހައި ކަންކަމުން ހިތް ޠާހިރުކުރުމަށް ނަސޭހަތްތެރިވެފައިވެ އެވެ.

ހަމައެއާއެކު ޣީބަބުނުމާއި، ދޭތެރެޖެއްސުމާއި، ދޮގުހެދުމާއި، މީހުންނަށް އެއްޗެހި ގޮވުމާއި، ލައުނަތްދިނުން ފަދަ ނުބައި ފާފަތަކުން ރައްކާތެރިވެ ދުރުހެލިވުމަށް ޚުތުބާގައި ވަނީ ގޮވާލާފަ އެވެ.