ހުސްވި އަހަރާއި އަޅާ ބަލާއިރު މިއަހަރުގެ އޮކްޓޯބަރު މަސް ނިމުނު އިރު ތަކެތީގެ އަގުތައް ފާހަގަ ކުރެވޭ މިންވަރަކަށް މައްޗަށް ގޮސްފައިވާ ކަން މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަ ކޮށްފި އެވެ.

ސްޓެޓިސްޓިކް ބިއުރޯ އިން ނޮވެމްބަރު މަހުގެ 10 ވަނަ ދުވަހު އާންމު ކުރި ކޮމޯޑިޓީސް ޕްރައިސް އިންޑެކްސް (ސީޕީއައި) އިން ފާހަގަވާ ގޮތުގައި މާލޭގެ ބާޒާރުގައި ހުސްވި އަހަރުގެ އޮކްޓޯބަރު މަހާ އަޅާ ބަލާއިރު ޖުމްލަ ކޮށް އިންފްލޭޝަން 1.89 އިންސައްތަ އަށް މައްޗަށް ގޮސްފައިވާ ކަމަށެވެ.

ކާބޯތަކެތީގެ އަގުތަކަށް މަހުން މަހަށް (ސެޕްޓެމްބަރ 2025 އިން އޮކްޓޯބަރ 2025 އަށް) ބަލާއިރު 1.49- އިންސައްތަ އަށް ދަށްވެފައިވެއެވެ. މީގެ ތެރެއިން ފާހަގަކޮށްލެވޭ ގޮތެއްގައި އަގު ދަށްވެފައި ވަނީ މޭވާގެ ބާވަތްތަކާއި (7.94- އިންސައްތަ) ތަރުކާރީގެ ބާވަތްތަކުގެ (0.98- އިންސައްތަ) އަގުތަކެވެ.

މިއާ ޚިލާފަށް ހަކުރު، ޖޭމު، މާމުއި، ޗޮކްލެޓް އަދި ކޮންފެކްޝަނަރީ ގެ އަގުތައް (1.15+ އިންސައްތަ) އަދި ކިރު، އެހެނިހެން ކިރުގެ އުފެއްދުންތަކާއި ބިހުގެ ގެ އަގުތައް (0.38+) މައްޗަށް ގޮސްފައި ވެއެވެ.

އަނެއް ކޮޅުން މި އަހަރުގެ އޮކްޓޯބަރ އާއި ހުސްވި އަހަރުގެ އޮކްޓޯބަރ އާ އަޅާބަލާއިރު، ކާބޯތަކެތީގެ އަގުތައް (1.82+ އިންސައްތަ) އަށް މައްޗަށް ގޮސްފައި ވެއެވެ. މީގެ ތެރެއިން އެންމެ ބޮޑަށް އަގު މައްޗަށް ގޮސްފައި ވަނީ މޭވާގެ ބާވަތްތަކާއި (6.94+ އިންސައްތަ) އަދި އެހެނިހެން ކާބޯތަކެތީގެ އުފެއްދުން ތަކުގެ އަގުތަކެވެ.

އެކި ބާވަތުގެ ބުއިންތަކުގެ އަގުތައް މިއަހަރުގެ ސެޕްޓެމްބަރު މަހާ އަޅާ ބަލާއިރު ވެސް އޮކްޓޯބަރ މަހު ވަނީ 0.45+ އިންސައްތަ އަށް މައްޗަށް ގޮސްފަ އެވެ. ފާހަގަ ކޮށްލެވޭ ގޮތެއްގައި، ސައިފަތާއި ކޮފީ އާއި ކޮފީގެ ބަދަލުގައި ބޭނުންކުރާ ތަކެތީގެ (0.65+ އިންސައްތަ) އަގުތައް ވަނީ މައްޗަށް ގޮސްފައެވެ. މިއަހަރުގެ އޮކްޓޯބަރ އާއި ހުސްވި އަހަރުގެ އޮކްޓޯބަރ އާ އަޅާބަލާއިރު، ބުއިންތަކުގެ އަގުތައް 2.68+ އިންސައްތަ އަށް މަތިވެފައި ވެއެވެ. މީގެ ތެރެއިން އެންމެ ބޮޑަށް އަގު އުފުލިފައި ވަނީ ކޮފީ އާއި ކޮފީގެ ބަދަލުގައި ބޭނުންކުރާ ތަކެތި (8.68+ އިންސައްތަ) އަދި މޭވާ އާއި ތަރުކާރީގެ ޖޫސް (5.67+ އިންސައްތަ) ތަކެވެ.

ގޭސް އަދި އެހެނިހެން ފިއުލްގެ އަގުތައް އޮކްޓޯބަރ 2025 ގައި ސެޕްޓެމްބަރ 2025 އާ އަޅާބަލާއިރު 0.64 އިންސައްތަ އަށް އަގު އުފުލިފައިވެއެވެ. އަހަރުން އަހަރަށް (އޮކްޓޯބަރ 2025 އާއި އޮކްޓޯބަރ 2024) އަޅާބަލާއިރު، އަގުތައް 0.83- އިންސައްތަ އަށް ދަށްވެފައިވެއެވެ.

ޕާސަނަލް ކެއަރގެ ބާވަތްތަކުގެ އަގުތައް ސެޕްޓެމްބަރ އާ އަޅާބަލާއިރު އޮކްޓޯބަރު މަހު 0.18+ އިންސައްތަ އަށް މައްޗަށް ގޮސްފައި ވެއެވެ. ހުސްވި އަހަރުގެ އޮކްޓޯބަރ އާ އަޅާބަލާއިރު، މިއަހަރުގެ އޮކްޓޯބަރ ގައި ސާފުތާހިރުވުމަށް ބޭނުން ކުރާ ތަކެތީގެ އަގުތައް 2.99+ އިންސައްތަ އަށް މައްޗަށް ގޮސްފައިވެއެވެ.