ހަކުރު، ކޮފީ، މާމުއި، ޖޭމު އަދި ސައިފަތު ގެ އަގުތައް މައްޗަށް ހިނގައްޖެ އެވެ.

މި ޑިސެމްބަރު މަހު 3 ވަނަ ދުވަހު މޯލްޑިވްސް ބިއުރޯ އޮފް ސްޓެޓިސްޓިކްސް އިން ޝާޢިއު ކުރި ކޮންސިއުމަރ ޕްރައިސް އިންޑެކްސް (ސީ.ޕީ.އައި) ރިޕޯޓު ގައިވާ ގޮތުން މި ބާވަތްތަކުގެ އިތުރުން ސީރިއަލް އާއި ސީރިއަލް ގެ އުފެއްދުންތަކުގެ އަގުތައް ވެސް ވަނީ އުފުލިފަ އެވެ.

2025 އޮކްޓޯބަރުން ނޮވެމްބަރަށް މަހުން މަހަށް ކާބޯތަކެތީގެ އަގުތައް އައި ބަދަލުތަކަށް ބަލާއިރު، މޭވާ (4.50-%) ކިރު، އަދިި އެހެނިހެން ކިރުން ތައްޔާރުކުރާ ބާވަތްތަކާއި ބިހު (-0.80-%) ގެ އަގުތައް ދަށްވެފައިވާ ކަމަށް ވަނީ ބުނެފަ އެވެ.

އެހެން ނަމަވެސް ހަކުރު، ޖޭމު، މާމުއި، ޗޮކްލެޓް ފަދަ ބާވަތްތަކުގެ އަގުތައް 0.63+% އަށް ވަނީ ނޮވެމްބަރު މަހު މައްޗަށް ގޮސްފައެވެ. އޭގެ އިތުރުން ސީރިއަލް އާއި ސީރިއަލް އިން ތައްޔާރުކުރާ ބާވަތްތަކުގެ އަގުތައް 0.06+% އަށް ވަނީ މައްޗަށް ގޮސްފަ އެވެ.

އަހަރުން އަހަރަށް ބަލާއިރު، 2024 ނޮވެމްބަރާ އަޅާ ބަލާއިރު މި އަހަރުގެ ނޮވެމްބަރުގެ ކާބޯތަކެތީގެ އަގުތައް 0.16+% އަށް މައްޗަށް ގޮސްފައިވެ އެވެ. އޭގެ އިތުރުން ކައްކާ ތެލާއި ފެޓްސް ގެ ބާވަތްތައް 3.81+% އަށް މައްޗަށް ގޮސްފައިވެ އެވެ.

އޭގެ އިތުރުން ހުސްވި އަހަރާ އަޅާ ބަލާއިރު މި އަހަރުގެ ނޮވެމްބަރު މަހު، ހަކުރު، ޖޭމު، މާމުއި، ޗޮކްލެޓް ގެ އަގުތައް 3.84+% އަށް މައްޗަށް ގޮސްފައި ވެއެވެ. އެހެން ނަމަވެސް ހުސްވި އަހަރުގެ ނޮވެމްބަރު މަހަށް ވުރެ މި އަހަރުގެ ނޮވެމްބަރު މަހު ތަރުކާރީ ގެ އަގުތައް 7.90-% އަށް ދަށްވެފައި ވެއެވެ.

2025 އޮކްޓޯބަރުން 2025 ނޮވެމްބަރަށް ލުއި ބުއިންތަކުގެ އަގުތައް 0.55+% އަށް އިތުރުވެއްޖެ އެވެ. ފާހަގަކުރެވޭ ވަރަށް ސައިފަތާއި، ކޮފީ ގެ އަގު (0.97+%) ވަނީ އުފުލިފައެވެ. އަދި މޭވާ އަދި ތަރުކާރީ ޖޫހު (5.10+%) ގެ އަގުތައް ވަރަށް ބޮޑަށް އުފުލިފައިވެއެވެ.

މި އަހަރުގެ އޮކްޓޯބަރާ އަޅާބަލާއިރު ނޮވެމްބަރު މަހު ޕާސަނަލް ކެއަރ ނުވަތަ ސާފުތާހިރު ވުމަށް ބޭނުން ކުރާ ތަކެތީގެ އަގުތައް ވެސް ވަނީ 0.54+% އަށް އިތުރުވެފަ އެވެ. 2024 ނޮވެމްބަރާ އަޅާ ބަލާއިރު، މި އަހަރު ގެ ނޮވެމްބަރުގައި މި ގުރޫޕްގެ އަގުތައް 3.33+% އިތުރުވެފައިވެއެވެ.

ހުސްވި އަހަރުގެ ނޮވެމްބަރު މަހާ އަޅާ ބަލާއިރު މި އަހަރުގެ ނޮވެމްބަރު މަހު 0.73 އިން ސައްތަ އަށް އިންފްލޭޝަން ވަނީ މައްޗަށް ގޮސްފަ އެވެ.