ދުންފަތުގެ އަގުތަކަށް ކުއްލި ގޮތަކަށް ބޮޑު ކުރުމުން އިގްތިސާދަށް ކުރި އަސަރު އަހަރެއް ފަހުން ވެސް ދެމި އެބައޮތް
ދުންފަތުގެ އަގު ބޮޑުކުރުމާއެކު ސިނގިރޭޓުގެ ވަގު ވިޔާފާރި އުފެދި، އިމްޕޯޓް ޑިއުޓީގެ ގޮތުގައި ލަފާކުރި 4.6 ބިލިއަން ރުފިޔާއަށް ދަށަށް އާމްދަނީ ވަނީ ގޮސްފައި. އަނެއްކޮޅުން ޗައިނާ އާއި ސޮއިކުރި ފްރީ ޓްރޭޑް އެގްރީމެންޓުގެ ސަބަބުން ގިނަ މުދަލުން އިމްޕޯޓް ޑިއުޓީ މިހާރު ނުލިބޭ.
ސިއްހީ މާހިރުން އިރުޝާދު ލިޔެފައިވާ ސިނގިރޭޓް ފޮއްޓެއްގެ މަތީ ގައި ބަހައްޓާފައި ހުރި އަޅިކެނޑިއެއްގައި އޮތް ސިނގިރޭޓެއް އަނދަނީ
ދުންފަތުގެ ބާވަތްތަކުގެ އަގު ކުއްލި ގޮތަކަށް ސަރުކާރުން ބޮޑު ކުރުމުގެ ސަބަބުން، 2025 ވަނަ އަހަރުގެ ތިންވަނަ ކުއާޓަރާ ހަމަ އަށް އައި އިރު ރާއްޖޭގައި ދުންފަތުގެ އަގު 135.3 އިންސައްތަ އަށް އުފުލިފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން ހާމަކޮށްފި އެވެ. އިމްޕޯޓް އެކްސްޕޯޓު ގާނޫނަށް ބަދަލު ގެނެސް ދުންފަތުގެ އުފެއްދުންތަކުގެ އަގުތައް ބޮޑުވާ ގޮތަށް އިމްޕޯޓު ޑިއުޓީ ބޮޑު ކުރީ 2024 ވަނަ އަހަރުގެ ނޮވެމްބަރު މަހުން ފެށިގެންނެވެ.
ދުންފަތުގެ އަގުތައް އިންތިހާ އަށް ބޮޑުވެގެން ދިޔަ އިރު، ސިނގިރޭޓުގެ ވަގު ވިޔާފާރި ރާއްޖޭގައި އުފެދި، މި ހިނގާ މާލީ އަހަރުގެ ތެރޭގައި އިމްޕޯޓް ޑިއުޓީގެ ގޮތުގައި ދައުލަތަށް ލިބޭނެ ކަމަށް ލަފާކުރި މިންވަރަށް ވުރެ އާމްދަނީ ވަނީ ދަށަށް ގޮސްފަ އެވެ. އެގޮތުން 4.6 ބިލިއަން ރުފިޔާ ލިބޭނެ ކަމަށް ލަފާކުރި ނަމަވެސް، މިހާތަނަށް ލިބިފައިވަނީ 2.9 ބިލިއަން ރުފިޔާ އެވެ. އިމްޕޯޓުން ލިބޭ އާމްދަނީ ދަށަށް ދިޔަ އިރު އިގްތިސާދީ ކުރިއެރުން ލިބޭނެ ކަމަށް ބުނެ ރައީސް މުއިއްޒުގެ ސަރުކާރުން ވަނީ ޗައިނާ އާ އެކު ފްރީ ޓްރޭޑް އެގްރީމެންޓެއް ގައި ވެސް ސޮއި ކޮށްފަ އެވެ. އެއާއެކު ޗައިނާ އިން ރާއްޖެ އަށް އެތެރެ ކުރާ ގިނަ ބާވަތްތަކުގެ މުދަލުން ރާއްޖެ އަށް ކުރިން ލިބެމުން އައި އިމްޕޯޓު ޑިއުޓީ މިހާރަކު ނުލިބެ އެވެ.
އިންފްލޭޝަނަށް ބަލާއިރު، 2025 ވަނަ އަހަރު ނިމޭއިރު އިންފްލޭޝަންގެ މިންވަރު އެވްރެޖްކޮށް ހުންނާނީ 4.1 އިންސައްތައިގައި ކަމަށް ސަރުކާރުން ވަނީ ލަފާ ކޮށްފަ އެވެ. މިއީ 2024 ވަނަ އަހަރު ހުރި 1.4 އިންސައްތަ އަށް ވުރެ މަތީ އަދަދެކެވެ. އަނެއްކޮޅުން ހުސްވި އަހަރަށް އަންދާޒާ ކުރި ބަޖެޓް ގައި އަހަރުގެ ތެރޭގައި އިންފްލޭޝަން ހުންނާނެ ކަމަށް ލަފާ ކުރި 3.9 އިންސައްތަ އަށް ވުރެ މަތީ އަދަދެކެވެ. ރާއްޖޭގައި ތަކެތީގެ އަގު މައްޗަށް ގޮސް ފައިސާގެ އަގު ވެއްޓުމުގެ ވަރަށް ބޮޑު ހިއްސާ އެއް ދުންފަތުގެ ޓެކުހަށް ގެނައި ބަދަލު ހިމެނޭ ކަމަށް ލަފާކުރެވެއެވެ.
