ޕްރިންސަސް އޮފް އެސްޓޫރިއަސް އެވޯޑު މެސީ އަށް ދޭން ނިންމައިފި

"ޕްރިންސަސް އޮފް އެސްޓޫރިއަސް އެވޯޑް ފޯ ސްޕޯޓްސް" 2026، އިންޓަރ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އަށް ދީފި އެވެ. 

 މިއީ ފުޓުބޯޅަ ކުޅުންތެރިޔަކަށް ވަކިން މި އެވޯޑު އެރުވޭ ފުރަތަމަ ފަހަރެވެ. މި އެވޯޑު މެސީ އަށް ލިބުނުކަން އިއުލާން ކުރި އިރު، މެސީ ހުރީ ފީފާ ވޯލްޑް ކަޕަށް ތައްޔާރުވުމަށް އާޖެންޓީނާގެ ގައުމީ ޓީމާ އެކު އެމެރިކާގެ ކެންސަސް ސިޓީގައި އެވެ.

މިކަމާ ގުޅިގެން މެސީ ނެރުނު ވީޑިއޯ މެސެޖެއްގައި ބުނީ، މިފަދަ މުހިންމު އެވޯޑެއް ލިބުމަކީ އޭނާ އަށް ލިބުނު ވަރަށް ބޮޑު ފަޚުރެއް ކަމަށެވެ. އަދި މި އެވޯޑަކީ ހަމައެކަނި ދަނޑު މަތީގައި ދައްކާ ކުޅުމަށް ދޭ އެވޯޑެއް ނޫން ކަމަށާއި، ދަނޑުން ބޭރުގައި ކުރާ މަސައްކަތް ތަކަށް ވެސް ދެވޭ އެވޯޑަކަށް ވާތީ އެކަމާ ވަރަށް އުފާކުރާ ކަމަށް މެސީ ބުންޏެވެ.

ޕްރިންސަސް އޮފް އެސްޓޫރިއަސް އެވޯޑަކީ ފަންނުވެރިކަމާއި، އަދަބިއްޔާތާއި، އިޖުތިމާއީ ސައިންސާއި، ސައިންޓިފިކް ދިރާސާ ތަކުގެ އިތުރުން ބައިނަލްއަގުވާމީ އެއްބާރުލުމާއި ކުޅިވަރުގެ ދާއިރާ އިން ފާހަގަ ކޮށްލެވޭ ކާމިޔާބީތައް ހޯދާ ފަރާތް ތަކަށް ދޭ އެވޯޑެކެވެ. މެސީ އަށް މި އެވޯޑު ދިނުމަށް ނިންމި ފަނޑިޔާރުން ބުނީ، އޭނާގެ ހުނަރުވެރި ކަމާއި، ކާމިޔާބު ކުޅިވަރު ކެރިއަރުގެ އިތުރުން، ނިކަމެތި ކުދިންނަށް ތައުލީމާއި ސިއްހީ އެހީތެރިކަން ފޯރުކޮށްދިނުމަށް އޭނާ ކުރާ އިންސާނީ ޚިދުމަތްތައް ފާހަގަ ކުރާ ކަމަށެވެ. މީގެ އިތުރުން މެސީގެ ހިތްތިރިކަމާއި، ޓީމު ގޭމަށް ދޭ އަހަންމިއްޔަތުކަން ވެސް ޕެނަލް އިން ފާހަގަ ކުރި އެވެ.

މެސީ އަކީ ފުޓުބޯޅައިގެ ތާރީޚުގައި އެންމެ ގިނަ ތަށި ހޯދާފައިވާ ކުޅުންތެރިޔާ އެވެ. އޭނާ ވަނީ އާޖެންޓީނާ އާއެކު 2022 ވަނަ އަހަރުގެ ވޯލްޑް ކަޕާއި، 2021 އަދި 2024 ވަނަ އަހަރުގެ ކޮޕާ އެމެރިކާގެ އިތުރުން އޮލިމްޕިކް ރަން މެޑަލް ވެސް ކާމިޔާބު ކޮށްފައި އެވެ. ކުލަބު ލެވެލްގައި ބާސެލޯނާ އާއެކު ސްޕެނިޝް ލީގުގެ 10 ތައްޓާއި، ޔުއެފާ ޗެމްޕިއަންސް ލީގުގެ ހަތަރު ތަށި ކާމިޔާބު ކޮށްފައިވާއިރު، އިންޓަރ މިއާމީ އާއެކު 2025 ވަނަ އަހަރުގެ އެމްއެލްއެސް ކަޕް ވެސް މެސީ ވަނީ ކާމިޔާބު ކޮށްފަ އެވެ. 

އަމިއްލަ ކާމިޔާބީ ތަކަށް ބަލާއިރު، މެސީ ވަނީ އަށް ފަހަރު ބެލެންޑިއޯ އެވޯޑު ހޯދައިފަ އެވެ. އަދި ދެ އަހަރު ޖެހި ޖެހިގެން އެމްއެލްއެސްގެ އެންމެ މޮޅު ކުޅުންތެރިޔާގެ މަގާމު ހޯދާފައި އެވެ. މީގެ ކުރިން މި އެވޯޑު ހޯދާފައިވާ މަޝްހޫރު ކުޅިވަރު ތަރިންގެ ތެރޭގައި ރަފައެލް ނަޑާލް، މައިކަލް ޝޫމާކާ، ސެރީނާ ވިލިއަމްސް އަދި އެލިއުޑް ކިޕްޗޯގޭ ހިމެނެ އެވެ.

ފުޓުބޯޅައިގެ ދާއިރާ އިން މީގެ ކުރިން 2012 ވަނަ އަހަރު ޒަވީ ހެނާންޑޭޒް އާއި އިކާ ކަސިލަސްއާ ދެ ކުޅުންތެރިންނަށް އެކީގައި މި އެވޯޑު ލިބިފައިވާއިރު، 2010 ވަނަ އަހަރު ސްޕެއިންގެ ގައުމީ ޓީމަށް ވެސް މި ޝަރަފު ލިބިފައިވެ އެވެ.