މިއާމީ އިން ޓޮރޮންޓޯ ބަލި ކުރި މެޗުގައި، މެސީ އަށް ޚާއްސަ ރެކޯޑެއް

މޭޖާ ލީގު ސޮކާ (އެމެރިކާ ލީގު)ގައި ޓޮރޮންޓޯއާ ދެކޮޅަށް ކުޅުނު މެޗުން އިންޓަރ މިއާމީ މޮޅުވި އިރު، އެ ޓީމުގެ ކެޕްޓަން ލިއޮނަލް މެސީ އަށް ޚާއްސަ ރެކޯޑެއް ލިބިއްޖެ އެވެ.

ޓޮރޮންޓޯއާ ދެކޮޅަށް ކުޅުނު މެޗު މިއާމީ އިން ކާމިޔާބު ކޮށްފައި ވަނީ 4-2 އިންނެވެ. މެޗުގެ ފުރަތަމަ ހާފުގައި މިއާމީ އިން އެއް ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ ދެ ވަނަ ހާާފުގަ އެވެ. ޓޮރޮންޓޯ އިން ވެސް ވަނީ ދެ ވަނަ ހާފުގައި ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފު ނިމެން މިނެޓަކަށް ވެފައި ވަނިކޮށް މިއާމީ އަށް ލީޑު ނަގައިދިނީ ރޮޑްރީގޯ ޑި ޕޯލް އެވެ. އޭގެ ފަހުން ދެ ވަނަ ހާފު ފަށައިގެން 11 ވަނަ މިނެޓުގައި ލުއިސް ސުއަރޭޒް ވަނީ މިއާމީގެ ދެ ވަނަ ލަނޑު ޖަހައިފަ އެވެ. އެ ލަނޑު ޖަހަން ސުއަރޭޒް އަށް ފުރުސަތު ތަނަވަސްކޮށްދިނީ މެސީ އެވެ.

މެޗުގެ 73 ވަނަ މިނެޓުގައި މިއާމީގެ ތިން ވަނަ ލަނޑު ޖެހީ ސާޖިއޯ ރެގީއޯން އެވެ. އެއީ ވެސް މެސީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ދެ މިނެޓު ފަހުން މިއާމީގެ ހަތަރު ވަނަ ލަނޑު މެސީ ޖެހިއިރު، އެއީ ޑި ޕޯލް ތަނަވަސްކޮށްދިން ފުރުސަތެއްގައި މެސީ ޖެހި ލަނޑެކެވެ. އެއާ އެކު މެސީ ވެގެން ގޮސްފައި ވަނީ، އޭނާގެ ހިއްސާ އޮވެގެން އެންމެ މަދު މެޗުން 100 ލަނޑު ހަމަ ކުރި ކުޅުންތެރިޔާ އަށެވެ. 

މެޗުގައި ޓޮރޮންޓޯ އިން އެ ޓީމުގެ ދެ ލަނޑު ވެސް ޖެހީ މިއާމީ އިން ހަތަރު ލަނޑު ޖެހި ފަހުންނެވެ. އެ ޓީމުގެ ދެ ލަނޑު ވެސް ޖެހީ އެމީލިއޯ އަރިސްޓިޒަބާލް އެވެ. 

މޮޅާ އެކު، ލީގު ތާވަލްގެ ތިން ވަނަ މަގާމުގައި މިއާމީ އޮތީ މިހާތަނަށް އެ ޓީމު ކުޅެފައިވާ 12 މެޗުން 22 ޕޮއިންޓާ އެކު އެވެ.