މެސީ އަށް 1000 ލަނޑު ހަމަ ކުރެވޭނެ ކަމަށް ސްކަލޯނީ ބުނެފި

އާޖެންޓީނާގެ ކެޕްޓަން ލިއޮނަލް މެސީ އަށް އޭނާގެ ކެރިއަރުގައި 1000 ލަނޑު ހަމަ ކުރެވޭނެ ކަމަށް، އާޖެންޓީނާ އަށް އިރުޝާދު ދެމުން އަންނަ ލިއޮނަލް ސްކަލޯނީ ބުނެފި އެވެ.

ސްކަލޯނީ މިހެން ބުނެފައި ވަނީ ބައިނަލްއަޤުވާމީ ރަހުމަތްތެރި ކަމުގައި އާޖެންޓީނާ އިން ޒެމްބިއާ އާ ދެކޮޅަށް ކުޅުނު މެޗަށް ފަހު އެވެ. އެ މެޗުގައި މެސީ ކުޅެފައިވާއިރު، އޭނާ ވަނީ ލަނޑެއް ވެސް ޖަހައިފަ އެވެ. އެ ލަނޑާ އެކު މެސީގެ ކެރިއަރުގައި އޭނާ ޖެހި ލަނޑުގެ އަދަދު ވަނީ 902 އަށް އަރައިފަ އެވެ.

ސްކަލޯނީ ބުނީ، މެސީ ބޭނުންވާ ނަމަ އޭނާ އަށް ކެެރިއަރުގައި 1000 ލަނޑު ވެސް ހަމަ ކުރެވޭނެ ކަމަށެވެ. މެސީ އަށް އެކަން ކުރެވޭނެ ކަމުގެ ފުރިހަމަ ޔަޤީންކަން އޮތް ކަމަށް ސްކަލޯނީ ބުންޏެވެ. އެއާ އެކު ސްކަލޯނީ ބުނީ، މެސީ އަކީ އެ ފެންވަރުގެ ކުޅުންތެރިޔެއް ކަމަށާއި، މިހާތަނަށް ވެސް މެސީ ވަނީ ގިނަ ކާމިޔާބީ ތަކެއް ހޯދާފައި ކަމަށެވެ. 

މިހާތަނަށް ފުޓުބޯޅައިގެ ތާރީޚުގަައި އެންމެ ގިނަ ލަނޑު ޖެހި ކުޅުންތެރިޔާގެ ގޮތުގައި ހުރީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. ރޮނާލްޑޯ ވަނީ މިހާތަނަށް އޭނާގެ ކެރިއަރުގައި 965 ލަނޑު ޖަހައިފަ އެވެ. އަދި ރޮނާލްޑޯ އަންނަނީ ކެރިއަރުގައި 1000 ލަނޑު ހަމަ ކުރުމަށް މަސައްކަތް ކުރަމުންނެވެ. މިހާތަނަށް 900 ލަނޑު ހަމަ ކޮށްފައިވާ ދެ ކުޅުންތެރިންނަކީ ރޮނާލްޑޯ އާއި މެސީ އެވެ. 

މެސީގެ ކެރިއަރުގައި އޭނާ 900 ވަނަ ލަނޑު ހަމަ ކޮށްފައި ވަނީ ކޮންކާކަފް ޗެމްޕިއަންސް ކަޕްގެ ގަދަ 16 ވަނަ ބުރުގައި އިންޓަރ މިއާމީ އިން ނޭޝްވިލްއާ ދެކޮޅަށް ކުޅުނު މެޗުގަ އެވެ. މެސީ އަކީ ކަލަންޑަރު އަހަރެއްގައި އެންމެ ގިނަ ލަނޑު ޖެހި ކުުޅުންތެރިޔާ އެވެ. 2012 ވަނަ އަހަރު މެސީ އެ ރެކޯޑު ހޯދީ 91 ލަނޑު ޖަހައިގެންނެވެ. މީގެ އިތުރުން 474 ލަނޑާ އެކު މެސީ އަކީ ސްޕެނިޝް ލީގުގައި ވެސް އެންމެ ގިނަ ލަނޑު ޖެހި ކުޅުންތެރިޔާ އެވެ.

މިވަގުތު މެސީގެ އެންމެ ބޮޑު އަމާޒަކީ މިއަހަރުގެ ޖޫން މަހު އެމެރިކާ އާއި މެކްސިކޯ އަދި ކެނެޑާގައި ފަށާ ފީފާ ވޯލްޑް ކަޕަށް އާޖެންޓީނާ އާއެކު ތައްޔާރުވުމެވެ. އެންމެ ފަހުން އޮތް ވޯލްޑް ކަޕް އާޖެންޓީނާ އިން ކާމިޔާބު ކޮށްފައިވާއިރު، މިފަހަރު ވެސް އާޖެންޓީނާގެ ޓީމުގެ އެންމެ މުހިންމު ކުޅުންތެރިޔަކަށް ވާނީ މެސީ އެވެ.