އާޖެންޓީނާ އިން ޒެމްބިއާ ބަލިކުރި މެޗުގައި މެސީ ލަނޑު ޖަަހައިފި
1 އެޕްރީލު 2026 | ބުދަ 05:11މިއީ މިއަހަރުގެ ޖޫން މަހު އެމެރިކާ އާއި، މެކްސިކޯ އަދި ކެނެޑާގައި އޮންނަ ވޯލްޑް ކަޕްގެ ކުރިން އާޖެންޓީނާ އިން ކުޅުނު ފަހު މެޗު.
މެޗުގައި ލަނޑު ޖެހުމަށް ފަހު އާޖެންޓީނާގެ ކެޕްޓަން މެސީ އުފާ ފާޅު ކުރަނީ. | ރޮއިޓާސް
ބައިނަލްއަޤުވާމީ ރަހުމަތްތެރި ކަމުގައި ޒެމްބިއާއާ ދެކޮޅަށް ކުޅުނު މެޗުން ވެސް މޮޅުވެ، އާޖެންޓީނާ އިން އެ ޓީމުގެ ފޯމު ދަމަހައްޓައިފި އެވެ.
ބުދަ ދުވަހުގެ ފަތިހު ޒެމްބިއާއާ ދެކޮޅަށް ކުޅުނު މެޗު އާޖެންޓީނާ އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި އާޖެންޓީނާ އިން ދެ ލަނޑު ޖެހިއިރު، އަނެއް ތިން ލަނޑު އެ ޓީމުން ޖެހީ ދެ ވަނަ ހާާފުގަ އެވެ.
މެޗު ފަށައިގެން ހަތަރު ވަނަ މިނެޓުގައި އާޖެންޓީނާ އަށް ލީޑު ނަގައިދިނީ ހޫލިއަން އަލްވަރޭޒް އެވެ. އޭގެ ފަހުން މެޗުގެ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް، ކެޕްޓަން ލިއޮނަލް މެސީ ވަނީ އާޖެންޓީނާގެ ދެ ވަނަ ލަނޑު ޖަަހައި ލީޑު ފުޅާ ކޮށްފަ އެވެ. ޒެމްބިއާ މެޗުގެ ކުރިން އާޖެންޓީނާ އިން ކުޅުނު މެޗުގައި މެސީ ކުޅެފައި ނުވެ އެވެ.
މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ނިކޮލަސް އޮޓަމެންޑީ ވަނީ އާޖެންޓީނާގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގެ 68 ވަނަ މިނެޓުގައި އާޖެންޓީނާގެ ހަތަރު ވަނަ ލަނޑަކީ ޒެމްބިއާގެ ޑޮމިނިކް ޗަންޑާ އަތުން ބައި ކޮޅަށް ވަތް ލަނޑެކެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާޖެންޓީނާގެ ފަސް ވަނަ ލަނޑު ޖެހީ ވަލެންޓިން ބާކޯ އެވެ.
މިއީ މިއަހަރުގެ ޖޫން މަހު އެމެރިކާ އާއި، މެކްސިކޯ އަދި ކެނެޑާގައި އޮންނަ ވޯލްޑް ކަޕްގެ ކުރިން އާޖެންޓީނާ އިން ކުޅުނު ފަހު މެޗެވެ. އާޖެންޓީނާ އަކީ ވޯލްޑް ކަޕްގެ އެންމެ ފަހުގެ ޗެމްޕިއަނުންނެވެ.
