ކަސެމީރޯ ހޯދުމަށް އިންޓަރ މިއާމީ އިން މަސައްކަތް ކުރަނީ

މެންޗެސްޓަރ ޔުނައިޓެޑަށް ކުޅެމުން އަންނަ ބްރެޒިލްގެ ކަސެމީރޯ ހޯދުމަށް، އެމެރިކާގެ އިންޓަރ މިއާމީ އިން މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 34 އަހަރުގެ ކަސެމީރޯ ޔުނައިޓެޑަށް ބަދަލުވީ 2022 ވަނަ އަހަރު އެވެ. ޔުނައިޓެޑާ އެކު އޭނާ ސޮއި ކޮށްފައިވާ ހަތަރު އަހަރު ދުވަހުގެ އެއްބަސްވުމުގެ މުއްްދަތު މިއަހަރުގެ ޖޫން މަހުގެ ނިޔަލަށް ހަމަވާނެ އެވެ. އެއާ އެކު ކަސެމީރޯ ނިންމާފައި ވަނީ ޔުނައިޓެޑުގެ އެއްބަސްވުން އައު ނުކޮށް، އެ ކުލަބު ދޫކޮށްލުމަށެވެ.

މީޑިއާ ތަކުގައި ބުނެފައިވާ ގޮތުން މިއާމީ އިން މިހާރު އަންނަނީ ކަސެމީރޯ ހޯދުމުގެ މަސައްކަތް ކުރަމުންނެވެ. އެގޮތުން ޔުނައިޓެޑުގެ އެއްބަސްވުން ހަމަވުމުން، މިއާމީ އަށް ކަސެމީރޯ ގެނައުމަށްޓަކައި އެ ކުލަބުން ކަސެމީރޯގެ އެޖެންޓާ އެކު ވާހަކަ ދައްކަމުން އަންނަ ކަމަށް ވެސް ބުނެފައިވެ އެވެ. މަޝްވަރާ ތަކުގެ ތެރެއިން މިއާމީ އިން ފުރަތަމަ ހުށަހެޅުމެއް ވެސް ފޮނުވާފައިވާ ކަމަށް ރިޕޯޓު ކޮށްފައިވެ އެވެ.

މީގެ އިތުރުން މީޑިއާ ތަކުގައި ބުނެފައިވާ ގޮތުން މިއާމީ އިން ރަނގަޅު ހުށަހެޅުމެއް ލިބިއްޖެ ނަމަ، ކަސެމީރޯ އެ ކުލަބަށް ބަދަލުވުމުގެ ފުރުސަތު ވެސް އެބަ އޮތެވެ. އެކަން ބިނާ ވެގެން ދާނީ މިއާމީ އިން ހުށަހަޅާ ހުށަހެޅުމެއްގެ މައްޗަށް ކަމަށް ފާހަގަ ކޮށްފައިވެ އެވެ. މިއާމީގެ އިތުރުން، ޔޫރަޕުގެ ބައެއް ކުލަބު ތަކުގެ އިތުރުން، ސައުދީ ޕްރޯ ލީގުގެ ބައެއް ކުލަބު ތަކުން ވެސް ކަސެމީރޯ ހޯދުމުގެ ޝައުޤުވެރިކަން ގެންގުޅޭ ކަމަށް ވެސް ރިޕޯޓުތައް ބުނެ އެވެ.

މިއީ ޔުނައިޓެޑުގައި ކަސެމީރޯ ހޭދަ ކުރާ ހަތަރު ވަނަ ސީޒަން އެވެ. އޭނާ ވަނީ މިހާތަނަށް ޔުނައިޓެޑަށް ކުޅެދިން 155 މެޗުގައި 24 ލަނޑު ޖަހައިފަ އެވެ. ޔުނައިޓެޑާ އެކު އޭނާ ވަނީ ކަރަބޯ ކަޕްގެ އިތުރުން، އެފްއޭ ކަޕެއް ވެސް ކާމިޔާބު ކޮށްފަ އެވެ. ޔުނައިޓެޑުގެ ކުރިން ކަސެމީރޯ ކުޅެފައި ވަނީ ސްޕެއިންގެ ރެއާލް މެޑްރިޑަށެވެ. ކަސެމީރޯގެ ކެރިއަރުގައި އޭނާ އެންމެ ގިނަ ކާމިޔާބީތައް ހޯދާފައި ވަނީ ރެއާލްގަ އެވެ.

ކަސެމީރޯ ހޯދުމަށް މިއާމީ އިން މަސައްކަތް ކުރަމުން އަންނައިރު، އާޖެންޓީނާގެ ކެޕްޓަން ލިއޮނަލް މެސީ އާއި، އުރުގުއޭގެ ފޯވާޑު ލުއިސް ސައަރޭޒް އަދި އާޖެންޓީނާގެ ރޯޑްރިގޯ ޑި ޕައުލް ވެސް ކުޅެމުން އަންނަނީ އެ ޓީމަށެވެ. މީގެ އިތުރުން ސްޕެއިންގެ ސާޖިއޯ ބުސްކެޓްސް އާއި ޖޯޑީ އަލްބާ ވެސް މިއާމީ އަށް ކުޅެފައިވެ އެވެ. ނަމަވެސް ބުސްކެޓްސް އާއި އަލްބާ ވަނީ ޕްރޮފެޝަނަލް ފުޓުބޯޅަ އިން ރިޓަޔާ ކޮށްފަ އެވެ،