މެސީގެ ލަނޑުން މޮޅުވެ، މިއާމީ ތިން ވަނަ އަށް

މޭޖަރ ލީގު ސޮކަރ (އެމެރިކާ ލީގު)ގައި ނިއުޔޯކް ސިޓީއާ ދެކޮޅަށް ކުޅުނު މެޗުން މޮޅުވެ، އިންޓަރ މިއާމީ އިން ލީގު ތާވަލްގެ ތިން ވަނަ މަގާމަށް ޖެހިލައިފި އެވެ.

ނިއުޔޯކް ސިޓީއާ ދެކޮޅަށް ކުޅުނު މެޗު މިއާމީ އިން ކާމިޔާބު ކުރީ 3-2 އިންނެވެ. މެޗުގައި މިއާމީ އިން ލީޑު ނަގާފައި ވަނިކޮށް، ނިއުޔޯކް ސިޓީ އިން ނަތީޖާ ހަމަހަމަކޮށް، ލީޑު ވެސް ނެގި އެވެ. ނަމަވެސް، ފަހުން ދެ ލަނޑު ޖަހައިގެން މިއާމީ ވަނީ މެޗުން މޮޅުވެފަ އެވެ.

މެޗު ފަށައިގެން ހަތަރު ވަނަ މިނެޓުގައި މިއާމީ އަށް ލީޑު ނަގައިދިނީ ގޮންޒާލޯ ލުޖަން އެވެ. ނަމަވެސް، މެޗުގެ 17 ވަނަ މިނެޓުގައި ނިކޮލަސް ފެނާންޑޭސް ވަނީ ލަނޑު ޖަހައި ނިއުޔޯކް އަށް ނަތީޖާ ހަމަހަމަ ކޮށްދީފަ އެވެ.  އޭގެ ފަހުން ދެ ވަނަ ހާފު ފަށައިގެން ކުރީ ކޮޅު އަގުސްޓިން އޮޖެޑާ ވަނީ ނިއުޔޯކް އަށް ލީޑު ނަގައިދީފަ އެވެ.

ނިއުޔޯކް އިން ލީޑު ނެގިތާ ދެ މިނެޓުގެ ތެރޭގައި މިއާމީ އަށް ނަތީޖާ ހަމަހަމަ ކޮށްދިނީ އެ ޓީމުގެ ކެޕްޓަން ލިއޮނަލް މެސީ އެވެ. އޭގެ ފަހުން މެޗުގެ 74 ވަނަ މިނެޓުގައި މިކައެލް ވަނީ މިއާމީގެ ތިން ވަނަ ލަނޑު ޖަހައި މެޗުން އެ ޓީމު މޮޅު ކޮށްދީފަ އެވެ.

މޮޅާ އެކު މިއާމީ އިން ވަނީ ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. މިހާތަނަށް ކުޅެފައިވާ ފަސް މެޗުން އެ ޓީމަށް 10 ޕޮއިންޓު ލިބޭއިރު، ހަމަ އެ އަދަދަށް މެޗު ކުޅެގެން ދެ ވަނައިގައި ނިއުޔޯކް އަށް ލިބެނީ ވެސް 10 ޕޮއިންޓެވެ. އެއް ވަނައިގައި ނެޝްވީލް އަށް ލިބެނީ 13 ޕޮއިންޓެވެ.