އިންޓަރ މިއާމީ ކަޓައިފި، މެސީ އަށް ކެރިއަރުގައި 900 ލަނޑު

ކޮންކާކަފް ޗެމްޕިއަންސް ކަޕްގެ ގަދަ 16 ވަނަ ބުރުގައި ނޭޝްވިލްއާ ދެކޮޅަށް ކުޅުނު މެޗުން އެއްވަރުވެ އިންޓަރ މިއާމީ މުބާރާތުން ކެޓިއިރު، އެ ޓީމުގެ ކެޕްޓަން ލިއޮނަލް މެސީ ކެރިއަރުގައި 900 ލަނޑު ހަމަ ކޮށްފި އެވެ.

 ނޭޝްވިލްގެ ދަނޑުގައި މި ދެ ޓީމު ބައްދަލު ކުރި މެޗު ނިމުނީ ލަނޑެއް ނުޖެހި އެވެ. އިންޓަރ މިއާމީގެ ދަނޑުގައި ކުޅުނު ދެ ވަނަ ލެގު ނިމުނީ ދެ ޓީމު 1-1 އިން އެއްވަރު ވެގެންނެވެ. އެއާ އެކު، ރަށުން ބޭރުގައި ޖެހި ލަނޑުގެ ޤަވާއިދުން މިއާމީ ވަނީ މުބާރާތުން ކަޓައިފަ އެވެ.

މެޗު ފަށައިގެން ހަތް ވަނަ މިނެޓުގައި މިއާމީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު މިއާމީ އަށް ޖަހައިދިނީ ކެޕްޓަން މެސީ އެވެ. އެ ލަނޑާ އެކު، މެސީ ވަނީ އޭނާގެ ކެރިއަރުގައި 900 ލަނޑު ހަމަ ކޮށްފަ އެވެ. އޭގެ ފަހުން މެޗުގެ 74 ވަނަ މިނެޓުގައި ނޭޝްވިލް އަށް ނަތީޖާ ހަމަހަމަ ކޮށްދިނީ ކްރިސްޓިއަން އެސްޕިނޯޒާ އެވެ.

ކެރިއަރުގައި މެސީ 900 ލަނޑު ހަމަ ކޮށްފައިވާއިރު، މީގެ ކުރިން ކެރިއަރުގައި 900 ލަނޑު ހަމަ ކުރި ކަމަށް ރެކޯޑު ކުރެވިފައި އޮތީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. ރޮނާލްޑޯ ވަނީ އޭނާގެ ކެރިއަރުގައި މިހާތަނަށް 959 ލަނޑު ޖަހައިފަ އެވެ. 

މެސީ ވަނީ އޭނާގެ ކެރިއަރުގައި ގިނަ ދުވަސްތައް ހާދަ ކުރި ބާސެލޯނާ އަށް 672 ލަނޑު ޖަހައިދީފަ އެވެ. އޭގެ ފަހުން ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވެ، އެ ކުލަބުގައި 32 ލަނޑު ޖެހި އެވެ. މިއާމީ އަކީ މެސީގެ ކެރިއަރުގައި ކުޅޭ ތިން ވަނަ ކުލަބަށް ވާއިރު، އެ ކުލަބުގައި ވަނީ މިހާތަނަށް 81 ލަނޑު ޖަހައިފަ އެވެ. މީގެ އިތުރުން އާޖެންޓީނާގެ ޤައުމީ ޓީމަށް މެސީ ވަނީ 115 ލަނޑު ޖަހައިދީފަ އެވެ.

މީގެ އިތުރުން މެސީ އަކީ ކަލަންޑަރު އަހަރެއްގައި އެންމެ ގިނަ ލަނޑު ޖެހި ކުުޅުންތެރިޔާ އެވެ. 2012 ވަނަ އަހަރު މެސީ އެ ރެކޯޑު ހޯދީ 91 ލަނޑު ޖަހައިގެންނެވެ. މީގެ އިތުރުން 474 ލަނޑާ އެކު މެސީ އަކީ ސްޕެނިޝް ލީގުގައި ވެސް އެންމެ ގިނަ ލަނޑު ޖެހި ކުޅުންތެރިޔާ އެވެ.