މެސީ ހުރީ ބާސެލޯނާ އަށް އަންނަން ތައްޔާރަށް، އެކަން ހުއްޓުވީ ލަޕޯޓާ: ޒަވީ

މާލީ މައްސަލަ ތަކުގެ ތެރެއިން ބާސެލޯނާ ދޫކޮށްލަން ޖެހުނު އެ ކުލަބުގެ ލެޖެންޑު އަދި ކުރީގެ ކެޕްޓަން ލިއޮނަލް މެސީ ހުރީ އަލުން ބާސެލޯނާ އަށް އަންނަން ތައްޔާރަށް ކަމަށާއި، އެކަން ހުއްޓުވީ ބާސެލޯނާގެ ރައީސް ޖޯން ލަޕޯޓާ ކަމަށް، ބާސެލޯނާގެ ކުރީގެ ކޯޗު ޒަވީ ހެނާންޑޭޒް ބުނެފި އެވެ.

ބާސެލޯނާގެ އެއްބަސްވުން އައު ނުކުރެެވި މެސީ ވަނީ 2021 ވަނަ އަހަރުގެ ތެރޭގައި ބާސެލޯނާ ދޫކޮށްލައިފަ އެވެ. އެއަށް ފަހު އޭނާ ބަދަލުވީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށެވެ. ނަމަވެސް، ފަހުން ވެސް ބާސެލޯނާ އިން ވަނީ މެސީ ގެންނަން މަސައްކަތް ކޮށްފަ އެވެ. 

ދާދި ފަހުން ދިން އިންޓަވިޔުއެއްގައި ބާސެލޯނާގެ ކުރީގެ ކުޅުންތެރިޔާ އަދި އެ ކުލަބުގެ ކޯޗު ޒަވީ ބުނީ، 2023 ވަނަ އަހަރު މެސީ އަލުން ބާސެލޯނާ އަށް އަންނަން ހުރިހާ ކަމެއް ނިމުނު ކަމަށެވެ. އެގޮތުން 2022 ވަނަ އަހަރުގެ ފީފާ ވޯލްޑް ކަޕަށް ފަހު، މެސީ ބާސެލޯނާ އަށް ބަދަލުވުމުގެ ހުރިހާ ކަމެއް ފުރިހަމަކޮށް ނިމުނު ކަމަށް ޒަވީ ބުންޏެވެ. 

އެގޮތުން ޒަވީ ބުނީ މެސީ ބާސެލޯނާ އަށް ގެނައުމަށް ސްޕެނިޝް ލީގުން ވެސް ފެހި ސިގްނަލް ލިބިފައި އޮތްއިރު، މެސީ ވެސް ހުރީ ބާސެލޯނާ އަށް އަންނަން ބޭނުންވެފަ އެވެ. ނަމަވެސް، އަލުން މެސީ ބާސެލޯނާ އަށް އައުން ހުއްޓުވީ އެ ކުލަބުގެ ރައީސް ލަޕޯޓާ ކަމަށް ޒަވީ ބުންޏެވެ. އެގޮތުން މެސީ އަނެއްކާ ބާސެލޯނާ އަށް ގެނައުމަކީ އެ ކުލަަބަށް މާލީ ގޮތުން ބޮޑަ ބުރަ އަކަށް ވާނެ ކަމެއް ކަމަށާއި، އެކަން ކުރަން ފުރުސަތު ނުދެވޭނެ ކަމަށް ލަޕޯޓާ އޭނާ ގާތުގައި ބުނި ކަމަށް ޒަވީ ހާމަ ކުރި އެވެ.

މީގެ އިތުރުން ޒަވީ ބުނީ އެކަމުގައި ސްޕެނިޝް ލީގުން އެއްވެސް މައްސަލައެއް ދިމާ ނުވާ ކަަމަށެވެ. އަދި މެސީގެ ބައްޕަ، ޖޯޖް މެސީ އިތުރަށް ފައިސާ ބޭނުންވާ ކަމަށް ޑިމާންޑު ކޮށްފައި ވެސް ނުވާ ކަމަށް ޒަވީ ބުންޏެވެ. އޭގެ ބަދަލުގައި އަލުން މެސީ ބާސެލޯނާ އަށް ގެންނަން ދެކޮޅު ހެދީ ލަޕޯޓާ ކަމަށާއި، އެކަމަށް ނޫނެކޭ ބުނީ ލަޕޯޓާގެ މީހުން ކަމަށް ޒަވީ ބުންޏެވެ. 

ޒަވީ މި ވާހަކަތަައް ދައްކާފައި މި ވަނީ، ބާސެލޯނާގެ ރައީސް ކަމުގެ ތިން ވަނަ ދައުރެއް ހޯއްދެވުމަށް ލަޕޯޓާ މަސައްކަތް ކުރައްވަމުން އަންނަ ވަގުތެއްގަ އެވެ. މާޗު މަހުގެ 15 ވަނަ ދުވަހު ބާސެލޯނާގެ އިންތިޚާބު އޮންނައިރު، ރައީސް ކަމަށް ވާދަ ކުރަނީ ލަޕޯޓާ އާއި، ވިކްޓާ ފޮންޓް އެވެ. މީގެ ކުރިން 2021 ވަނަ އަހަރު ބާސެލޯނާގެ ރައީސް ކަަމަށް ލަޕޯޓާ ވަޑައިގެންނެވީ، މެސީ ކުލަބުގައި ބަހައްޓާނެ ކަމަށް ސަޕޯޓަރުންނަށް ވައުދު ވެގެންނެވެ. ނަމަވެސް، މެސީ ބާސެލޯނާ ދޫކޮށްލަން ޖެހުމުން ލަޕޯޓާ އަށް އެތައް ބައެއްގެ ނުރުހުން އަމާޒުވެފައިވެ އެވެ.