އިނގިރޭސި ބަސް ދަސްނުކުރެވުނީތީ ހިތާމަ ކުރަން: މެސީ

ދުނިޔޭގެ މަޝްހޫރު ފުޓްބޯޅަ ތަރި ލިއޮނަލް މެސީ، އޭނާގެ އަމިއްލަ ދިރިއުޅުމުގައި އެންމެ ބޮޑަށް ހިތާމަކުރާ އެއް ކަމަކީ ޒުވާން ދުވަސްވަރު އިނގިރޭސި ބަސް ނުކިޔެވުނުކަން ކަމަށް ހާމަކޮށްފިއެވެ. މެސީ ބުނި ގޮތުގައި ބައިނަލްއަގުވާމީ ކެރިއަރުގައި ބައެއް ފަހަރު މިކަމުގެ ސަބަބުން އޭނާއަށް "އެއްޗެއް ނޭނގޭ މީހެއްގެ" އިހުސާސް ކުރެވޭ ކަމަށެވެ.

އެމެރިކާގެ މޭޖަރ ލީގު ސޮކާ (އެމް.އެލް.އެސް) ގެ އިންޓަ މިއާމީ ސީ.އެފް އަށް މިހާރު ކުޅެމުންދާ އާޖެންޓީނާގެ އުމުރުން 38 އަހަރުގެ ކެޕްޓަން ބުނީ، ބަހުގެ ހުރަސްތަކުގެ ސަބަބުން އޭނާގެ ކެރިއަރުގައި ބައްދަލުވި ނުފޫޒުގަދަ ޝަޚުސިއްޔަތުތަކާ ފުރިހަމައަށް މުއާމަލާތްކުރުމަށް ބައެއް ފަހަރު ހުރަސްތަކެއް ކުރިމަތިވެފައިވާ ކަމަށެވެ.

"މީރޯ ޑި އަޓްރަސް" ޕޮޑްކާސްޓުގައި ވާހަކަދައްކަމުން މެސީ ބުނީ، ކުޑައިރު އިނގިރޭސި ބަސް ދަސް ނުކުރެވުނީތީ ވަރަށް ބޮޑަށް ހިތާމަކުރާ ކަމަށެވެ. މެސީ ބުނި ގޮތުގައި އެ ދުވަސްވަރު އިނގިރޭސި ބަސް ކިޔަވަން ވަގުތު އޮތް ނަމަވެސް، އޭނާއަށް އެކަން ކުރެވިފައި ނުވާތީ އެކަމާ މިއަދު ވަރަށް ބޮޑަށް ދެރަވާ ކަމަށެވެ.

މެސީ އިތުރަށް ބުނި ގޮތުގައި، ދުނިޔޭގެ ފެންވަރުގެ ފާހަގަކޮށްލެވޭ މޮޅު ޝަޚުސިއްޔަތުތަކާ ބައްދަލުވެ، ވާހަކަދައްކާލަން ލިބުނު ބައެއް ފުރުސަތުތަކުގައި، ބަސް ނޭނގުމުގެ ސަބަބުން އޭނާއަކީ އެއްވެސް އެއްޗެއް ނޭނގޭ މީހެއް ކަމުގެ އިހުސާސް ކުރެވުނު ހާލަތްތައް ކުރިމަތިވި ކަމަށެވެ.

އޭނާ ބުނީ، "އަހަރެންގެ ވަގުތުތައް ބޭކާރުކޮށްލެވުން އެއީ ކިހާ މޮޔަކޮށް ހެއްޔޭ" އަބަދުވެސް ހިތަށް އަރާ ކަމަށެވެ. އަދި ޒުވާން އުމުރުގައި އެކަމުގެ މުހިންމުކަން އިހުސާސް ނުކުރެވުނު ކަމަށްވެސް މެސީ ފާހަގަކުރިއެވެ.

އުމުރުން 13 އަހަރުގައި އާޖެންޓީނާގެ ރޮސާރިއޯއިން ބާސެލޯނާއަށް ބަދަލުވެ، އެ ކްލަބުގެ މަޝްހޫރު "ލަ މާސިއާ" އެކަޑަމީން ތައުލީމު ހާސިލުކުރި މެސީ ބުނީ، އޭނާގެ އެ ތަޖުރިބާގެ އަލީގައި މިހާރު އޭނާގެ ދަރިންނަށް ނަސޭހަތްތެރިވާ ކަމަށެވެ.

މެސީ ބުނީ، ރަނގަޅު ތައުލީމެއް ހާސިލުކުރުމާއި، ކިޔެވުމުގެ މުހިންމުކަން މިއަދު އޭނާގެ ދަރިންނަށް ބުނެދޭ ކަމަށެވެ. އަދި ލިބޭ ފުރުސަތުތަކުގެ ބޭނުން ހިފުމަށް އަބަދުވެސް ދަރިންނަށް ބާރުއަޅާ ކަމަށާއި، އެކުދިންނަށް ލިބިފައިވާ ފުރުސަތުތަކަކީ އޭނާއަށް ލިބުނު ފުރުސަތުތަކަށްވުރެ ތަފާތު ފުރުސަތުތަކެއް ކަމަށްވެސް މެސީ ބުންޏެވެ.

ބަހުގެ މައްސަލައިގައި ހިތާމަ ހުރި ނަމަވެސް، އެމެރިކާގައި މެސީގެ ފަރާތުން ފެންނަނީ އޭނާގެ ފުޓްބޯޅައިގެ ހުނަރުވެރިކަމެވެ.

ޕެރިސް ސެއިންޓް ޖާމަން (ޕީ.އެސް.ޖީ) ދޫކޮށް 2023 ވަނަ އަހަރު އިންޓަ މިއާމީއާ ގުޅުނު ފަހުން، އާޖެންޓީނާގެ މި ލެޖެންޑް ވަނީ އެ ކްލަބަށް ލީގްސް ކަޕް، ސަޕޯޓާސް ޝީލްޑް އަދި އެމް.އެލް.އެސް ކަޕް ކާމިޔާބުކޮށްދިނުމުގައި މުހިންމު ދައުރެއް އަދާކޮށްފައެވެ. މީގެ އިތުރުން އޭނާ ވަނީ އެމް.އެލް.އެސް ގޯލްޑަން ބޫޓުވެސް ހާސިލުކޮށްފައެވެ.

އެފް.ސީ ބާސެލޯނާ، ޕީ.އެސް.ޖީ އަދި އިންޓަ މިއާމީގައި ހޭދަކުރި ތާރީޚީ ދުވަސްތަކާއި، 2022 ވަނަ އަހަރު އާޖެންޓީނާގެ ގައުމީ ޓީމަށް ވޯލްޑް ކަޕް ކާމިޔާބުކޮށްދިނުމާ ހަމައަށް އޭނާގެ ދިގު ކެރިއަރުގައި ލިބުނު ފިލާވަޅުތަކަށްވެސް މެސީ އަލިއަޅުވާލިއެވެ.

މެސީ ބުނީ، ފުޓްބޯޅައިގައި ހުރިހާ ކަމެއް ހާސިލުކޮށް އެންމެ އުސްމިނަށް ވާސިލުވެވުނު ނަމަވެސް، އެ ދަތުރުގައި ގިނަ ތަޖުރިބާތަކަކާއި ފިލާވަޅުތަކެއް ލިބިފައިވާ ކަމަށެވެ.

އޭނާ އިތުރަށް ބުނި ގޮތުގައި، ފުޓްބޯޅައަކީ ދިރިއުޅުމުގެ ބައެކެވެ. އެއީ ގިނަ ކަންތައްތަކެއް ދަސްކޮށްދީ، މުހިންމު ސިފަތަކެއް އުނގަންނައިދޭ ކަމެއް ކަމަށާއި، އޭގެ ސަބަބުން މުޅި އުމުރަށް ދެމިގެންދާ ގުޅުންތައް އުފެދި، ދުނިޔޭގެ އެކި ތަންތަން ބަލާލުމުގެ ފުރުސަތު ލިބޭ ކަމަށްވެސް މެސީ ފާހަގަކުރިއެވެ.