ޕީއެސްޖީގެ ކާމިޔާބީ ފާހަގަ ކުރުމުގެ ތެރެއިން 400 އަށް ވުރެ ގިނަ މީހުން ހައްޔަރު ކޮށްފި
1 ޖޫން 2026 | ހޯމަ 03:07ޕީއެސްޖީ އިން ޗެމްޕިއަންސް ލީގު ކާމިޔާބު ކުރުމުގެ އުފާާ ފާޅު ކުރުމުގެ ތެރޭގައި ވެސް، މިފަދަ ހަމަ ނުޖެހުން ތަކެއް ވަނީ ހިނގާފައި. އެހެންވެ، މިފަހަރު އިދާރާ ތަކުން މިފަދަ ޙާލަތަކަށް ތައްޔާރުވެ ތިބި ކަމަށާއި، ވަރަށް ވަރުގަދަ އަދި ޚަރުދަނާ ނިޒާމެއް ޤާއިމު ކޮށްފައިވާ ކަމަށް ފްރާންސްގެ އިންޓީރިއާ މިނިސްޓަރު ލޯރަންޒް ނޫނިއޭޒް ވިދާޅުވެފައިވޭ.
ޕީއެސްޖީ އިން ހޯދި ކާމިޔާބީ ފާހަގަ ކުރުމަށް ފްރާންސްގެ ވެރި ރަށް ޕެރިހުގައި ކުރިއަށް ގެންދިޔަ ޙަރަކާތް ހޫނުވެ، މަގު މަތީގައި ހުރި އުޅަނދު ތަކެއްގައި އަލިފާން ރޯކޮށްލާފައި. | ރޮއިޓާސް
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ޔުއެފާ ޗެމްޕިއަންސް ލީގު ކާމިޔާބު ކުރުމުގެ އުފާ ފާޅު ކުރުމުގެ ތެރޭގައި ސަޕޯޓަރުންނާއި ފުލުހުންނާ ދެމެދު ހިނގި ހަމަ ނުޖެހުން ތަކުގައި 400 އަށް ވުރެ ގިނަ މީހުން ހައްޔަރު ކޮށްފައިވާ ކަމަށް އިދާރާ ތަކުން ހާމަ ކޮށްފި އެވެ.
ފްރާންސްގެ ވެރި ރަށް ޕެރިހުގައި ބަސް އަދި ރޭލުގެ ޚިދުމަތް ތަކަށް ހުރަސް އެޅުނު ހަމަ ނުޖެހުންތައް ކޮންޓްރޯލް ކުރުމަށް ފުލުހުންގެ އެތައް ހާސް އޮފިސަރުންނަކަށް ވަނީ މަސައްކަތް ކުރަން ޖެހިފަ އެވެ. ހަމަ ނުޖެހުން ތަކުގައި ހިނގި ބައެއް ކަންތައް ތަކުގެ ތެރޭގައި ފުލުހުންގެ އޮފިސަރުންނަށް ވެސް ވަނީ އަނިޔާވެފަ އެވެ.
ޕީއެސްޖީ އިން ޗެމްޕިއަންސް ލީގު ކާމިޔާބު ކުރުމުގެ އުފާާ ފާޅު ކުރުމުގެ ތެރޭގައި ވެސް، މިފަދަ ހަމަ ނުޖެހުން ތަކެއް ވަނީ ހިނގައިފަ އެވެ. އެހެންވެ، މިފަހަރު އިދާރާ ތަކުން މިފަދަ ޙާލަތަކަށް ތައްޔާރުވެ ތިބި ކަމަށާއި، ވަރަށް ވަރުގަދަ އަދި ޚަރުދަނާ ނިޒާމެއް ޤާއިމު ކޮށްފައިވާ ކަމަށް ފްރާންސްގެ އިންޓީރިއާ މިނިސްޓަރު ލޯރަންޒް ނޫނިއޭޒް ވިދާޅުވެފައިވެ އެވެ.
ހޮނިހިރު ދުވަހުގެ ރޭ ޕީއެސްޖީ އިން ޗެމްޕިއަންސް ލީގު ކާމިޔާބު ކުރުމާ އެކު، އެ ޓީމުގެ އެތައް ހާސް ސަޕޯޓަރުން ތަކެއް ވަނީ ފްރާންސްގެ ޝާންޒެލިޒޭ ސަރަހައްދަށް ޖަމާވެފަ އެވެ. ސޯޝަލް މީޑިއާގައި ދައުރުވާ ބައެއް ފޮޓޯ ތަކުން ފެންނަ ގޮތުގައި މަގު މަތީގައި ހުރި ބައެއް އުޅަނދު ތަކަށް ގެއްލުން ވެފައިވާއިރު، ބައެއް ފިހާރަ ތަކުގެ ބިއްލޫރި ގަނޑު ވެސް ވަނީ ތަޅާލައިފަ އެވެ.
ހަމަ ނުޖެހުން ތަކުގައި ހަ އުޅަނދެއްގެ އިތުރުން، ދެ ވިޔަފާރިއަކާއި ބަސް ޝެލްޓަރެއް ހަލާކުވެފައިވާ ކަމަށް ފުލުހުން ވަނީ ބުނެފަ އެވެ. އޮތޯރިޓީ ތަކުން ބުނި ގޮތުގައި އާދީއްތަ ދުވަހުގެ ކުރީކޮޅު 416 މީހުން ހައްޔަރު ކޮށްފައިވާ އިރު، އޭގެ ތެރެއިން 280 މީހުން ހައްޔަރު ކޮށްފައި ވަނީ ވެރި ރަށް ޕެރިހުންނެވެ.
އިންޓީރިއާ މިނިސްޓަރު ވިދާޅުވީ ހަމަ ނުޖެހުން ތަކުގައި ހަތް އޮފިސަރަކަށް އަނިޔާވެފައިވާ ކަމަށާއި، އެއީ އެއްވެސް ޙާލަތެއްގައި ބަލައި ގަނެވޭނެ ކަމެއް ނޫން ކަމަށެވެ.
