މެކްރޮން އިރުމަތީ އެފްރިކާ އަށް، ބޭނުމަކީ އެފްރިކާގައި ފްރާންސްގެ ނުފޫޒު ގަދަ ކުރުން

އެފްރިކާ ބައްރުގައި ފްރާންސްގެ ނުފޫޒު ގަދަ ކުރުމަށް ކުރަމުން އަންނަ މަސައްކަތުގެ ތެރެއިން، ފްރާންސްގެ ރައީސް އިމަނުއެލް މެކްރޮން އިރުމަތީ އެފްރިކާގެ ޤައުމު ތަކަށް ކުރައްވާ ރަސްމީ ދަތުރުފުޅެއް ފައްޓަަވައިފި އެވެ.

މި ދަތުރުފުޅަކީ ހުޅަނގު އެފްރިކާގައި ކުރިން ފްރާންސްގެ ދަށުގައި އޮތް ޤައުމުތަކާ އެކު އޮތް ގުޅުން ހީނަރުވެ ކުރިމަތިވި ގޮންޖެހުން ތަކަށް ފަހު، އެ ބައްރުގައި ފްރާންސްގެ ދައުރު އަލުން ބައްޓަން ކުރުމަށް ކުރައްވާ ދަތުރުފުޅެކެވެ.

ހޮނިހިރު ދުވަހު މިޞްރުން ފެއްޓެވި ތިން ޤައުމުގެ މި ދަތުރުފުޅުގައި މެކްރޮން ދެން ވަޑައިގަންނަވާނީ ކެންޔާ އަދި އިތިއޯޕިއާ އަށެވެ. މި ދަތުރުފުޅުގެ މައިގަނޑު މަޤުސަދަކީ އިސްތިއުމާރީ ދައުރަށް ފަހު އޮތް ގުޅުން ބަދަލުކޮށް، އެފްރިކާގެ ޤައުމު ތަކާ އެކު ގާތް އަދި އެކުވެރި ގުޅުމެއް ޤާއިމު ކުރުމެވެ. 

މިދަތުރުފުޅުގެ ތެރެއިން އާދީއްތަ ދުވަހާއި ހޯމަ ދުވަހު ކެންޔާގައި ބާއްވާ ޚާއްސަ ސަމިޓެއްގައި މެކްރޮން ބައިވެރިވެ ވަޑައިގަންނަވާނެ އެވެ. އިނގިރޭސި ބަހުން ވާހަކަ ދައްކާ އެފްރިކާގެ ޤައުމެއްގައި މެކްރޮން ބައިވެރިވެ ވަޑައިގަންނަވާ މިފަދަ ފުރަތަމަ ސަމިޓޫ ކަމަށްވާއިރު، "އެފްރިކާ ފޯވާޑް" ސަމިޓުގައި އެފްރިކާގެ ލީޑަރުންނާއި ވިޔަފާރިވެރިން ބައިވެރިވާނެ އެވެ. 

މި ބައްދަލުވުން ތަކުގެ ތެރެއިން ފްރާންސް އާއި ކެންޔާގެ ކުންފުނި ތަކުގެ މެދުގައި އިޤްތިޞާދީ އަދި ވިޔަފާރީގެ ގުޅުން ބަދަހި ކުރުމަށް މުހިންމު އެއްބަސްވުން ތަކެއްގައި ސޮއި ކުރުމަށް ވެސް ވަނީ ހަމަޖެހިފަ އެވެ. 

މެކްރޮންގެ މި ދަތުރުފުޅު ނިންމަވާލެއްވުމަށް ހަމަޖެހިފައި ވަނީ ބުދަ ދުވަހު އިތިއޯޕިއާގެ އެޑިސް އަބާބާގަ އެވެ. އެ ތަނުގައި އިތިއޯޕިއާގެ ސަރުކާރުގެ އިސްވެރިންނާ ބައްދަލު ކުރެއްވުމުގެ އިތުރުން، އެފްރިކާގެ ސަލާމަތާއި ސުލްޙައާ ގުޅޭ ގޮތުން އެފްރިކަން ޔޫނިއަންގެ މައި އިދާރާގައި ބާއްވާ މަޝްވަރާ ތަކުގައި ވެސް މެކްރޮން ބައިވެރިވެ ވަޑައިގަންނަވާނެ އެވެ. 

މިދަތުރުފުޅަކީ އެފްރިކާގެ ބައެއް ސަރަހައްދު ތަކުގައި ފްރާންސްއާ ދެކޮޅަށް އުފެދިފައިވާ ނުރުހުންތައް ކުޑަކޮށް، އިޤްތިޞާދީ އަދި ސަލާމަތީ ގުޅުންތައް އާރާސްތު ކުރުމަށް ފްރާންސް އިން ކުރަމުންދާ މުހިންމު މަސައްކަތެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ސިފަ ކޮށްފައިވެ އެވެ.