ޖެހި ޖެހިގެން ދެ ފަހަރު ފައިނަލް ކުޅުމަކީ ކުރަން އުނދަގޫ ކަމެއް، ޕީއެސްޖީ އިން ކުރީ އުނދަގޫ ދަތުރެއް: އެންރީކޭ
30 މެއި 2026 | ހޮނިހިރު 05:46ޗެމްޕިއަންސް ލީގަކީ ޔޫރަޕުގެ އެންމެ ޝަރަފުވެރި މުބާރާތް ކަމަށާއި، ޖެހި ޖެހިގެން ދެ ވަނަ ފަހަރަށް އެ މުބާރާތުގެ ފައިނަލް އަށް އައުމަށް ޕީއެސްޖީ އިން ކުރީ ފަސޭހަ ދަތުރެއް ނޫން ކަމަށް އެންރީކޭ ބުނި. ޕީއެސްޖީ އަކީ ޗެމްޕިއަން ޓީމު ކަމަށާއި، ނަމަވެސް އެހެން އެއްވެސް ޓީމަކަށް ކުރިމަތި ނުވާ ފަދަ އުނދަގޫ ތާވަލަކާ ޕީއެސްޖީ އަށް ކުރިމަތިލާން ޖެހުނު ކަމަށް އެންރީކޭ ބުނި.
ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޕީއެސްޖީގެ ކޯޗު އެންރީކޭ. | ގެޓީ އިމޭޖަސް
ޔުއެފާ ޗެމްޕިއަންސް ލީގުގެ ފައިނަލްގައި ޖެހި ޖެހިގެން ދެ އަހަރު ކުޅުމަކީ ކޮންމެ ޓީމަކަށް ވެސް ކުރަން އުނދަގޫ ކަމެއް ކަމަށް، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)ގެ ކޯޗު ލުއިސް އެންރީކޭ ބުނެފި އެވެ.
މިދިޔަ އަހަރުގެ ޗެމްޕިއަންސް ލީގުގެ ފައިނަލްގައި އިންޓަރ މިލާން ބަލިކޮށް، ޕީއެސްޖީ އިން ވަނީ އެ ކުލަބުގެ ތާރީޚުގައި ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކޮށްފަ އެވެ. މިއަހަރުގެ ފައިނަލްގައި ޕީއެސްޖީ ނިކުންނާނީ އާސެނަލްއާ ދެކޮޅަށެވެ. މިއީ ޕީއެސްޖީ އަށް ތާރީޚީ ދަތުރަކަށް ވާއިރު، އެންރީކޭ ބުނީ އެންމެ ފަހުގެ ޗެމްޕިއަން ޓީމަކީ ޕީއެސްޖީ ކަމަށް ވީ ނަމަވެސް، ފައިނަލް މެޗުގެ ފޭވަރިޓުންނަކީ ޕީއެސްޖީ ކަމަށް ނުދެކޭ ކަމަށެވެ.
ޗެމްޕިއަންސް ލީގަކީ ޔޫރަޕުގެ އެންމެ ޝަރަފުވެރި މުބާރާތް ކަމަށާއި، ޖެހި ޖެހިގެން ދެ ވަނަ ފަހަރަށް އެ މުބާރާތުގެ ފައިނަލް އަށް އައުމަށް ޕީއެސްޖީ އިން ކުރީ ފަސޭހަ ދަތުރެއް ނޫން ކަމަށް އެންރީކޭ ބުންޏެވެ. ޕީއެސްޖީ އަކީ ޗެމްޕިއަން ޓީމު ކަމަށާއި، ނަމަވެސް އެހެން އެއްވެސް ޓީމަކަށް ކުރިމަތި ނުވާ ފަދަ އުނދަގޫ ތާވަލަކާ ޕީއެސްޖީ އަށް ކުރިމަތިލާން ޖެހުނު ކަމަށް އެންރީކޭ ބުންޏެވެ. އެހެން ނަމަވެސް، އެ ގޮންޖެހުން ތަކުގެ ސަބަބުން ޓީމު އިތުރަށް ވަރުގަދަވެ، ކުރިއެރުން ތަކެއް ލިބުނު ކަމަށް އެންރީކޭ ބުންޏެވެ.
މުޅި މުބާރާތުގައި ޕީއެސްޖީ އިން ދެއްކި ކުޅުމާ މެދު ހިތްހަމަ ޖެހޭކަން ހާމަ ކުރަމުން އެންރީކޭ ބުނީ، ޗެމްޕިއަންސް ލީގުގެ ހުރިހާ މެޗެއްގައި ވެސް އެ ޓީމުން ވަނީ ވަކި ޚާއްސަ ފަލްސަފާއެއްގެ ދަށުން އެއް ގޮތަކަށް ކުޅުން ބައްޓަން ކޮށްފައި ކަމަށެވެ. އަދި ޓީމުގެ އެ ސާބިތު ކަމަކީ އަލުން ފައިނަލް އަށް ދަތުރު ކުރުމަށް ލިބުނު އެންމެ ބޮޑު ބާރު ކަމަށް އޭނާ ގަބޫލު ކުރެ އެވެ. ޗެމްޕިއަންސް ލީގުގައި ގާތް ގަނޑަކަށް ކުޅުނު ހުރިހާ މެޗެއްގެ ކޮންޓްރޯލް އޮތީ ޕީއެސްޖީ އަތުގައި ކަމަށާއި، ޖެހި ޖެހިގެން ދެ ފައިނަލް ކުޅުމަކީ ކޮންމެ ކުލަބަކަށް ވެސް ކުރަން އުނދަގޫ، އަދި ތާރީޚީ ކަމެއް ކަމަށް އޭނާ ބުންޏެވެ.
ފައިނަލްގައި ޕީއެސްޖީއާ ދެކޮޅަށް ނުކުންނަ އާސެނަލްއާ ގުޅޭ ގޮތުން ވާހަކަ ދައްކަމުން އެންރީކޭ ވަނީ އެ ޓީމުގެ ކޯޗު މިކޭލް އާޓެޓާ ކުރަމުންދާ މަސައްކަތަށް ވަރަށް ބޮޑަށް ތައުރީފު ކޮށްފަ އެވެ. އާސެނަލް މިހާރު އޮތް ފެންވަރަކީ އޭނާ ހައިރާންވާ ކަމެއް ނޫން ކަމަށާއި، އެއީ އާޓެޓާ އެ ކުލަބުގައި ހޭދަ ކުރި ހަތް އަހަރުގެ ތެރޭގައި ބިނާކުރި ވަރު ގަދަ ޓީމެއްކަން ފެންނަން އޮތް ކަމަށް އެންރީކޭ ބުންޏެވެ. އަދި އާސެނަލް އަކީ އިނގިރޭސި ޕްރިމިއާ ލީގު ކާމިޔާބު ކުރުމަށް ވެސް ހައްގު ޓީމެއްގެ ގޮތުގައި އެންރީކޭ ސިފަ ކުރި އެވެ.
