އާސެނަލް ބަލިކޮށް، ޕީއެސްޖީ އިން ޗެމްޕިއަންސް ލީގު ދިފާއު ކޮށްފި

ޔުއެފާ ޗެމްޕިއަންސް ލީގުގެ ފައިނަލްގައި އާސެނަލްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ތަށި ދިފާއު ކޮށްފި އެވެ.

ހަންގޭރީގެ ބުޑަޕެސްޓުގައި ހޮނިހިރު ދުވަހުގެ ރޭ ކުޅުނު ފައިނަލް މެޗު ޕީއެސްޖީ އިން ކާމިޔާބު ކުރީ ޕެނަލްޓީގައި ކުރި ހޯދައިގެންނެވެ. މެޗުގެ ފުރަތަމަ ހާފުގައި އާސެނަލް އިން ލަަނޑު ޖަހައި ކުރި ހޯދާފައި ވަނިކޮށް، ދެ ވަނަ ހާފުގައި ޕީއެސްޖީ އިން ނަތީޖާ ހަމަހަމަ ކުރި އެވެ. 

މެޗު ފަށައިގެން ހަ ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. ޕީއެސްޖީގެ އޭރިޔާ ބޭރުން ލިބުނު ބޯޅަ ހިފައިގެން އޭރިޔާ ތެރެއަށް ވަދެ، ގޯލަށް ފޮނުވާލައިގެން އެ ލަނޑު އާސެނަލް އަށް ޖަހައިދިނީ ކައި ހަވާޓްޒް އެވެ. އޭގެ ފަހުން ވެސް ފުރަތަމަ ހާފުގައި އާސެނަލް އިން ވަނީ ލަނޑު ޖަހަން މަސައްކަތް ކޮށްފަ އެވެ.

 ދެ ވަނަ ހާފުގައި ޕީއެސްޖީ އިން ކުޅުން ރަނގަޅު ކުރިއިރު، އެ ޓީމުން ނަތީޖާ ހަމަހަމަ ކުރީ ލިބުނު ޕެނަލްޓީ އަކުންނެވެ. އެއީ އާސެނަލްގެ އޭރިޔާ ތެރެއިން ޕީއެސްޖީގެ ކްވިޗާ ކްވަރެޝްކޭލިއާ އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮށް ޕީއެސްޖީ އަށް ނަތީޖާ ހަމަހަމަ ކޮށްދިނީ އޮސްމާން ޑެމްބެލޭ އެވެ. 

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމާ އެކު، އިތުރު ވަގުތުގެ ދެ ހާފު ވަނީ ކުޅެފަ އެވެ. އެ ދެ ހާފުގައި ވެސް އެއްވެސް ޓީމަކަށް ލަނޑެއް ނުޖެހުމުން، ނަތީޖާ ނެރުމަށް ޖެހީ ޕެނަލްޓީ އެވެ. ޕެނަލްޓީގައި ޕީއެސްޖީ އިން ހަތަރު ޕެނަލްޓީ ކާމިޔާބު ކުރިއިރު، އާސެނަލް އަށް ކާމިޔާބު ކުރެވުނީ ތިން ޕެނަލްޓީ އެވެ.

ޕީއެސްޖީގެ ގޮންޒާލޯ ރާމޯސް އާއި، ޑިސެއާ ޑޯއޫ އާއި، އަޝްރަފް ޙަކީމީ އަދި ލޫކާ ބެރާާލްޑޯ ވަނީ ޕެނަލްޓީ ކާމިޔާބު ކޮށްފަ އެވެ. އެ ޓީމުގެ ނޫނޯ މެންޑޭސްގެ ޕެނަލްޓީ އާސެނަލްގެ ގޯލު ކީޕަރު ވަނީ މަތަ ކޮށްފަ އެވެ. އާސެނަލް އަށް ކާމިޔާބު ކުރެވުނު ތިން ޕެނަލްޓީ އަކީ ވިކްޓަ ޔޮކަރޭޝް އާއި ޑެކްލަން ރައިސް އަދި ގެބްރިއެލް މާޓިނެލީގެ ޕެނަލްޓީ އެވެ. އާސެނަލްގެ އެބްރެޗީ އެޒޭ އާއި ގަބްރިއެލް މަގާޅައެސްގެ ޕެނަލްޓީ ކާމިޔާބެއް ނުވި އެވެ.

މިއީ ޕީއެސްޖީ އިން އެ ޓީމުގެ ތާރީޚުގައި ޗެމްޕިއަންސް ލީގު ކާމިޔާބު ކުރި ދެ ވަނަ ފަހަރެވެ. މިދިޔަ އަހަރުގެ ފައިނަލްގައި ޕީއެސްޖީ އިން ވަނީ އިންޓަރ މިލާން ބަލިކޮށް، ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކޮށްފަ އެވެ. އަނެއްކޮޅުން، މިއީ އާސެނަލް އިން ޗެމްޕިއަންސް ލީގުގެ ފައިނަލްގައި ކުޅެ، ބަލިވި ދެ ވަނަ ފަހަރެވެ. މީގެ ކުރިން 2006 ވަނަ އަހަރުގެ ޗެމްޕިއަންސް ލީގުގެ ފައިނަލްގައި ވެސް އާސެނަލް ވަނީ ބަލިވެފަ އެވެ.