ޖެހި ޖެހިގެން ފަސް ވަނަ ފަހަރަށް ޕީއެސްޖީ އިން ފްރާންސް ލީގު ކާމިޔާބު ކޮށްފި

ފްރާންސް ލީގުގައި ލެންސްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން ލީގު ދިފާއު ކޮށްފި އެވެ.

ޕީއެސްޖީ އިން ލީގުގެ ޗެމްޕިއަންކަން ކަށަވަރު ކޮށްފައި ވަނީ ބުދަ ދުވަހުގެ ރޭ ލެންސްއާ ދެކޮޅަށް ކުޅުނު މެޗުން މޮޅުވެގެންނެވެ. ލެންސްގެ ދަނޑުގައި ކުޅުނު މެޗު ޕީއެސްޖީ އިން ކާމިޔާބު ކޮށްފައި ވަނީ 2-0 އިންނެވެ. މެޗުގެ ފުރަތަމަ ހާފުގައި ޕީއެސްޖީ އިން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާާފުގެ 29 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ކްވިޗާ ކްވަރެޝްކޭލިއާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އޮސްމާން ޑެމްބެލޭ އެވެ. މެޗުގައި ޕީއެސްޖީ އިން އެ ޓީމުގެ ދެ ވަނަ ލަނޑު ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު ޕީއެސްޖީ އަށް ޖަހައިދިނީ އިބްރާހިމް އެމްބާއޭ އެވެ. އެއީ ޑެޒެއާ ޑޫއޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާ އެކު ޕީއެސްޖީ އިން ފްރާންސް ލީގު ކާމިޔާބު ކޮށްފައިވާއިރު، އެއް ވަަނައިގައި އެ ޓީމު އޮތީ 33 މެޗުން 76 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ލެންސް އަށް ލިބެނީ 67 ޕޮއިންޓެވެ. މިއީ ޕީއެސްޖީ އިން ޖެހި ޖެހިގެން ފްރާންސް ލީގު ކާމިޔާބު ކުރި ފަސް ވަނަ ފަހަރެވެ. އަނެއް ކޮޅުން މިއީ ޕީއެސްޖީ އިން ފްރާންސް ލީގު ކާމިޔާބު ކުރި 14 ވަނަ ފަހަރެވެ.