ފްރާންސްގައި ޖޫން މަހު އޮންނަ ޖީ7 ސަމިޓުގައި ޓްރަމްޕް ބައިވެރިވާ ކަމަށް ހާމަ ކޮށްފި

އަންނަ ޖޫން މަހު ފްރާންސްގައި ބޭއްވުމަށް ހަމަޖެހިފައިވާ ޖީ7 ސަމިޓުގައި އެމެރިކާގެ ރައީސް ޑޮނަލްޑް ޓްރަމްޕް ބައިވެރިވެ ވަޑައިގަންނަވާނެ ކަމަށް، އެމެރިކާގެ ރިޔާސީ ގަނޑުވަރު ވައިޓް ހައުސް އިން ކަށަވަރު ކޮށްދީފި އެވެ.

ވައިޓް ހައުސްގެ އޮފިޝަލަކާ ހަވާލާދީ އޭއެފްޕީ އިން ބުނީ، އީރާންގެ މައްސަލަ އާއި ވިޔަފާރީގެ ޓެރިފްތަކާ ގުޅިގެން އެމެރިކާ އާއި އެކުވެރި ޤައުމު ތަކުގެ ދެ މެދުގައި ނުތަނަވަސްކަން އުފެދިފައިވާ ދަނޑިވަޅެއްގައި ވެސް، ޓްރަމްޕް މި ސަމިޓަށް ވަޑައިގަތުމަށް މިހާރު ނިންމަވާފައިވާ ކަމަށެވެ. 

ދުނިޔޭގެ އިޤްތިޞާދީ ގޮތުން އެންމެ ކުރިއަރާފައިވާ ހަތް ޤައުމު ހިމެނޭ، ގުރޫޕް އޮފް ސެވަން ނުވަތަ ޖީ7 ގެ ސަމިޓު ބޭއްވުމަށް ހަމަޖެހިފައި ވަނީ ޖޫން މަހުގެ 15 ވަަނަ ދުވަހުން ފެށިގެން، 17 ވަނަ ދުވަހުގެ ނިޔަލަށް ފްރާންސްގެ އެވިއަންގަ އެވެ. މީގެ ކުރިން މި ބައްދަލުވުމުގައި ޓްރަމްޕް ބައިވެރިވެ ވަޑައިގަންނަވާކަން ކަށަވަރު ކުރެވިފައި ނުވެ އެވެ. 

މިއަހަރުގެ ޖަނަވަރީ މަހުގެ ތެރޭގައި ވައިޓް ހައުސް އިން ބުނެފައި ވަނީ، ޓްރަމްޕްގެ ތާވަލްއާ ގުޅޭ ގޮތުން ފްރާންސް އިން ސަމިޓު ބާއްވާ ތާރީޚަށް ބަދަލު ތަކެއް ގެނެސްފައިވާ ކަމަށެވެ. ފާހަގަކޮށްލެވޭ ގޮތުގައި ޖޫން މަހުގެ 14 ވަނަ ދުވަހަކީ ޓްރަމްޕްގެ 80 ވަނަ އުފަން ދުވަހެވެ. އެ ދުވަހ ވައިޓް ހައުސްގައި ޚާއްސަ ޙަރަކާތެެއް އަދި އިވެންޓެއް ބޭއްވުމަށް ވެސް ހަމަޖެހިފައިވެ އެވެ. 

އެކްސިއޯސް ނޫހުން ރިޕޯޓު ކޮށްފައިވާ ގޮތުގައި މި ސަމިޓުގައި އާޓިފިޝަލް އިންޓެލިޖެންސް (އޭއައި) އާއި، ބައިނަލްއަޤުވާމީ ވިޔަފާރީ އަދި ކުށްތަކާ ދެކޮޅަށް ކުރެވޭ މަސައްކަތްތަކާ ގުޅޭ ގޮތުން މަޝްވަރާ ކުރުމަށް ޓްރަމްޕް ބޭނުންފުޅުވެ އެވެ. ނަމަވެސް، މި ސަމިޓު ބާއްވަނީ އެމެރިކާ އާއި ޖީ7 ގެ އެހެން މެމްބަރު ޤައުމުތަކާ ދެމެދު ބޮޑެތި ޚިޔާލު ތަފާތުވުން ތަކެއް އުފެދިފައިވާ ވަގުތެއްގަ އެވެ. ޚާއްސަކޮށް މިދިޔަ ފެބްރުވަރީ މަހުގެ ތެރޭގައި އީރާންއާ ދެކޮޅަށް ޓްރަމްޕް ފެއްޓެވި ހަނގުރާމައިގެ ސަބަބުން، ޤައުމު ތަކުގެ މެދުގައި ވަނީ ނުތަނަވަސްކަން އުފެދިފަ އެވެ.

އީރާން އިން ހޮރްމޫޒް ކަނޑު އޮޅި ބަންދު ކުރުމާ ގުޅިގެން ދުނިޔޭގެ ބާޒާރުގައި ތެލުގެ އަގު އިންތިހާ އަށް އުފުލިފައިވާއިރު، އެ ސަރަހައްދުގެ ސަލާމަތްތެރިކަން ކަށަވަރު ކުރުމަށް އެމެރިކާގެ އެކުވެރި ޤައުމު ތަކުން އެހީތެރިން ނުދޭތީވެ، ޓްރަމްޕް ވަނީ އެ ޤައުމު ތަަކަށް ވަރަށް ބޮޑަށް ފާޑު ވިދާޅުވެފަ އެވެ. 

އަނެއްކޮޅުން އެމެރިކާ އާއި އިޒްރޭލް އެކުވެގެން ކުރަމުން އަންނަ މި ހަނގުރާމައިގެ ސަބަބުން އެ ޤައުމު ތަކުގެ އިޤްތިޞާދަށް ކުރާ ނޭދެވޭ އަސަރުތަކާ މެދު ހުޅަނގުގެ ޤައުމު ތަކުން ވަނީ ކަންބޮޑުވުން ފާޅު ކުރަމުންނެވެ. މީގެ އިތުރުން ޓްރަމްޕްގެ ސަރުކާރުން ބޭރުގެ މުދަލުން ނަގާ ޓެރިފް ނުވަތަ ޑިއުޓީ ބޮޑު ކޮށްފައިވާ މައްސަލަ އަކީ ވެސް ޤައުމު ތަކުގެ މެދުގައި އޮތް ކަންބޮޑުވުމެކެވެ. 

ފްރާންސްގައި އޮންނަ ޖީ7 ސަމިޓަށް ޓްރަމްޕް ވަޑައިގަންނަވާނެކަން ކަށަވަރު ކުރެވިފައި ވީ ނަމަވެސް، ޖުލައި މަހުގެ ފަހު ކޮޅު ތުރުކީގައި ބޭއްވުމަށް ހަމަޖެހިފައިވާ ނޭޓޯ ސަމިޓުގައި ޓްރަމްޕް ބައިވެރިވެ ވަޑައިގަންނަވާކަން އަދި ކަށަވަރެއް ނުވެ އެވެ. ޖީ7 ގައި ހިމެނެނީ އިނގިރޭސިވިލާތް، ކެނެޑާ، ފްރާންސް، ޖަރުމަނު، އިޓަލީ، ޖަޕާން އަދި އެމެރިކާ އެވެ. ކޮންމެ އަހަރަކު ވެސް މި ޤައުމު ތަކުގެ ތެރެއިން ޤައުމަކުން އިސް ސަމިޓް ތަކާއި، ވަޒީރުންގެ ފެންވަރުގެ ބައްދަލުވުންތައް އިންތިޒާމު ކުރަމުން ގެންދެ އެވެ.