ހޮރްމޫޒް ކަނޑުއޮޅިން ދަތުރު ކުރި ފްރާންސްގެ މުދާ އުފުލާ ބޯޓަކަށް ހަމަލާ ދީފި
މި ހަމަލާގެ ސަބަބުން، އެ އުޅަނދުގެ ފަޅުވެރިންގެ ތެރެއިން ބައެއް މީހުންނަށް އެކިވަރުގެ އަނިޔާތައް ލިބިފައިވާ ކަމަށް ސީއެމްއޭ ސީޖީއެމް އިން ބުނެފައިވޭ. އޭގެ އިތުރުން، ހަމަލާގެ ސަބަބުން އުޅަނދަށް ވެސް ބޮޑެތި ގެއްލުން ތަކެއް ލިބިފައިވާ ކަމަށް އެ ކުންފުނީގެ ބަޔާނުގައި ވަނީ ފާހަގަ ކޮށްފައި.
ފްރާންސްގެ މުދާ އުފުލާ މަޝްހޫރު ކުންފުންޏެއް ކަމަށްވާ، ސީއެމްއޭ ސީޖީއެމްގެ އުޅަނދެއް. | ރޮއިޓާސް
ހޮރްމޫޒް ކަނޑުއޮޅިން ދަތުރު ކުރި ފްރާންސްގެ މުދާ އުފުލާ ބޯޓަކަށް ހަމަލާ ދީފައިވާ ކަމަށް ރިޕޯޓު ކޮށްފި އެވެ.
ފްރާންސްގެ މުދާ އުފުލާ މަޝްހޫރު ކުންފުންޏެއް ކަމަށްވާ، ސީއެމްއޭ ސީޖީއެމްގެ އުޅަނދެއް، އަންގާރަ ދުވަހު ހޮރްމޫޒް ކަނޑު އޮޅިން ދަތުރު ކުރަނިކޮށް ހަމަލާ ދީފައިވާ ކަމަށް އެ ކުންފުނިން ވަނީ ކަށަވަރު ކޮށްދީފަ އެވެ.
އެ ކުންފުނިން ނެރުނު ބަޔާނެއްގައި ބުނެފައި ވަނީ، ހަމަލާގެ އަމާޒަކަށްވީ އެ ކުންފުނީގެ "ސަން އެންޓޯނިއޯ" ނަމަކަށް ކިޔާ އުޅަނދެއް ކަމަށެވެ. މި ހަމަލާ ދީފައި ވަނީ އެ އުޅަނދު ހޮރްމޫޒް ކަނޑު އޮޅި ހުރަސްކޮށް، ދަތުރު ކުރަމުން ދަނިކޮށް ކަމަށް ވެސް އެ ކުންފުނިން ވަނީ މައުލޫމާތު ދީފަ އެވެ.
މި ހަމަލާގެ ސަބަބުން، އެ އުޅަނދުގެ ފަޅުވެރިންގެ ތެރެއިން ބައެއް މީހުންނަށް އެކިވަރުގެ އަނިޔާތައް ލިބިފައިވާ ކަމަށް ސީއެމްއޭ ސީޖީއެމް އިން ބުނެފައިވެ އެވެ. އޭގެ އިތުރުން، ހަމަލާގެ ސަބަބުން އުޅަނދަށް ވެސް ބޮޑެތި ގެއްލުން ތަކެއް ލިބިފައިވާ ކަމަށް އެ ކުންފުނީގެ ބަޔާނުގައި ވަނީ ފާހަގަ ކޮށްފަ އެވެ.
އަނިޔާ ލިބުނު ފަޅުވެރިންނާ ގުޅޭ ގޮތުން އެ ކުންފުނިން ބުނީ، ހަމަލާގައި ޒަޚަމުވި މީހުން މިހާރު އުޅަނދުން ބާލާފައިވާ ކަމަށެވެ. އަދި އެ މީހުންނަށް ބޭނުންވާ ޞިއްޙީ ފަރުވާގެ ކަންކަން މިހާރު ފޯރުކޮށްދެމުންދާ ކަމަށް ވެސް އެ ކުންފުނިން ބުނެފައިވެ އެވެ.
މި ހަމަލާއާ ގުޅޭ އިތުރު ތަފްސީލެއް، ނުވަތަ ހަމަލާ ދިނީ ކޮން ބައެއް ކަމެއް އެ ކުންފުނިން ހާމަ ކޮށްފައި ނުވެ އެވެ. ނަމަވެސް، މިއީ ބައިނަލްއަޤުވާމީ ކަނޑު ދަތުރު ފަތުރުގެ ސަލާމަތަށް އޮތް ނުރައްކަލެއްގެ ގޮތުގައި، ކަމާ ގުޅުން ހުރި ފަރާތްތަކުން އަންނަނީ ސިފަ ކުރަމުންނެވެ.
މަސްދަރު: ރޮއިޓާސް
