ޕީއެސްޖީ ވަރުގަދަ، އެންރީކޭ ހުރީ ތާރީޚީ ކާމިޔާބަކަށް ކެތްމަދުވެފައި

ޔުއެފާ ޗެމްޕިއަންސް ލީގުގެ ސެމީ ފައިނަލްގައި ޖަރުމަނުގެ ބަޔާން މިއުނިކްގެ މައްޗަށް ކުރި ހޯދައި، ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ފައިނަލްގެ ޖާގަ ހޯދިއިރު، ތާރީޚީ ކާމިޔާބެއް ހޯދަން ބޭނުންވާ ކަމަށް އެ ޓީމުގެ ކޯޗު ލުއިސް އެންރީކޭ ބުނެފި އެވެ. 

ބަޔާންއާ ދެކޮޅަށް ކުޅުނު ސެމީ ފައިނަލްގެ ދެ ވަނަ ލެގަށް ފަހު ނޫސްވެރިންނާ ވާހަކަ ދައްކަމުން އެންރީކޭ ބުނީ، އެ މެޗަކީ ވަރަށް މަތީ ފަންތީގެ މެޗެއް ކަމަށެވެ. ފުރަތަމަ ލެގާ އަޅާ ބަލާއިރު، ދެ ޓީމުން ވެސް ވަރަށް ރަނގަޅަށް ޑިފެންސް ކޮށްގެން، ވަރުގަދަ ކުޅުމެއް ކުޅުނު ކަމަށް އެންރީކޭ ވަނީ ފާހަގަ ކޮށްފަ އެވެ.

އެންރީކޭ ބުނީ ޕީއެސްޖީ އިން މެޗު ފެށީ ވެސް ވަރަށް ރަނގަޅަށް ކަމަށާއި، އެ ޓީމުން ފުރުސަތު ތަކެއް ވެސް ހޯދި ކަމަށެވެ. މެޗު ފަށައިގެން ކުޑަ ވަގުތު ކޮޅެއްގެ ތެރޭގައި ލަނޑު ޖެހުމަށް ފަހު، ޕީއެސްޖީ އަށް އިތުރު ހިތްވަރެއް ލިބުނު ކަމަށް ވެސް އެންރީކޭ ބުންޏެވެ. ނަމަވެސް، ބަޔާން އިން ވެސް ދިޔައީ ފުލުފުލުގައި އެޓޭކު ކުރަމުން ކަމަށާއި، އެކަމުގެ ސަބަބުން ޕީއެސްޖީ އަށް ވަރަށް ބޮޑު އުނދަގުލެއް ދިމާވި ކަމަށް ވެސް އެންރީކޭ ބުންޏެވެ.

އެކަން ފާހަގަކޮށް އެންރީކޭ ބުނީ، ޕީއެސްޖީ އިން މެޗަށް ނިކުތީ ޑިފެންސް ކޮށްގެން ކުޅެން ވިސްނައިގެން ނޫން ކަމަށެވެ. އެހެން ނަމަވެސް، މެޗުގައި ޕީއެސްޖީ އިން ޑިފެންސްގައި އާދަޔާ ޚިލާފު ކަމެއް ދައްކާފައިވާ ކަމަށް އެންރީކޭ ބުންޏެވެ. އޭނާ ބުނީ ޕީއެސްޖީގެ ކުޅުންތެރިން ދައްކައި ދިނީ އެ ކުޅުންތެރިންގެ ފެންވަރު ކަމަށާއި، އެ ކުޅުންތެރިން ދައްކައި ދިނީ ޕީއެސްޖީގެ އަސްލު ކޮލެޓީ ކަމަށް އެންރީކޭ ބުންޏެވެ. އެންރީކޭ ބުނީ ޕީއެސްޖީގެ ކުޅުންތެރިންނާ މެދު އޭނާ ހިތްހަމަ ޖެހޭ ކަމަށެވެ. 

ޖެހި ޖެހިގެން ދެ ވަނަ ފަހަރަށް ޕީއެސްޖީ އިން ޗެމްޕިއަންސް ލީގުގެ ފައިނަލްގެ ޖާގަ ހޯދާފައިވާއިރު، އެންރީކޭ ހުރީ ތާރީޚީ ކާމިޔާބީ އަކަށް ބޭނުންވެފަ އެވެ. އެންރީކޭގެ އިރުޝާދުގެ ދަށުން މިދިޔަ ސީޒަންގައި ޕީއެސްޖީ އިން ޗެމްޕިއަންސް ލީގު ކާމިޔާބު ކޮށްފައިވާއިރު، އެއީ އެ ކުލަބުގެ ތާރީޚުގައި ވެސް ޗެމްޕިއަންސް ލީގު ކާމިޔާބު ކުރެވުނު ފުރަތަމަ ފަހަރެވެ. 

ޕީއެސްޖީ އަކީ މިހާތަނަށް އޭނާ އިރުޝާދު ދިން އެންމެ ވަރުގަދަ ޓީމުތޯ ސުވާލު ކުރުމުން އެންރީކޭ ބުނީ، އެ ސުވާލަށް ޖަވާބު ދޭން އުނދަގޫ ވާނެ ކަމަށެވެ. ނަމަވެސް، އޭނާގެ ނަޒަރުގައި ޕީއެސްޖީގައި ހޭދަ ކޮށްފައިވާ ތިން އަހަރަށް ބަލާއިރު، އެ މުއްދަތުގެ ތެރޭގައި އެންމެ ވަރުގަދަ ޓީމަކީ ޕީއެސްޖީއޭ ބުނުމުގެ ފުރުސަތު އެބަ އޮތެވެ.