ބަޔާންގެ މައްޗަށް ކުރި ހޯދައި، ތަށި ދިފާއު ކުރަން ޕީއެސްޖީ އިން ފައިނަލް އަށް

ޔުއެފާ ޗެމްޕިއަންސް ލީގުގެ ސެމީ ފައިނަލްގައި ޖަރުމަނުގެ ބަޔާން މިއުނިކްގެ މައްޗަށް ކުރި ހޯދައި، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ފައިނަލްގެ ޖާގަ ހޯދައިފި އެވެ. 

ޕީއެސްޖީގެ އަމިއްލަ ދަނޑުގައި ކުޅުނު ސެމީ ފައިނަލްގެ ފުރަތަމަ ލެގު އެ ޓީމުން ވަނީ 5-4 އިން ކާމިޔާބު ކޮށްފަ އެވެ. އެހެންވެ، ދެ ވަނަ ލެގުން ބަލި ނުވެ ފަރުޖައްސާލައިގެން ޕީއެސްޖީ އަށް އޮތީ ފައިނަލްގެ ޖާގަ ލިބޭ ގޮތަށެވެ. ބުދަ ދުވަހުގެ ރޭ ދަންވަރު ބަޔާންގެ އަމިއްލަ ދަނޑުގައި ކުޅުނު ދެ ވަނަ ލެގު ނިމުނީ ދެ ޓީމު 1-1 އިން އެއްވަރު ވެގެންނެވެ.

މެޗު ފަށައިގެން ތިން ވަނަ މިނެޓުގައި ޕީއެސްޖީ އިން ވަނީ ބަޔާން ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ޕީއެސްޖީ އަށް ޖަހައިދިނީ ފްރާންސްގެ އޮސްމާން ޑެމްބެލޭ އެވެ. އެ ލަނޑު ޖަހަން ޑެމްބެލޭ އަށް ފުރުސަތު ތަނަވަސްކޮށްދިނީ ކްވިޗާ ކްވަރެޝްކޭލިއާ އެވެ. އޭގެ ފަހުން ޕީއެސްޖީ އިން ލީޑު ފުޅާ ކުރުމަށް މަސައްކަތް ކުރިއިރު، ބަޔާން އަށް ވަނީ ނަތީޖާ ހަމަހަމަ ކުރާނެ ރަނގަޅު ފުރުސަތު ލިބިފަ އެވެ.

މެޗުގައި ބަޔާންގެ ހަމައެކަނި ލަނޑު އެ ޓީމުން ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު ބަޔާން އަށް ޖަހައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ އަލްފަންސޯ ޑޭވިސް ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ. އޭގެ ކުރިން ވެސް މެޗުގައި ބަޔާން އަށް ވަނީ ލަނޑު ޖަހާނެ ގިނަ ފުރުސަތު ތަކެއް ލިބިފަ އެވެ. 

ބަޔާންގެ ދަނޑުގައި ކުޅުނު ދެ ވަނަ ލެގު އެއްވަރުވީއިރު، ޕީއެސްޖީ އިން ފައިނަލްގެ ޖާގަ ހޯދީ އެގްރިގޭޓް ނަތީޖާ 6-5 އިންނެވެ. މިއީ ޕީއެސްޖީ އިން މުބާރާތުގެ ފައިނަލްގައި ޖެހި ޖެހިގެން ކުޅޭނެ ދެ ވަނަ ފަހަރެވެ. މިދިޔަ ސީޒަންގެ ޗެމްޕިއަންސް ލީގު ޕީއެސްޖީ އިން ކާމިޔާބު ކުރީ ފައިނަލްގައި އިންޓަރ މިލާން ބަލިކޮށްގެންނެވެ. އެއީ ޕީއެސްޖީގެ ތާރީޚުގައި އެ ޓީމުން ޗެމްޕިއަންސް ލީގު ކާމިޔާބު ކުރި ފުރަތަމަ ފަހަރެވެ. 

މި ސީޒަންގެ ޗެމްޕިއަންސް ލީގުގެ ފައިނަލް ކުޅުމަށް ހަަމަޖެހިފައި ވަނީ ހަންގޭރީގެ ބުޑަޕެސްޓުގަ އެވެ. މެއި މަހުގެ 31 ވަނަ ދުވަހުގެ ރޭ އޮންނަ ފައިނަލްގައި ޕީއެސްޖީ ނިކުންނާނީ އާސެނަލްއާ ދެކޮޅަށެވެ.