މެކްރޮންގެ މޫނު މަތީގައި އަނބިކަނބަލުން ޖެއްސެވީ، "ތިބާ އަކީ ވަރަށް ރީތި މީހެއް" ކަމަށް ވިދާޅުވެ އެހެން އަންހެނަކަށް ކުރެއްވި މެސެޖު ފެނުމުން

ފްރާންސްގެ ރައީސް އިމަނުއެލް މެކްރޮންގެ މޫނު މަތީގައި އޭނާގެ އަނބިކަނބަލުން ބްރިޖިޓް މެކްރޮން ޖެއްސެވީ، މެކްރޮން އާއި އީރާންގެ އެކްޓްރެސްއަކާ ދެމެދު ކޮށްފައިވާ މެސެޖުތައް ފެނިގެން ކަމަށް ރިޕޯޓު ކޮށްފި އެވެ. 

މި ހާދިސާ ހިނގާފައި ވަނީ 2025 ވަނަ އަހަރުގެ މެއި މަހުގެ ތެރޭގައި މެކްރޮން އާއި ބްރިޖިޓް ވިއެޓްނާމްގެ ހެނޯއީ އަށް ކުރެއްވި ރަސްމީ ދަތުރުފުޅުގެ ތެރެއިންނެވެ. އެ ދަތުރުފުޅުގައި މެކްރޮން ފްލައިޓުން ފައިބައި ވަޑައިގަންނަވަނިކޮށް، މެކްރޮންގެ މޫނު މަތީގައި ބްރިޖިޓް އަތުން ޖައްސަވާ މަންޒަރު ފެނެ އެވެ. 

ނޫސްވެރިޔާ ފްލޯރިއަން ޓާޑިފް މިދިޔަ ބުދަ ދުވަހު ނެރުނު "އޭން (އޯލްމޯސްޓް) ޕާފެކްޓް ކަޕްޕް) ނަމަކަށް ކިޔާ ފޮތުގައި ވަނީ އެ ހާދިސާގެ ވާހަކަ ގެނެސްފަ އެވެ. އެގޮތުން މެކްރޮންގެ އަނބިކަނބަލުން ބްރިޖިޓް، އޭނާ ދެކެ ކޯފާވީ އީރާންގެ އެކްޓްރެސްއެއް ކަމަށްވާ ގޮލްޝިފްތޭ ފަރަހާނީ އާއި މެކްރޮންއާ ދެމެދު ބަދަލު ކޮށްފައިވާ މެސެޖުތައް ފެނިގެން ކަމަށް ބުނެފައިވެ އެވެ. 

އުމުރުން 42 އަހަރުގެ ފަރަހާނީ އަށް މެކްރޮން ފޮނުވާފައިވާ މެސެޖުގައި ވިދާޅުވެފައި ވަނީ "ތިބާ އަކީ ވަރަށް ރީތި މީހެއް" ކަމަށެވެ. އެ ފޮތުގައި މި ވާހަކަ ބަޔާން ކޮށްފައިވާއިރު، ނޫސްވެރިޔާ ލިޔެފައި ވަނީ މެކްރޮންގެ އަނބިކަނބަލުންނަށް އެ މެސެޖު ފެނިވަޑައިގެންނެވި ކަމަށެވެ. 

މެކްރޮންގެ ދަތުރުފުޅުގެ މަންޒަރުތައް ވަގުތުން ގެނެސް ދެމުން ދިޔަ ކެމެރާ ތަކަށް ވަނީ، މެކްރޮންގެ އަނބިކަނބަލުން އޭނާގެ މޫނު މަތީގައި ޖެއްސެވި މަންޒަރު އަރައިފަ އެވެ. އެ މަންޒަރު ސޯޝަލް މީޑިއާގައި ވަރަށް ބޮޑަށް ދައުރުވެގެން ދިޔަ އެވެ. ޕެރިސް މެޗް ނޫހުގައި ޝާއިއު ކޮށްފައިވާ މި ފޮތުގައި ބުނެފައި ވަނީ، ބްރިޖިޓް އެންމެ ބޮޑަށް ކޯފާވީ މެސެޖުގައި އޮތް ވާހަކައަށް ވުރެ ބޮޑަށް، އެ މެސެޖުން ދޭހަވާ މާނައިގެ ސަބަބުންނެވެ. އަދި އޭނާގެ މަގާމު ގެއްލިގެން ދާ ކަމުގެ އިހުސާސް ބްރިޖިޓް އަށް ކުރެވުނު ކަމަށް އޭނާގެ ގާތް އެކުވެރިޔަކާ ހަވާލާދީ އެ ފޮތުގައި ވަނީ ބުނެފަ އެވެ. 

ނަމަވެސް، ފްރާންްސްގެ ފަސްޓް ލޭޑީގެ ތަރުޖަމާނު ވަނީ އެ ފޮތުގައި ލިޔެފައިވާ ވާހަކަތައް ދޮގު ކުރައްވައިފަ އެވެ. ތަރުޖަމާނު ވިދާޅުވީ ބްރިޖިޓް ދުވަހަކު ވެސް އެކަމަނާގެ ފިރިކަލުން އަަދި ފްރާންސްގެ ރައީސް މެކްރޮންގެ ފޯނު ޗެކް ނުކުރައްވާ ކަމަށެވެ. އަދި އެ ފަދަ ހާދިސާއެއް ހިނގާފައި ނުވާނެ ކަމަށް، މިދިޔަ މާޗު މަހުގެ ތެރޭގައި ފޮތުގެ މުސައްނިފަށް ވެސް އަންގާފައިވާނެ ކަމަށް އޭނާ ވިދާޅުވި އެވެ.

މީގެ އިތުރުން އީރާންގެ އެކްޓްރެސް ފަރަހާނީ ވެސް ވަނީ، ފްރާންސްގެ ރައީސް މެކްރޮން އާއި އޭޭނާއާ ދެމެދު އެކަހަލަ ގުޅުމެއް އޮތް ކަަމަށް ބުނެ ދެކެވޭ ވާހަކަތައް ދޮގު ކޮށްފަ އެވެ. އޭނާ ބުނީ ބައެއް މީހުންނަށް ލޯބި މަދުވުމުން، އެ ހުސްކަން ފޫބެއްދުމަށް މިފަދަ ޚިޔާލީ ވާހަކަތައް އުފައްދަނީ ކަމުގަ އެވެ. 

މި ހާދިސާ ހިނގި ދުވަސްވަރު، ފްރާންސްގެ ރިޔާސީ ގަނޑުވަރު އެލީޒޭ ޕެލަސް އިން ވަނީ މައްސަލަ އޮއްބާލަން މަސައްކަތް ކޮށްފަ އެވެ. ރައީސްގެ ޓީމުން އޭރު ބުނެފައި ވަނީ، އެ ވީޑިއޯ އަކީ އޭއައި ބޭނުން ކޮށްގެން އުފައްދާފައިވާ އެއްޗަކަށް ވެދާނެ ކަމަށެވެ. ނަމަވެސް، ފަހުން ބުނެފައި ވަނީ އެއީ ދެމަފިރިން ސަމާސާ ކޮށްލުމުގެ ތެރޭގައި ހިނގި ކަމެއް ކަމަށެވެ. މެކްރޮން ވެސް ވަނީ އެއީ ސަމާސާއެއް ކަމަށާއި، އެކަމާ ކަންބޮޑު ނުވުމަށް އެދިވަޑައިގެންފަ އެވެ.