އަނެއްކާ ވެސް ތާރީޚީ ކާމިޔާބެއް ހޯދަން އާސެނަލް އޮތީ ތައްޔާރަށް: އާޓެޓާ

ޔުއެފާ ޗެމްޕިއަންސް ލީގުގެ ފައިނަލްގައި އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ނިކުންނައިރު، އަނެއްކާ ވެސް ތާރީޚީ ކާމިޔާބެއް ހޯދަން އާސެނަލް އޮތީ ތައްޔާރަށް ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ހެންގޭރީގެ ބުޑަޕެސްޓުގައި ހޮނިހިރު ދުވަހުގެ ރޭ ޕީއެސްޖީއާ ދެކޮޅަށް ނިކުންނައިރު، މިއީ އާސެނަލް އިން ޗެމްޕިއަންސް ލީގުގެ ފައިނަލްގައި ކުޅޭ ދެ ވަނަ ފަހަރެވެ. މީގެ ކުރިން 2006 ވަނަ އަހަރު އާސެނަލް އިން ފައިނަލްގައި ކުޅުނުއިރު، އެ ފަހަރު ވަނީ ބަލިވެފަ އެވެ. ޕީއެސްޖީއާ ދެކޮޅަށް ފައިނަލްގައި ނިކުންނައިރު، އާސެނަލް އޮތީ އިނގިރޭސި ޕްރިމިއާ ލީގު ކާމިޔާބު ކޮށްފަ އެވެ. 

ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާޓެޓާ ބުނީ، ޓީމުގެ ތައްޔާރީތައް ކުރިއަށް ދިޔައީ ވަރަށް ރަނގަޅަށް ކަމަށާއި، އާސެނަލް އޮތީ މެޗަށް ތައްޔާރު ވެގެން ކަމަށެވެ. އާޓެޓާ ބުނީ އާސެނަލް އިން އަންނަނީ ވަރަށް ފޯކަސް ކޮށްގެން މަސައްކަތް ކުރަމުން ކަމަށެވެ. އެގޮތުން މި ސީޒަންގައި ޗެމްޕިއަންސް ލީގުގައި އާސެނަލް އިން ހޯދި ކާމިޔާބީ ތަކަކީ ބުރަ މަސައްކަތުގެ ނަތީޖާ ކަމަށް އާޓެޓާ ބުންޏެވެ. 

އާޓެޓާ ބުނީ ޗެމްޕިއަންސް ލީގު ކާމިޔާބު ކުރުމަށް އާސެނަލްގެ ކުޅުންތެރިން ވަރަށް ބުރަކޮށް މަސައްކަތް ކުރަން ޖެހޭނެ ކަމަށެވެ. މިދިޔަ ސީޒަންގެ ޗެމްޕިއަންސް ލީގުގައި ޕީއެސްޖީއާ ވާދަކޮށް ބަލިވެފައިވާއިރު، އާޓެޓާ ބުނީ އެކަމުން ހިތްވަރު ލިބިގަންނަން ޖެހޭ ކަމަށެވެ. އެއީ އާސެނަލް އަށް ލިބުނު ތަޖުރިބާ ތަކެއް ކަމަށާއި، އެކަމުން ފިލާާވަޅު ލިބިގަނެގެން ކުރިއަށް ދާން ޖެހޭ ކަމަށް އާޓެޓާ ބުންޏެވެ. ނަމަވެސް މިދިޔަ ސީޒަނާ އަޅާބަލާއިރު، ދެ ޓީމުން  ވެސް ބޮޑެތި ކުރިއެރުން ތަކެއް ހޯދާފައިވާ ކަމަށާއި، ފައިނަލް މެޗަށް ނިކުންނާނީ އެކަން އެނގި ތިބެ ކަމަށް އާޓެޓާ ބުންޏެވެ. 

މިއީ އާސެނަލްގެ ތާރީޚުގައި އެ ޓީމުން ޗެމްޕިއަންސް ލީގުގެ ފައިނަލް ކުޅޭ ދެ ވަނަ ފަހަރު ކަމަށްވާއިރު، އާޓެޓާ ބުނީ މިފަހަރު މުބާރާތް ކާމިޔާބުކޮށް ތާރީޚުން ޖާގަ ހޯދަން ބޭނުންވާ ކަމަށެވެ. އެ ކާމިޔާބު ހޯދުމަށް އާސެނަލް އޮތީ ވަރަށް ބޮޑަށް ތައްޔާރުވެ ކަމަށާއި، ޕީއެސްޖީ އަކީ ކޮން ފެންވަރެއްގެ ޓީމެއްކަން އާސެނަލް އަށް އިނގޭ ކަމަށް ވެސް އާޓެޓާ ބުންޏެވެ. ކާމިޔާބު ހޯދުމަށް އާސެނަލް އިން މުޅި މެޗުގައި ރަނގަޅަށް ކުޅެ، ހިތްވަރު ދައްކައި، އަދި ކާމިޔާބަށް ބޭނުން ވެގެން ކުޅެން ޖެހޭ ކަމަށް އާޓެޓާ ބުނެފައިވެ އެވެ. އެ ތިން ކަން ފުރިހަމަ ވެއްޖެ ނަމަ، އާސެނަލް އަށް މުބާރާތް ކާމިޔާބު ކުރެވޭނެ ކަމަށް ވެސް އާޓެޓާ ބުންޏެވެ. 

މި ސީޒަންގެ ޗެމްޕިއަންސް ލީގުގެ ފައިނަލް އަށް ނިކުންނައިރު، މި ސީޒަންގެ ޗެމްޕިއަންސް ލީގުގެ އެއްވެސް މެޗަކުން އާސެނަލް ބަލިވެފައި ނުވެ އެވެ.