އާޓެޓާ އަށް ކުރެވުނީ ތަފާތު އިޙުސާސެއް، ދެން އޮތީ ޗެމްޕިއަންސް ލީގު!

އާސެނަލް އިން އިނގިރޭސި ޕްރިމިއާ ލީގުގެ ތަށި އުފުލާލިއިރު، އެއީ ވަރަށް ތަފާތު އިޙުސާސެއް ކުރެވުނު ކަމެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ ލީގުގެ ފަހު މެޗުގައި އާދީއްތަ ދުވަހުގެ ރޭ ކްރިސްޓަލް ޕެލަސް ބަލި ކުރުމަށް ފަހު، އާސެނަލް އިން ޕްރިމިއާ ލީގުގެ ތަށި އުފުލާލުމަށް ފަހު އެވެ. އެ މެޗަށް ނިކުތްއިރު ވެސް އާސެނަލް އަށް ލީގުގެ ޗެމްޕިއަންކަން ކަށަވަރު ވެފައި އޮތުމުން، އެ ޓީމަށް މާ ބޮޑު ޕްރެޝަރެއް ނެތެވެ. އާސެނަލް އިން މި ވަނީ 22 އަހަރުގެ ދިގު އިންތިޒާރަކަށް ފަހު، ޕްރިމިއާ ލީގުގެ ތަށި އުފުލާލައިފަ އެވެ.

އެ ކާމިޔާބަށް ފަހު ނޫސްވެރިންނާ ވާހަކަ ދައްކަމުން އާޓެޓާ ބުނީ، އެކަމުން ކުރެވުނު އިޙުސާސް އާއި އެކަމުގެ އުފާ ދުލުން ބުނެދޭން ވެސް އުނދަގޫ ކަމަށެވެ. އާސެނަލް އަށް މިއީ ވަރަށް ތާރީޚީ ވަގުތު ކޮޅެއް ކަމަށާއި، މިއީ އެތައް އުފަލާއި، އެތައް ހިތްހަމަ ޖެހުމެއް ހިތަށް ވެރިވާ ވަގުތެއް ކަމަށް ވެސް އާޓެޓާ ބުންޏެވެ. އޭނާ ބުނީ މި ކާމިޔާބާއި، މި އުފާވެރި ކަމުގެ އެންމެ ބޮޑު ހިިއްސާދާރުންނަކީ އާސެނަލްގެ ކުޅުންތެރިން ކަމަށެވެ.

އާސެނަލް އާއެކު މި ފާއިތުވި މުއްދަތުގައި ކުރެވުނު މަސައްކަތާއި، ހޯދުނު ކާމިޔާބަށް ފަޚުވެރިވާ ކަމަށް އާޓެޓާ ބުންޏެވެ. އޭނާ ބުނީ އާސެނަލް އިން ކުރިއެރުން ހޯދަމުން އައީ، ހަރުފަތަކަށް ފަހު ހަރުފަތަކުން ކަމަށެވެ. އާސެނަލް އަށް އަގުހުރި އެތައް ކަމެއް ހާސިލު ކުރެވިފައިވާ ކަމަށް އާޓެޓާ ފާހަގަ ކުރި އެވެ. އޭނާާ ބުނީ އަބަދު ވެސް އާސެނަލްގެ އެންމެ ފަހުގެ އަމާޒަކީ ތަށިތައް ކާމިޔާބު ކުރުން ކަމަށާއި، ކާމިޔާބީ ހޯދުން ކަމަށެވެ. 

ޕްރިމިއާ ލީގަށް ފަހު، ޔުއެފާ ޗެމްޕިއަންސް ލީގުގެ ފައިނަލްގައި އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ނިކުންނައިރު، އާޓެޓާ ބުނީ އާސެނަލް އަށް ބޭނުން ވަނީ މިހާރު އޮތް ހިތްވަރާއި، އެ އަޒުމު ކަމަށެވެ. އެކަމާ ދެކޮޅަށް ގޮސްފި ނަމަ، އެއީ އާސެނަލް އަށް ހެދޭނެ ގޯހެއް ކަމަށް އޭނާ ސިފަ ކުރި އެވެ. ހަންގޭރީގެ ވެރި ރަށް ބުޑަޕެސްޓުގައި ކުޅޭ ފައިނަލް އަށް އިޝާރާތް ކުރަމުން އާޓެޓާ ބުނީ، ފައިނަލްގައި ކަންތައް ކުރަން ޖެހޭ ގޮތާ މެދު މިހާރު ވެސް ވާހަކަ ދެކެވިފައިވާ ކަމަށެވެ.

އިތުރަށް އާޓެޓާ ބުނީ، އާސެނަލް އިން މަޑުން ނުތިބޭނެ ކަމަށާއި ވީ އެންމެ އަވަހަކަށް ތައްޔާރީތައް ފަށާނެ ކަމަށެވެ. އާޓެޓާ ބުނީ އާސެނަލް އޮތީ ކުލަބުގެ ތާރީޚުގައި ފުރަތަމަ ފަހަރަށް ޗެމްޕިއަންސް ލީގު ކާމިޔާބުކޮށް، ޗެމްޕިއަންސް ލީގުގެ ތާރީޚީ ތަށި އުފުލާލުމަށް ހުރިހާ މަސައްކަތެއް ކުރަން ތައްޔާރަށް ކަމަށެވެ. އަދި އާސެނަލް އިން ފައިނަލް އަށް ނިކުންނާނީ ފުރިހަމަ އަށް ތައްޔާރު ވެގެން ކަމަށް އޭނާ ބުންޏެވެ.

މީގެ ކުރިން އާސެނަލް އިން ޕްރިމިއާ ލީގު ކާމިޔާބު ކޮށްފައި ވަނީ 2004 ވަނަ އަހަރު އެވެ. 22 އަހަރަށް ފަހު އާސެނަލް އިން ޕްރިމިއާ ލީގުގެ ތަށި އުފުލާލިއިރު، މިއީ އެ ޓީމުން އިންތިޒާރު ކުރި ބޮޑު ކާމިޔާބެކެވެ. މީގެ ކުރިން އާސެނަލް އިން ވަނީ 2006 ވަނަ އަހަރުގެ ޗެމްޕިއަންސް ލީގުގެ ފައިނަލްގައި ވާދަކޮށް، ނާކާމިޔާބާ ކުރިމަތިލާާން ޖެހިފަ އެވެ. އެހެންކަމުން މިއީ، 20 އަހަރުގެ ތެރޭގައި އާސެނަލް އިން ޗެމްޕިއަންސް ލީގުގެ ފައިނަލް ކުޅޭނެ ފުރަތަމަ ފަހަރެވެ.