ބާންލީ އަތުން މޮޅުވެ، އާސެނަލް އިން ލީގު ކާމިޔާބު ކުރުމާ ފިޔަވަޅަކާ ކައިރިއަށް

އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ކާމިޔާބު ކުރުމާ ފިޔަވަޅަކާ ކައިރި އަށް ޖެހިލައިފި އެވެ. 

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ހޯމަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން ހަމައެކަނި ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ވެސް އާސެނަލް އިން ދިޔައީ ރަނގަޅަށް ކުޅެ ލަނޑު ޖަހަން ފުރުސަތު ތަކެއް ހޯދަމުންނެވެ. އެގޮތުން އާސެނަލްގެ ލިއާންޑްރޯ ޓްރޮސާޑް ފޮނުވާލި ބޯޅަ އަމާޒުވީ ބާންލީގެ ގޯލުގެ އަރިމަތީ ދަނޑިއާ އެވެ. އޭގެ ފަހުން އާސެނަލްގެ ބުކަޔޯ ސަކާ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގައި އާސެނަލް އިން ލަނޑު ޖެހީ ފުރަތަމަ ހާފުގެ 37 ވަނަ މިނެޓުގަ އެވެ. އެއީ އާސެނަލް އަށް ލިބުނު ކޯނަރެއްގައި ސަކާ ހުރަސްކޮށްދިން ބޯޅަ، ބޮލުން ޖަހައި ގޯލަށް ވައްދައިގެން ހަވާޓްޒް ޖެހި ލަނޑެކެވެ. އޭގެ ފަހުން އާސެނަލް އަށް ލީޑު ފުޅާ ކޮށްދޭން ސަކާ އަށް ވެސް ފުރުސަތު ލިބުނެވެ.

މޮޅާ އެކު އާސެނަލް އިން މި ވަނީ ޕްރިމިއާ ލީގު ކާމިޔާބު ކުރުމުގެ އުންމީދު ބޮޑު ކޮށްފަ އެވެ. އެގޮތުން ލީގުގައި އަންގާރަ ދުވަހުގެ ރޭ ރަށުން ބޭރުގައި ބޯންމައުތާ ދެކޮޅަށް ކުޅޭ މެޗުން މެންޗެސްޓަރ ސިޓީ މޮޅު ނުވެއްޖެ ނަމަ، އާސެނަލް އަށް ލީގު ކަށަވަރުވީ އެވެ. އެ މެޗުން ސިޓީ މޮޅުވެއްޖެ ނަމަ، ލީގުގައި އާސެނަލްގެ ފަހު މެޗުގައި ރަށުން ބޭރުގައި ކްރިސްޓަލް ޕެލަސް ބަލިކޮށްގެން ލީގު ކާމިޔާބު ކުރެވޭނެ އެވެ.

މިވަގުތު އާސެނަލް އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 37 މެޗުން 82 ޕޮއިންޓާ އެކު އެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 77 ޕޮއިންޓެވެ.