ފަހު މެޗުން ވެސް މޮޅުވެ، އާސެނަލް އިން 22 އަހަރަށް ފަހު ލީގުގެ ތަށި އުފުލާލައިފި
މިއީ 22 އަހަރަށް ފަހު އާސެނަލް އިން ލީގުގެ ތަށި އުފުލާލި ފުރަތަމަ ފަހަރު. މީގެ ކުރިން އާސެނަލް އިން ވަނީ 2004 ވަނަ އަހަރު ލީގުގެ ޗެމްޕިއަންކަން ހޯދާފައި.
އާސެނަލް އިން ޕްރިމިއާ ލީގުގެ ތަށި އުފުލާލަނީ. | ރޮއިޓާސް
އިނގިރޭސި ޕްރިމިއަރ ލީގުގެ ފަހު މެޗުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން މޮޅެއް ހޯދުމާ އެކު، އާސެނަލް އިން ލީގުގެ ތަށި އުފުލާލައިފި އެވެ.
އާސެނަލްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ. މި މެޗަށް ނިކުތްއިރު ވެސް، އާސެނަލް އަށް ވަނީ ލީގުގެ ޗެމްޕިއަންކަން ކަށަވަރުވެފަ އެވެ.
މެޗުގެ ފުރަތަމަ ހާފުގެ 42 ވަނަ މިނެޓުގައި އާސެނަލް އަށް ލީޑު ނަގައިދިނީ ގަބްރިއެލް ޖީސުސް އެވެ. އެ ލަނޑު ޖަހަން ޖީސުސް އަށް ފުރުސަތު ތަނަވަސްކޮށްދިނީ ގަބްރިއެލް މާޓިނެލީ އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ނޯނީ މަޑުއޭކޭ ވާނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ކައި ހަވާޓްޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި ޕެލަސްގެ ހަމައެކަނި ލަނޑު، 89 ވަނަ މިނެޓުގައި ޖެހީ ޖިއަން ފިލީޕް މަޓޭޓާ އެވެ.
އެ މެޗަށް ފަހު އާސެނަލް އިން ވަނީ ޕްރިމިއާ ލީގުގެ ތަށި އުފުލާލައިފަ އެވެ. މިއީ 22 އަހަރަށް ފަހު އާސެނަލް އިން ލީގުގެ ތަށި އުފުލާލި ފުރަތަމަ ފަހަރެވެ. މީގެ ކުރިން އާސެނަލް އިން ވަނީ 2004 ވަނަ އަހަރު ލީގުގެ ޗެމްޕިއަންކަން ހޯދައިފަ އެވެ. އޭގެ ފަހުން މިވީ މުއްދަތުގައި އާސެނަލް އަށް އެކަން ކުރެވިފައި ނުވާއިރު، މިއީ އާސެނަލް އަށް ތާރީޚީ ކާމިޔާބެކެވެ.
މިކޭލް އާޓެޓާގެ އިރުޝާދުގެ ދަށުން އާސެނަލް އިން ރަނގަޅު ނަތީޖާ ތަކެއް ނެރެމުން އަންނައިރު، މި ސީޒަންގެ ޔުއެފާ ޗެމްޕިއަންސް ލީގު ކާމިޔާބު ކުރުމުގެ ފުރުސަތު ވެސް އާސެނަލް އަށް އެބަ އޮތެވެ. ޗެމްޕިއަންސް ލީގުގެ ފައިނަލްގައި އާސެނަލް ނިކުންނާނީ އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ.
