ޕީއެސްޖީ އިން މިހާތަނަށް ކުރިމަތިލާން ޖެހުނު އެންމެ ވަރުގަދަ ޓީމަކީ ބަޔާން: އެންރީކޭ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން މިހާތަނަށް ކުރިމަތިލާން ޖެހުނު އެންމެ ވަރުގަދަ ޓީމަކީ، ޖަރުމަނުގެ ބަޔާން މިއުނިކް ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.

އެންރީކޭ މިހެން ބުނީ، ބުދަ ދުވަހުގެ ރޭ ދަންވަރު ބަޔާންގެ އަމިއްލަ ދަނޑުގައި އެ ޓީމާ ދެކޮޅަށް ކުޅޭ ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގެ ކުރިން އޮތް ނޫސްވެރިންގެ ބައްދަލުވުމުގަ އެވެ. މިދިޔަ ހަފުތާގައި ޕީއެސްޖީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކޮށްފައި ވަނީ 5-4 އިންނެވެ.

ބަޔާންގެ ދަނޑުގައި އެ ޓީމާ ދެކޮޅަށް ނިކުންނައިރު، އެންރީކޭ ބުނީ ބަޔާން އަކީ މިހާތަނަށް ޕީއެސްޖީ އިން ކުރިމަތިލި އެންމެ ވަރުގަދަ ޓީމު ކަމަށެވެ. އަނެއްކާ ވެސް އެ ޓީމާ ދެކޮޅަށް ނިކުންނައިރު، ޕީއެސްޖީ އަށް ފައިދާ ނެގެން ހުރި މަދު ކަންތައް ތަކެއް ހުންނާނެ ކަމަށް އެންރީކޭ ބުންޏެވެ. ނަމަވެސް، ފުޓުބޯޅައިގައި ކޮންމެ ފަދަ ނަތީޖާއެއް ވެސް ނިކުމެދާނެ ކަމަށް އެންރީކޭ ވަނީ ފާހަގަ ކޮށްފަ އެވެ.

މީގެ އިތުރުން އެންރީކޭ ބުނީ ބަޔާންގެ އަމިއްލަ ދަނޑުގައި ކުޅެން ޖެހުމަކީ، އިންތިހާ އަށް އުނދަގޫ ވާނެ ކަމެއް ކަމަށެވެ. ނަމަވެސް، އެއީ ޕީއެސްޖީ އަށް ލިބޭނެ އިތުރު ހިތްވަރެއް ކަމަށް ފާހަގަކޮށް އެންރީކޭ ބުނީ، އެ ޓީމުން އަބަދު ވެސް ބަޔާން އަށް ފުރިހަމަ އިޙުތިރާމް ކުރާނެ ކަމަށެވެ. އެންރީކޭ ބުނީ ޕީއެސްޖީ އިން މަސައްކަތް ކުރާނީ އެ ޓީމުން ބޭނުންވާ ނަތީޖާ މެޗުން ނެރުމަށް ކަމަށެވެ.

ޕީއެސްޖީގެ ދަނޑުގައި ކުޅުނު މެޗުން މޮޅުވެފައި އޮތް ނަމަވެސް، ބަޔާންގެ ދަނޑުގައި ކުޅޭ މެޗުގައި ޑިފެންސިވް ގޭމެއް ކުޅެން ނުވިސްނާ ކަމަށް ވެސް އެންރީކޭ ބުންޏެވެ. ޕީއެސްޖީ އިން "ބަސް" އަތުރައިގެން ނުތިބޭނެ ކަމަށާއި، ޕީއެސްޖީ އިން މަސައްކަތް ކުރާނީ ލަނޑު ތަކެއް ޖަހައިގެން ފުރިހަމަ އިތުބާާރާ އެކު ފައިނަލް އަށް ދާން ކަމަށް ވެސް އެންރީކޭ ވަނީ ބުނެފަ އެވެ.

ބަޔާންގެ ދަނޑުގައި އެ ޓީމާ ދެކޮޅަށް ނިކުންނައިރު، މެޗުން ބަލި ނުވެ ފަރުޖައްސާލައިގެން ޕީއެސްޖީ އަށް މުބާރާތުގެ ފައިނަލްގެ ޖާގަ ހޯދޭނެ އެވެ. ޕީއެސްޖީ އަކީ އެންމެ ފަހުން ޗެމްޕިއަންސް ލީގު ކާމިޔާބު ކޮށްފައިވާ ޓީމު ކަމަށްވާއިރު، ޖެހި ޖެހިގެން ދެ ވަނަ އަހަރު ފައިނަލް ކުޅުމުގެ ފުރުސަތު ޕީއެސްޖީ އަށް އެބަ އޮތެވެ.