20 އަހަރަށް ފަހު އާސެނަލް ޗެމްޕިއަންސް ލީގުގެ ފައިނަލް އަށް
މިއީ ފާއިތުވި 20 އަހަރުގެ ތެރޭގައި އާސެނަލް އިން ޗެމްޕިއަންސް ލީގުގެ ފައިނަލްގެ ޖާގަ ހޯދި ފުރަތަމަ ފަހަރު. އެންމެ ފަހުން އާސެނަލް އިން ޗެމްޕިއަންސް ލީގުގެ ފައިނަލްގައި ކުޅެފައި ވަނީ 2006 ވަނަ އަހަރު އެވެ. ނަމަވެސް، އެ އަހަރުގެ ފައިނަލްގައި ވަނީ ބާސެލޯނާ އަތުން ބަލިވެފައި.
މެޗުގައި ލަނޑު ޖެހުމަށް ފަހު އާސެނަލްގެ ކުޅުންތެރިން އުފާ ފާޅު ކުރަނީ. | ރޮއިޓާސް
ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި އެތުލެޓިކޯ މެޑްރިޑް ބަލިކޮށް، އާސެނަލް އިން 20 އަހަރުގެ ތެރޭގައި ފުރަތަމަ ފަހަރަށް މުބާރާތުގެ ފައިނަލް އިން ޖާގަ ހޯދައިފި އެވެ.
ސެމީ ފައިނަލްގެ ފުރަތަމަ ލެގުގައި އެތުލެޓިކޯގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. އެހެންވެ މުބާރާތުގެ ފައިނަލްގެ ޖާގަ ލިބެން އޮތީ، ދެ ވަނަ ލެގުން މޮޅުވާ ޓީމަކަށެވެ. އަންގާރަ ދުވަހުގެ ރޭ އާސެނަލްގެ އަމިއްލަ ދަނޑުގައި ކުޅުނު ދެ ވަނަ ލެގުގައި އާސެނަލް އިން ވަނީ 1-0 އިން އެތުލެޓިކޯ ބަލިކޮށްފަ އެވެ.
މެޗު ފަށައިގެން އާސެނަލް އިން ދިޔައީ ރަނގަޅަށް ކުޅެ، އެތުލެޓިކޯ ކޮޅަށް ލަނޑު ޖަހަން މަސައްކަތް ކުރަމުންނެވެ. އެތުލެޓިކޯ އިން ވެސް ވަނީ ލިބެމުން ދިޔަ ފުރުސަތުގެ ބޭނުން ހިފަން މަސައްކަތް ކުރަމުންނެވެ. މެޗުގެ ފުރަތަމަ ހާފުގެ 45 ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އާސެނަލް އަށް ޖަހައިދިނީ ބުކަޔޯ ސަކާ އެވެ. އެ ލަނޑު ޖަހަން ސަކާ އަށް ފުރުސަތު ތަނަވަސްކޮށްދިނީ ލިއާންޑްރޯ ޓްރޮސާޑް އެވެ.
ދެ ވަނަ ލެގުން މޮޅުވެ، އާސެނަލް އިން މުބާރާތުގެ ފައިނަލްގެ ޖާގަ ހޯދާފައި މި ވަނީ އެގްރިގޭޓް ނަތީޖާ 2-1 އިންނެވެ. މިއީ ފާއިތުވި 20 އަހަރުގެ ތެރޭގައި އާސެނަލް އިން ޗެމްޕިއަންސް ލީގުގެ ފައިނަލްގެ ޖާގަ ހޯދި ފުރަތަމަ ފަހަރެވެ. އެންމެ ފަހުން އާސެނަލް އިން ޗެމްޕިއަންސް ލީގުގެ ފައިނަލްގައި ކުޅެފައި ވަނީ 2006 ވަނަ އަހަރު އެވެ. ނަމަވެސް، އެ އަހަރުގެ ފައިނަލްގައި ވަނީ ބާސެލޯނާ އަތުން ބަލިވެފަ އެވެ.
މިފަހަރުގެ ޗެމްޕިއަންސް ލީގުގެ ފައިނަލް ކުޅުމަށް ހަމަޖެހިފައި ވަނީ ހަންގޭރީގެ ބުޑަޕެސްޓުގަ އެވެ. ފައިނަލްގައި އާސެނަލްއާ ދެކޮޅަށް ނިކުންނާނެ ޓީމެއް ކަށަވަރު ވާނީ ބުދަ ދުވަހުގެ ރޭ ދަންވަރު ޕެރިސް ސެއިންޓް ޖާމަން (ޕީއެސްޖީ) އާއި ބަޔާން މިއުނިކް ބައްދަލު ކުރާ މެޗުންނެވެ. އާސެނަލް އިން ޗެމްޕިއަންސް ލީގުގެ ފައިނަލްގެ ޖާގަ ހޯދިއިރު، މި ސީޒަންގެ އިނގިރޭސި ޕްރިމިއާ ލީގު ކާމިޔާބު ކުރުމުގެ ފުރުސަތު ވެސް އެ ޓީމަށް އެބަ އޮތެވެ.
