ފުރަތަމަ ލެގުގައި އެތުލެޓިކޯ އާއި އާސެނަލް އެއްވަރު ވެއްޖެ

ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގުގައި އެތުލެޓިކޯ މެޑްރިޑް އާއި އާސެނަލް ބައްދަލު ކުރި މެޗު އެއްވަރު ވެގެން ނިމިއްޖެ އެވެ. 

އެތުލެޓިކޯގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި އާސެނަލް އިން ފުރަތަމަ ލަނޑު ޖަހައި ކުރި ހޯދާފައި ވަނިކޮށް، އެތުލެޓިކޯ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ ފަހު ވަގުތު އާސެނަލް އިން ލީޑު ނެގީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އެއީ އެތުލެޓިކޯގެ އޭރިޔާ ތެރެއިން އާސެނަލްގެ ވިކްޓާ ޔޮކަރޭޝް އަށް ކުރި ފައުލަކާ ގުޅިގެން، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮށް އާސެނަލް އަށް ލީޑު ނަގައިދިނީ ޔޮކަރޭޝް އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު އެތުލެޓިކޯ އިން ވަނީ ނަތީޖާ ހަމަހަމަ ކޮށްފަ އެވެ. އެތުލެޓިކޯ އިން ވެސް ލަނޑު ޖެހީ ޕެނަލްޓީ އަކުންނެވެ. އެއީ އާސެނަލްގެ އޭރިޔާ ތެރެއިން އެ ޓީމުގެ ބެން ވައިޓްގެ އަތުގައި ބޯޅަ ޖެހުމުން ރެފްރީ ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮށް އެތުލެޓިކޯ އަށް ނަތީޖާ ހަމަހަމަ ކޮށްދިނީ އާޖެންޓީނާގެ ހޫލިއަން އަލްވަރޭޒް އެވެ.

ސެމީ ފައިނަލްގެ ފުރަތަމަ ލެގު އެއްވަރުވެފައިވާއިރު، މި ދެ ޓީމު ބައްދަލު ކުރާ ސެމީ ފައިނަލްގެ ދެ ވަނަ ލެގު އޮންނާނީ އަންނަ ހަފުތާގައި އާސެނަލްގެ އަމިއްލަ ދަނޑުގަ އެވެ. މުބާރާތުގެ ފައިނަލް އިން ޖާގަ ލިބޭނީ އެ މެޗުން މޮޅުވާ ޓީމަކަށެވެ. އަނެއްކޮޅުން، މިއީ އާސެނަލް އިން މުބާރާތުގެ ސެމީ ފައިނަލްގައި ޖެހި ޖެހިގެން ކުޅޭ ދެ ވަނަ ފަހަރެވެ. މިދިޔަ އަހަރުގެ ސެމީ ފައިނަލްގައި އާސެނަލް ވަނީ، ޕެރިސް ސެއިންޓް ޖާާމަން (ޕީއެސްޖީ) އަތުން ބަލިވެފަ އެވެ.