ވާދަވެރި ކުޅުމަކަށް ފަހު، ފުރަތަމަ ލެގުގައި ޕީއެސްޖީ އިން ބަޔާން ބަލިކޮށްފި
ޕީއެސްޖީގެ ދަނޑުގައި ކުޅުނު މެޗުން އެ ޓީމު މޮޅުވެފައިވާއިރު، ދެ ވަނަ ލެގުގައި މި ދެ ޓީމު ބައްދަލު ކުރާ މެޗު އޮތީ އަންނަ ހަފުތާގައި ބަޔާންގެ އަމިއްލަ ދަނޑުގައި. އެ މެޗުން ބަލި ނުވެ ފަރު ޖައްސާލައިގެން ޕީއެސްޖީ އަށް މުބާރާތުގެ ފައިނަލްގެ ޖާގަ ހޯދެން އޮތްއިރު، ޕީއެސްޖީ ބަލިކޮށް ބަޔާން އަށް ވެސް ފައިނަލްގެ ޖާގަ ހޯދުމުގެ ފުރުސަތު އެބަ އޮތް.
މެޗުގައި ލަނޑު ޖެހުމަށް ފަހު ޕީއެސްޖީގެ ޑެމްބެލޭ އުފާ ފާޅު ކުރަނީ. | ރޮއިޓާސް
ޔުއެފާ ޗެމްޕިއަންސްް ލީގުގެ ސެމީ ފައިނަލްގެ ފުރަތަމަ ލެގުގައި ޖަރުމަނުގެ ބަޔާން މިއުނިކްއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.
ޕީއެސްޖީގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 5-4 އިންނެވެ. މެޗުގައި ބަޔާން އިން ލަނޑު ޖަހައި ކުރި ހޯދާފައި ވަނިކޮށް، ޕީއެސްޖީ އިން ވަނީ ފަހަތުން އަރައި ލީޑު ނަގައިފަ އެވެ. މެޗުގައި ދެ ޓީމުގެ ފަރާތުން ވެސް ވަނީ ވާާދަވެރި ކުޅުމެއް ފެނިފަ އެވެ.
މެޗު ފަށައިގެން 17 ވަނަ މިނެޓުގައި ބަޔާން އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. ނަމަވެސް، މެޗުގެ 24 ވަނަ މިނެޓުގައި ކްވިޗާ ކްވަރެޝްކޭލިއާ ވަނީ ލަނޑު ޖަހައި ޕީއެސްޖީ އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން މެޗުގެ 33 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ޔާއޯ ނެވެސް އެވެ.
ޕީއެސްޖީ އިން ލީޑު ނެގި ފަހުން ބަޔާން އިން ނަތީޖާ ހަމަހަމަ ވެސް ކުރި އެވެ. އެގޮތުން މެޗުގެ ފުރަތަމަ ހާފުު ނިމެން ހަތަރު މިނެޓަށް ވެފައި ވަނިކޮށް، ބަޔާން އަށް ނަތީޖާ ހަމަހަމަ ކޮށްދިނީ މައިކަލް އޮލައިސޭ އެވެ. ފުރަތަމަ ހާފުގެ އިތުރު ވަގުތުގައި ޕީއެސްޖީ އަށް ލިބުނު ޕެނަލްޓީ ކާމިޔާބުކޮށް، އަނެއްކާ އެ ޓީމަށް ލީޑު ނަގައިދިނީ އޮސްމާން ޑެމްބެލޭ އެވެ.
މެޗުގެ ދެ ވަނަ ހާފު ފަށައިގެން 11 ވަނަ މިނެޓުގައި ކްވަރެޝްކޭލިއާ ވަނީ ޕީއެސްޖީގެ ހަތަރު ވަނަ ލަނޑު ޖަހައިފަ އެވެ. އޭގެ ދެ މިނެޓު ފަހުން ޕީއެސްޖީގެ ފަސް ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ޑެމްބެލޭ އެވެ. ޕީއެސްޖީ އިން ތިން ލަނޑުގެ ލީޑެއް ނެގި ފަހުން، ގާތް ގާތުގައި ބަޔާން އިން ދެ ލަނޑު ޖެހި އެވެ.
އެގޮތުން މެޗުގެ 65 ވަނަ މިނެޓުގައި ބަޔާންގެ ތިން ވަނަ ލަނޑު ޖެހީ ޑަޔޮޓް އުޕަމެކާނޯ އެވެ. އޭގެ ތިން މިނެޓު ފަހުން ލުއިސް ޑިއާޒް ވަނީ ބަޔާންގެ ހަތަރު ވަނަ ލަނޑު ޖަހައި، ފަރަގު ކުޑަ ކޮށްފަ އެވެ. ނަމަވެސް، އިތުރު ލަނޑެއް ބަޔާން އަށް ޖެހިފައި ނުވާއިރު، ޕީއެސްޖީ އިން ވަނީ ފުރަތަމަ ލެގު ކާމިޔާބު ކޮށްފަ އެވެ.
ޕީއެސްޖީގެ ދަނޑުގައި ކުޅުނު މެޗުން އެ ޓީމު މޮޅުވެފައިވާއިރު، ދެ ވަނަ ލެގުގައި މި ދެ ޓީމު ބައްދަލު ކުރާ މެޗު އޮތީ އަންނަ ހަފުތާގައި ބަޔާންގެ އަމިއްލަ ދަނޑުގަ އެވެ. އެ މެޗުން ބަލި ނުވެ ފަރު ޖައްސާލައިގެން ޕީއެސްޖީ އަށް މުބާރާތުގެ ފައިނަލްގެ ޖާގަ ހޯދެން އޮތްއިރު، ޕީއެސްޖީ ބަލިކޮށް ބަޔާން އަށް ވެސް ފައިނަލްގެ ޖާގަ ހޯދުމުގެ ފުރުސަތު އެބަ އޮތެވެ.
