ޓީމާ މެދު އިތުބާރު އެބަ އޮތް، ނަތީޖާ އަނބުރާ ލެވޭނެ: ފްލިކް

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި އެތުލެޓިކޯ މެޑްރިޑާ ދެކޮޅަށް ނިކުންނަ އިރު، ބާސެލޯނާގެ ޓީމާ މެދު ފުރިހަމަ އަށް އިތުބާރު އެބަ އޮތް ކަމަށް އެ ޓީމަށް އިރުޝާދު ދެމުން އަންނަ ހަންސީ ފްލިކް ބުނެފި އެވެ.

ފްލިކް މިހެން ބުނީ، އަންގާރަ ދުވަހުގެ ރޭ ދަންވަރު އެތުލެޓިކޯގެ އަމިއްލަ ދަނޑުގައި ކުޅޭ ދެ ވަނަ ލެގުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. މިދިޔަ ހަފުތާގައި ބާސެލޯނާގެ އަމިއްލަ ދަނޑުގައި ކުޅުނު ފުރަތަމަ ލެގުގައި އެތުލެޓިކޯ އިން ވަނީ 2-0 އިން ބާސެލޯނާ ބަލިކޮށްފަ އެވެ.

ދެ ވަނަ ލެގުގެ ކުރިން ވާހަކަ ދައްކަމުން ފްލިކް ބުނީ، ބާސެލޯނާގެ ކުޅުންތެރިންނާއި، ޓީމަށް އޭނާގެ އިތުބާރު އެބަ އޮތް ކަަމަށެވެ. ދެ ވަނަ ލެގުގައި ބާސެލޯނާ އިން އެންމެ ބޮޑު އިސްކަމެއް ދޭން ޖެހޭނީ އެ ޓީމުގެ ކުޅުން ރަނގަޅު ކުރުމަށް ކަމަށް ފްލިކް ބުންޏެވެ. ބާސެލޯނާ އަށް ރަނގަޅު ކުޅުމެއް ދެއްކިއްޖެ ނަމަ، އެ ޓީމަށް ލަނޑު ތަކެއް ޖެހޭނެ ކަމަށް ވެސް ފްލިކް ބުނެފައިވެ އެވެ. 

ފުރަތަމަ ލެގުގައި ދެ ލަނޑުގެ ތަފާތުން ބާސެލޯނާ ބަލިވެފައި އޮތް ނަމަވެސް، އެ ނަތީޖާ އަނބުރާލުމަކީ އުނދަގޫ ކަމެއް ނޫން ކަމަށް ފްލިކް ޤަބޫލު ކުރެ އެވެ. ދެ ލަނޑުގެ ނަތީޖާ އަނބުރާލައި، ބާސެލޯނާާ އަށް ސެމީ ފައިނަލްގެ ޖާގަ ހޯދޭނެ ކަމުގެ އިތުބާރު ފްލިކް އަށް އެބަ އޮތެވެ. އެތުލެޓިކޯ އަކީ ވަރުގަދަ ޓީމެއްކަން ފާހަގަކޮށް ފްލިކް ބުނީ، ޑިފެންސް އާއި އެޓޭކުގައި ވެސް ބާސެލޯނާ އިން ސަމާލުވާން ޖެހޭނެ ކަމަށެވެ.

ފަހަތުން އަރައި ބާސެލޯނާ އިން ނަތީޖާ އަނބުރާލަން ޖެހޭއިރު، ފްލިކް ބުނީ ހުރިހާ ވެސް ކަމަކީ ކުޅުންތެރިންގެ ވިސްނުމާއި، ޓީމުގައި އޮންނަ ޖޯޝު ކަމަށެވެ. އެގޮތުން އެންމެ ފުރަތަމަ ކަމަަކަށް، ބާސެލޯނާ އަށް އެކަން ކުރެވޭނެކަން ޤަބޫލު ކުރަން ޖެހޭ ކަމަށާއި، އެ ވިސްނުން ބަދަލު ވެގެން ނުވާނެ ކަމަށް ވެސް ފްލިކް ބުންޏެވެ. ފްލިކް ބުނީ ބާސެލޯނާ އިން މެޗަށް ނިކުންނާނީ ރަނގަޅަށް ތައްޔާރު ވެގެން ކަމަށާއި، އެ ޓީމުން ބޭނުން ވަނީ ހަމައެކަނި ނަތީޖާ ނެރެން ކަމަށެވެ.

އެތުލެޓިކޯގެ އަމިއްލަ ދަނޑުގައި ބާސެލޯނާ އިން އެ ޓީމާ ދެކޮޅަށް ނިކުންނާނީ އަންގާރަ ދުވަހުގެ ރޭ ދަންވަރު ރާއްޖޭގެ ގަޑިން 12 ޖަހާއިރު އެވެ.