އާޓެޓާ ހުރީ އިތުބާރާ އެކު، ސިޓީ މެޗު ވެސް ބަލާނެ!

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން އާސެނަލް ހޯދި މުހިންމު މޮޅާ އެކު، ބޮޑު އިތުބާރެއްގައި ހުރި ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ. 

އާޓެޓާ މިހެން ބުނީ އާސެނަލްގެ އަމިއްލަ ދަނޑުގައި ފުލަމްއާ ދެކޮޅަށް ކުޅުނު މެޗުން މޮޅުވެ، ލީގު ތާވަލްގައި ހަ ޕޮއިންޓުގެ ލީޑެއް އާސެނަލް އިން ނަގާފައި ވަނިކޮށެވެ. އާޓެޓާ ބުނީ ފުލަމްއާ ދެކޮޅަށް އާސެނަލްގެ ކުޅުންތެރިން ދެއްކި ކުޅުން އަދި ވަކި ވަކި ކުޅުންތެރިންގެ ކުޅުމާ މެދު ވެސް އޭނާ ހިތްހަމަ ޖެހޭ ކަމަށެވެ.

ފުލަމްއާ ދެކޮޅަށް ނިކުތްއިރު ވެސް، އެ މެޗު އުނދަގޫ ވާނެކަން ކުރިން އިޙުސާސް ކުރެވުނު ކަމަށް އާޓެޓާ ބުންޏެވެ. އާޓެޓާ ބުނީ އާސެނަލް އަށް އެ މެޗުން މޮޅުވުމަކީ ވަރަށް މުހިންމު ކަމަކަށް ވެފައި އޮތް ކަމަށާއި، އެކަން ހާސިލު ކުރެވުމުން އުންމީދެއްގައި ހުރި ކަމަށެވެ. އާޓެޓާ ބުނީ އެ މެޗުގެ ނަތީޖާ އާއި، އެ މެޗުން ލިބުނު ހިތްވަރަކީ ކުރިއަށް އޮތް މެޗަށް އާސެނަލް އަށް ލިބުނު ބޮޑު ފައިދާ އަކަށް ވާނެ ކަމަށެވެ. 

އެއާ އެކު އާޓެޓާ ބުނީ އާސެނަލް އަށް ދެން އޮތީ އެންމެ ތާރީޚީ މެޗު ކަމަށެވެ. އެގޮތުން އަންގާރަ ދުވަހުގެ ރޭ ދަންވަރު އާސެނަލްގެ އަމިއްލަ ދަނޑުގައި އެތުލެޓިކޯ މެޑްރިޑާ ދެކޮޅަށް ކުޅޭ، ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގަކީ، އެމިރޭޓްސް ސްޓޭޑިއަމްގައި ތާރީޚުގައި ވެސް ކުޅޭނެ އެންމެ މުހިންމު އެއް މެޗަށް ވާނެ ކަމަށް އާޓެޓާ ބުންޏެވެ. މިދިޔަ ހަފުތާގައި މި ދެ ޓީމު ބައްދަލު ކުރި ފުރަތަމަ ލެގު ނިމުނީ 1-1 އިން އެއްވަރު ވެގެންނެވެ.

އާސެނަލް އިން ޕްރިމިއާ ލީގު ރޭހުގައި ވާދަ ކުރަމުން އަންނައިރު، އާޓެޓާ ބުނީ ވާދަވެރި މެންޗެސްޓަރ ސިޓީ އިން އެވަޓަންއާ ދެކޮޅަށް ކުޅޭ މެޗު ވެސް އޭނާ ބަލާނެ ކަމަށެވެ. އެ މެޗުން މޮޅުވެ، އާސެނަލްއާ ދެމެދު އޮތް ހަ ޕޮއިންޓުގެ ފަރަގު ކުޑަ ކުރުމުގެ ފުރުސަތު ސިޓީ އަށް އޮތްއިރު، ސިޓީ ވަނީ އާސެނަލް އަށް ވުރެ ދެ މެޗު މަދުން ކުޅެފަ އެވެ. އާޓެޓާ ބުނީ އޭނާ އަކީ ފުޓުބޯޅަ އަށް ލޯބި ކުރާ މީހެއް ކަމަށާއި، އެހެންވެ އެ މެޗު ވެސް ބަލާނެ ކަމަށެވެ.

މީގެ އިތުރުން އާޓެޓާ ބުނީ އާސެނަލްގެ އުންމީދުތަކާއި، ހުވަފެންތައް އަދިވެސް ދެމި އޮތް ކަމަށާއި، އެ ޓީމުން ބޭނުންވާ އަމާޒަށް ވާސިލުވުމަށް ގަދައަޅާ މަސައްކަތް ކުރާނެ ކަމަށެވެ. އާސެނަލްގެ ހުރިހާ ކުޅުންތެރިންނާއި، ކޯޗިން އޮފިޝަލުން ވެސް މަސައްކަތް ކުރަނީ އެކަން ހާސިލު ކުރަން ކަމަށާއި، އޭނާ ހުރީ ވަރަށް ބޮޑު އިތުބާރަކާ އެކު ކަމަށް އާޓެޓާ ބުންޏެވެ.

ލީގުގައި މިހާތަނަށް ކުޅެފައިވާ 35 މެޗުން އާސެނަލް އަށް ލިބެނީ 76 ޕޮއިންޓެވެ. އާސެނަލް އަށް ވުރެ ދެ މެޗު މަދުން ކުޅެފައިވާ ސިޓީ އަށް ދެ ވަނައިގައި ލިބެނީ 70 ޕޮއިންޓެވެ.