ފޮރިން ސިޔާސަތާ ޚިލާފު ވެފައިވާ ކަމަށް ވިދާޅުވެ، އެމެރިކާގެ ސެނެޓަރު ވޯނާގެ ފާޑު ކިޔުން ޓްރަމްޕް އަށް

އެމެރިކާގެ ރައީސް ޑޮނަލްޑް ޓްރަމްޕް އޭނާގެ ފޮރިން ސިޔާސަތާ ގުޅޭ ގޮތުން ވެވަޑައި ގެންފައިވާ ވަޢުދުތަކާ ޚިލާފުވެ ވަޑައި ގަންނަވަމުންދާ ކަމަށް ވިދާޅުވެ، އިދިކޮޅު ޑިމޮކްރެޓިކް ޕާޓީގެ ސެނެޓަރު މާކް ވޯނާ ވަރަށް ބޮޑަށް ފާޑު ވިދާޅުވެއްޖެ އެވެ.

ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ސެނެޓަރު ވޯނާ ވިދާޅުވީ، ހަނގުރާމަތައް ނިމުމަކަށް އަންނަނީ ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، ހަގީގަތަކީ އަދިވެސް އެމެރިކާ އިން އީރާން އަށް ޙަމަލާތައް ދެމުންދާ ކަމެވެ. މިކަމުން ދޭހަވަނީ ޓްރަމްޕްގެ ވާހަކަފުޅު ތަކާއި އަމަލީ މަސައްކަތާ ދިމާ ނުވާކަން ކަމަށް އޭނާ ފާހަގަ ކުރެއްވި އެވެ.

މީގެ އިތުރުން ވޯނާ ވިދާޅުވީ، ޓްރަމްޕް ގެންދަވަނީ ވެވަޑައިގެންފައިވާ ކޮންމެ ވަޢުދަކާ ޚިލާފުވެ ވަޑައި ގަންނަވަމުން ކަމަށެވެ. އަދި ނިމުމެއް ނެތް އައު ހަނގުރާމަތައް ފައްޓަވައި، އާންމު ދިރިއުޅުމުގެ ހުރިހާ ކަމެއްގެ އަގުތައް އުފުއްލަވަމުން ގެންދަވާ ކަމަށް ވެސް އޭނާ ތުހުމަތު ކުރެއްވި އެވެ.

ޓްރަމްޕްގެ ސަރުކާރުން ގެންގުޅޭ ފޮރިން ސިޔާސަތު ތަކުގެ ސަބަބުން އެމެރިކާގެ މަސްލަހަތަށް ގެއްލުން ވަމުންދާ ކަމަށް ޑިމޮކްރެޓިކް ޕާޓީ އިން ބުނަމުން ދާއިރު، ވޯނާގެ މި ފާޑު ކިޔުންތައް އަމާޒު ވެފައި ވަނީ މެދު އިރުމަތީގެ މަސްރަހު ނުތަނަވަސް ވެފައިވާ ދަނޑިވަޅެއްގައި އެވެ. ޚާއްޞަކޮށް އީރާންއާ ދެކޮޅަށް އެމެރިކާ އިން ކުރިއަށް ގެންދާ އަސްކަރީ ހަރަކާތް ތަކަކީ ޓްރަމްޕްގެ "ހަނގުރާމަތައް ހުއްޓާލުމުގެ" ވައުދާ ސީދާ ފުށު އަރާ ކަމެއްގެ ގޮތުގައި ވޯނާ ވަނީ ސިފަ ކުރައްވާފައި އެވެ.

މި މައްސަލައިގައި އެމެރިކާގެ ރިޔާސީ ގަނޑުވަރު ވައިޓް ހައުސް އިން އަދި ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް ޓްރަމްޕް މީގެ ކުރިން ވިދާޅުވެފައި ވަނީ އޭނާގެ ސިޔާސަތަކީ އެމެރިކާގެ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުން ކަމަށެވެ. ސެނެޓަރު ވޯނާގެ މި ވާހަކަތަކާ އެކު، އެމެރިކާގެ ގާނޫނު ހަދާ މަޖިލީހުގެ ތެރޭގައި ޓްރަމްޕްގެ ފޮރިން ސިޔާސަތާ މެދު އޮތް ބަހުސް ވަނީ އިތުރަށް ހޫނުވެފައި އެވެ.