ބައިނަލްއަޤުވާމީ އިންޓަނެޓުގެ ޚިދުމަތް އަލުން ދިނުމަށް އީރާންގެ ރައީސް އަމުރު ކުރައްވައިފި

އީރާންގައި މެދު ކަނޑާފައިވާ ބައިނަލްއަޤުވާމީ އިންޓަނެޓުގެ ޚިދުމަތް އަލުން އިއާދަ ކުރުމަށް، އެ ޤައުމުގެ ރައީސް މަސްއޫދު ޕެޒެޝްކިއާން އަމުރު ކުރައްވައިފި އެވެ. 

އީރާންގެ ދައުލަތުގެ މީޑިއާ އިން ހޯމަ ދުވަހު މިކަން ރިޕޯޓު ކޮށްފައި ވަނީ، އެ ޤައުމުގެ ކޮމިއުނިކޭޝަން މިނިސްޓްރީގެ ޕަބްލިކް ރިލޭޝަންސްްގެ އޮފިޝަލަކާ ހަވާލާދީ އެވެ.

އީރާންގެ ރައީސް ޕެޒެޝްކިއާން މި އަމުރު ނެރުއްވާފައި މި ވަނީ، އެމެރިކާ އާއި އިޒްރޭލް އިން އެ ގައުމަށް ދިން ހަމަލާތަކާ ގުޅިގެން އިންޓަނެޓުގެ ހިދުމަތް މެދު ކަނޑާލާފައި އޮންނަތާ ގާތް ގަނޑަކަށް 90 ދުވަސް ފަހުންނެވެ. ނަމަވެސް، މި ނިންމުމާ އެއްގޮތަށް ބައިނަލްއަގުވާމީ އިންޓަނެޓުގެ ވިއުގައާ އަލުން ގުޅާލާނީ ކޮން ވަގުތަކު ކަމެއް، އަދި އެކަން ކުރާނެ މެކޭނިޒަމް އަކީ ކޮބައި ކަމެއް މިހާތަނަށް ސަރުކާރުން ހާމަ ކޮށްފައި ނުވެ އެވެ.

އިންޓަނެޓުގެ ހިދުމަތްތައް މޮނިޓަރ ކުރާ ބައިނަލްއަގުވާމީ ޖަމިއްޔާއެއް ކަމަށްވާ "ނެޓްބްލޮކްސް" އިން ހާމަ ކޮށްފައިވާ ގޮތުގައި، އީރާންގެ ގިނަ ރައްޔިތުންނަށް އިންޓަނެޓުގެ ޚިދުމަތް މެދު ކެނޑިފައި އޮންނަތާ މިއަދަށް 87 ދުވަސް ވެއްޖެ އެވެ. މި މުއްދަތުގެ ތެރޭގައި އިންޓަނެޓު ބޭނުން ކުރެވެނީ ވަރަށް މަދު ބަޔަކަށް ކަމަށާއި، އެއީ ވެސް ބޮޑު އަގުދީގެން ހޯދާ އެޑްވާންސް ވީޕީއެންތައް މެދުވެރިކޮށް ސަރުކާރުގެ ހުރަސްތައް ގިރާ ކޮށްގެން ކަމަށް އެ ޖަމިއްޔާ އިން ބުނެ އެވެ.

އީރާންގެ ކަމާ ބެހޭ ފަރާތް ތަކުން އެންމެ ފުރަތަމަ އިންޓަނެޓު ކަނޑާލާފައި ވަނީ ޖެނުއަރީ މަހުގެ އަށް ވަނަ ދުވަހު ސަރުކާރާ ދެކޮޅަށް މުޅި ގައުމުގައި ކުރަން ފެށި މުޒާހަރާ ތަކާ ގުޅިގެންނެވެ. އޭގެ ފަހުން ފެބްރުއަރީ މަހުގެ ތެރޭގައި ހިދުމަތްތައް އާންމު ހާލަތަކަށް ރުޖޫއަވާން ފެށި ނަމަވެސް، ފެބްރުއަރީ 28 ގައި އެމެރިކާ އާއި އިޒްރޭލް އިން އީރާން އަށް ދޭން ފެށި ހަމަލާ ތަކާ އެކު އަލުން އިންޓަނެޓު ބްލެކް އައުޓެއް ވަނީ އިއުލާނު ކޮށްފައި އެވެ.

އާންމު ހާލަތްތަކުގައި ވެސް އީރާން އިން ދަނީ ބައިނަލްއަގުވާމީ އިންޓަނެޓު ބޭނުން ކުރުމުގައި ހަރުކަށި ފިޔަވަޅު ތަކެއް އަޅަމުންނެވެ. އެގޮތުން ގިނަ ވެބްސައިޓު ތަކެއް ސެންސަރު ކޮށްފައިވާއިރު، ސަރުކާރުން ދަނީ ބައިނަލްއަގުވާމީ ވިއުގަ އަށް ބަރޯސާ ނުވެ ހިދުމަތްތައް ދެވޭނެ "އިންޓްރަނެޓް" ނިޒާމެއް ގާއިމު ކުރުމަށް މަސައްކަތް ކުރަމުންނެވެ.

މިހާރު ވެސް އެ ގައުމުގެ ސްކޫލް ތަކުގެ ކިޔަވައި ދިނުން އޮންލައިންކޮށް ކުރިއަށް ގެންދަނީ މި ފާހަގަ ކުރި އެތެރޭގެ ވިއުގަ މެދުވެރިކޮށެވެ.