13 މަސް ދުވަހުގެ ތެރޭގައި ތިން ވަނަ ފަހަރަށް ޓްރަމްޕް ހޮސްޕިޓަލް އަށް ވަޑައިގަންނަވަނީ
އުމުރުފުޅުން މިހާރު 79 އަހަރުވެފައިވާ ޓްރަމްޕް ވޯލްޓާ ރީޑް މެޑިކަލް ސެންޓަރަށް ވަޑައިގަންނަވާނީ އަންގާރަ ދުވަހު. ތިން ވަނަ ފަހަރަށް ޓްރަމްޕް ހޮސްޕިޓަލް އަށް ވަޑައިގަންނަވާ ޚަބަރާ އެކު، އަނެއްކާ ވެސް އާންމުންގެ ތެރޭގައި ވަނީ އޭނާގެ ޞިއްޙީ ޙާލަތާ ބެހޭ ގޮތުން ގިނަ ސުވާލު ތަކެއް އުފެދިފައި.
އެމެރިކާގެ ރައީސް ޑޮނަލްޑް ޓްރަމްޕް. | ގެޓީ އިމޭޖަސް
އެމެރިކާގެ ރައީސް ޑޮނަލްޑް ޓްރަމްޕްގެ ޞިއްޙީ ޙާލަތާ މެދު އާންމުންގެ ތެރޭގައި ކަންބޮޑުވުން ތަކެއް އިތުރު ވަމުންދާ ވަގުތެއްގައި، އާންމު ޞިއްޙީ އަދި ދަތުގެ ޗެކަޕެއް ހެއްދެވުމަށްޓަކައި ޓްރަމްޕް ހޮސްޕިޓަލް އަށް ވަޑައިގަންނަވަން ޝެޑިއުލް ކުރައްވައިފި އެވެ.
ޓްރަމްޕް ވަޑައިގެންނެވުމަށް ހަމަޖެހިފައި ވަނީ މޭރީލޭންޑުގައި ހުންނަ ވޯލްޓާ ރީޑް މެޑިކަލް ސެންޓަރަށެވެ. މިއީ ފާއިތުވި 13 މަސް ދުވަހުގެ ތެރޭގައި ޓްރަމްޕް ހޮސްޕިޓަލް އަށް ވަޑައިގަންނަވާ ތިން ވަނަ ފަހަރެވެ. ނަމަވެސް، މީގެ ކުރީ ކޮންމެ ފަހަރެއްގައި ވެސް ރިޔާސީ ގަނޑުވަރު ވައިޓް ހައުސް އިން އެކަމުގެ ފުރިހަަމަ މައުލޫމާތު ދިނުމަށް ދެކޮޅު ހަދާފައިވެ އެވެ.
އުމުރުފުޅުން މިހާރު 79 އަހަރުވެފައިވާ ޓްރަމްޕް ވޯލްޓާ ރީޑް މެޑިކަލް ސެންޓަރަށް ވަޑައިގަންނަވާނީ އަންގާރަ ދުވަހު އެވެ. ތިން ވަނަ ފަހަރަށް ޓްރަމްޕް ހޮސްޕިޓަލް އަށް ވަޑައިގަންނަވާ ޚަބަރާ އެކު، އަނެއްކާ ވެސް އާންމުންގެ ތެރޭގައި ވަނީ އޭނާގެ ޞިއްޙީ ޙާލަތާ ބެހޭ ގޮތުން ގިނަ ސުވާލު ތަކެއް އުފެދިފަ އެވެ.
މީގެ ކުރިން 2025 ވަނަ އަހަރުގެ އޭޕްރީލް މަހު ޖިސްމާނީ ތަހުލީލު ތަކަކަށް ވޯލްޓާ ރީޑް މެޑިކަލް ސެންޓަރަށް ޓްރަމްޕް ވަޑައިގެންފައިވާ އިރު، އޮކްޓޫބަރު މަހު ވެސް ވަނީ "ޝެޑިއުލްޑް ފޮލޯ އަޕް" އެއްގެ ނަމުގައި ހޮސްޕިޓަލް އަށް ވަޑައިގެންފައި އެވެ. އެ ފަހަރު ވައިޓް ހައުސް އިން މައުލޫމާތު ދިނުމަށް ފަސް ޖެހުނުއިރު، ފަހުން ވަނީ ހިތުގެ ބަލި ތަކުގެ އެއްވެސް ނިޝާނެއް ހުރިތޯ ބެލުމަށް ސީޓީ ސްކޭނެއް ހެއްދެވިކަން ކަށަވަރު ކޮށްދީފައި އެވެ. ނަމަވެސް އެ ޓެސްޓު ތަކުގެ ނަތީޖާ ނޯމަލް ކަމަށް އެމެރިކާގެ ސަރުކާރުން ވަނީ ބުނެފައި އެވެ.
މިފަހަރުގެ މެޑިކަލް ޗެކަޕް މި ކުރިއަށް ދަނީ ޓްރަމްޕްގެ އަތްޕުޅުގައި ނޫފައިގެންފައި ހުންނަ ނިޝާން ތަކެއް ފެނުމާ ގުޅިގެން، އާންމުންގެ ފާޑު ކިޔުން އަމާޒު ވެފައިވާ ވަގުތެއްގަ އެވެ. ވައިޓް ހައުސް އިން ބުނާ ގޮތުގައި އެއީ ގިނަގިނަ އިން މީހުންނާ ސަލާމް ކުރުމުގެ ސަބަބުން ޓިޝޫ ތަކަށް ލިބޭ ގެއްލުމާއި، އެސްޕިރިން ބޭނުން ކުރުމުގެ ސަބަބުން ދިމާވާ ކަމެކެވެ. އެހެން ނަމަވެސް، ފަހަކަށް އައިސް ޓްރަމްޕްގެ ދެ އަތުން ވެސް މިފަދަ ނިޝާންތައް ވަނީ ފެނިފައި އެވެ.
ޓްރަމްޕްގެ ޞިިއްޙީ ޙާލަތު ވަރަށް ރަނގަޅު ކަމަށް ވައިޓް ހައުސް އިން ތަކުރާރުކޮށް ބުނަމުން ދިޔަ ނަމަވެސް، ވާހަކަ ދައްކަވާއިރު ބަސްތައް އޮޅުމާއި، ބައްދަލުވުން ތަކުގެ ތެރޭގައި ނިދި ޖެހުން ފަދަ ކަންކަން ފާހަގަ ކުރެވޭތީ އާންމުން ދަނީ ކަންބޮޑުވުން ފާޅު ކުރަމުންނެވެ. އަދި ޓްރަމްޕްގެ ޞިއްޙީ ހާލަތު ރިޕޯޓުކުރާ ވަރަށްވުރެ ގޯސް ކަމަށް ބެލެވޭތީ، ބައެއް ޑޮކްޓަރުން ވަނީ އޭނާގެ ކިބައިން ޑިމެންޝިއާ ނުވަތަ ސްޓްރޯކެއްގެ އަލާމާތްތައް ފެންނަ ކަމަށް ބުނެ ކަންބޮޑުވުން ފާޅުކޮށްފައި އެވެ.
އަންނަ ޖޫން މަހުގެ 14 ވަނަ ދުވަހު ޓްރަމްޕް އަށް 80 އަހަރު ފުރޭއިރު، އޭނާ ވެގެންދާނީ އެމެރިކާގެ ތާރީޚުގައި ވެސް މަގާމުގައި ހުންނަވާ އެންމެ ދުވަސްވީ ރައީސް އަށެވެ. މީގެ ކުރިން ޓްރަމްޕް ވަނީ، އޭނާގެ ކުރިން ވެރިކަމުގައި ހުންނެވީ ޖޯ ބައިޑަންގެ ޞިއްޙީ ޙާލު ކޮޅާ މެދު ޖޯކު ޖައްސަވައިފަ އެވެ. އަދި ބައިޑަން އަކީ އަބަދު ވެސް ނިދި ޖެހިފައި އިންނަވާ ރައީސެއް ކަމަށް ޓްރަމްޕް ވިދާޅުވެފައިވެ އެވެ.
